Mafyou

5 Lè Jézi wè kantité moun ki té la, i mouté mòn-nan. Apwé i asid, sé disip li-a vini a koté’y, 2 èk i koumansé enstwi yo. Jézi di yo: 3 “Moun ki wéyalizé yo bizwen djid Bondyé ni tjè kontan, paski Wéyòm Bondyé sé sa yo. 4 “Moun ki an twistès ni tjè kontan, paski yo kay twapé konsolasyon. 5 “Moun ki ka abésé kò yo ni tjè kontan, paski latè-a kay sa yo. 6 “Moun ki ni gwan dézi pou wè jistis fèt ni tjè kontan, paski Bondyé kay byen satisfè dézi yo. 7 “Moun ki enmen pawdonnen lézòt ni tjè kontan, paski yo kay wisivwè pawdonnasyon. 8 “Moun ki ni tjè pi ni tjè kontan, paski yo kay wè Bondyé. 9 “Moun ki enmen fè lapé ni tjè kontan, paski Bondyé kay kwiyé yo ich li. 10 “Moun ki ka soufè paski yo ka fè sa ki dwèt ni tjè kontan, paski Wéyòm di syèl sé sa yo. 11 “Magwé moun ensilté’w, maltwété’w, èk di tout sòt kalité mansonj asou’w pou lapétí mwen, ou ni tjè kontan. 12 Sé pou’w wéjwi èk ni lajwa, paski Papa’w ki an syèl kay wékonpansé’w adan an gwan mannyè. Anfen, sé menm mannyè-a yo té pèsikité pwofèt Bondyé an tan pasé. 13 “Ou menm kon sèl pou latè-a. Mé si sèl-la pèd gou’y, ki mannyè i kay ni gou sèl ankò? I pa vo anyen ankò; sèl sa ou sa fè épi’y sé jété’y dèwò pou moun maché asou’y. 14 “Ou menm kon klèté pou latè sala ki an nwèsè. Si an vil asou an mòn, moun oblijé wè’y. 15 Lè moun limen an lanp, yo pa ka mété’y anba an panyen, mé yo ka mété’y asou an tab, kon sa, i ka bay tout moun an kay-la klèté. 16 Menm mannyè-a, sé pou limyè’w kléwé pou lézòt wè’y. Lè sala, yo kay wè bon twavay-la ou ka fè-a, èk yo kay glowifyé Papa’w ki an syèl. 17 “Sé pa pou zòt kwè mwen vin aboli Lwa-a ében pawòl sé Pwofèt-la. M’a vin aboli yo, pito sa, mwen vin fè tout sa yo di-a. 18 M’a-a manti pou di’w, i pli ézé pou syèl èk latè pasé, pito yonn an sé pli piti lèt-la, ében ti bout yon lèt ki an Lwa-a pasé. Tout sa ki ékwi an Lwa-a kay fèt. 19 Alò, népòt moun ki kasé yonn an sé konmandman-an moun kwè ki pa enpòtan-an, èk ka enstwi lòt moun pou fè menm bagay-la, pa kay an Wéyòm di syèl. Mé, népòt moun ki obéyi Lwa-a, èk ka enstwi lòt moun pou obéyi’y, kay an Wéyòm di syèl. 20 Paski mwen ka di’w, si lafwa’w pa pli fò pasé lafwa sé Fawizyen-an, èk lafwa sé moun-nan ki ka enstwi Lwa-a, ou pa kay antwé an Wéyòm di syèl. 21 “Ou tann yo té di moun an tan lontan: ‘Zòt pa ni pou tjwé. Népòt moun ki tjwé kay ni pou wéponn tèt li lodyans.’ 22 Mé n’a di’w, népòt moun ki wèsté faché épi fwè’y, kay ni pou wéponn tèt li lodyans tou. Osi, népòt moun ki di vyé pawòl pou ensilté fwè’y, kay twapé kò’y douvan pli gwan Konsèy-la. Èk népòt moun ki di fwè’y: ‘Ou sé an kouyon!’ ja an chimen pou détwi. 23 “Kon sa, si ou ka mennen lofwann ou douvan Bondyé, èk padan’w asou chimen, ou chonjé fwè’w faché épi’w, 24 p’òkò mennen lofwann-nan. Alé fè lapé épi fwè’w avan, èk apwé ou fè sa, ou sa alé ofè lofwann ou. 25 “Si an moun ka pòté’w lodyans, wanjé bagay épi’y byen vit. Anfen, avan jou lodyans-lan, wanjé zafè zòt. Si’w pa fè sa, moun-nan pé mennen’w douvan jij-la, jij-la pé kondanné’w èk ladjé’w an lanmen ofisyé lodyans-lan. Apwé sa, yo kay mété’w an pwizon. 26 M’a-a manti pou di’w, ou pa kay sòti an pwizon tout tan ou pa fin péyé dènyé ti dé sou-a ou dwé-a. 27 “Ou tann yo té di: ‘Ou pa ni pou fè adiltè.’ 28 Mé mwen menm ka di’w, népòt moun ki kontiné gadé an fanm jis tan i anvi kouché épi’y, ja fin fè adiltè épi’y an tjè’y. 29 Kon sa, si zyé’w ka fè’w péché, waché’y, èk jété’y byen lwen. Sé vonmyé ou pèdi zyé’w pito ou pèdi lavi’w. 30 Osi, si lanmen’w ka fè’w péché, koupé’y, èk jété’y. Sé vonmyé ou pèdi lanmen’w pito ou pèdi lavi’w. 31 “Apa di sa, yo té di: ‘Népòt moun ki dévosé madanm li, sipozé ba li yon papyé dévòs.’ 32 Mé n’a di’w, an nonm pa sipozé dévosé madanm li, si sé pa imowalité madanm li fè. Si an nonm dévosé madanm li pou pyès lòt wézon, i ka mété madanm-lan an wis pou fè adiltè. Èvèk népòt moun ki mayé madanm sala, ka fè adiltè osi. 33 “Osi, ou tann yo té di moun an tan lontan: ‘Ou pa ni pou fè an pwonmèt èk apwé ou pa tjenn pwonmèt-la ou fè-a. Lè’w fè Jéhova an pwonmèt, sé pou’w tjenn pwonmèt ou.’ 34 Mé n’a di’w: Pa sèwmanté pyès. Pa sèwmanté asou syèl, paski syèl sé twòn Bondyé; 35 pa sèwmanté asou latè, paski sa sé ti ban-an koté Bondyé ka mété pyé’y; pa sèwmanté asou Jérouzalèm, paski Jérouzalèm sé vil Bondyé, gwan Wa-a; 36 pa sèwmanté asou lavi’w, paski ou pa sa fè yon bwanch chivé’w vini blan ében vini nwè. 37 Alò, si ou di ou kay fè an bagay, fè’y; èk si ou di ou pa kay fè an bagay, pa fè’y. Lè’w di ou kay fè an bagay, èk ou sav ou pa kay fè’y, ou ka fè menm kon Denmou-an. 38 “Ou tann yo té di: ‘Si an moun kwévé zyé an lòt moun, yo ni pou kwévé zyé’y viwé. Si an moun kasé dan an lòt moun, yo ni pou kasé dan’y viwé.’ 39 Kanmenm n’a di’w: Pa wimèt an moun ki méchan. Okontwè, si an moun ba’w on souflé asou yon fasad fidji’w, kité’y ba ou on souflé asou lòt fasad fidji’w tou.Kanmenm n’a di’w: Pa wimèt an moun ki méchan. Okontwè, si an moun ba’w on souflé asou yon fasad fidji’w, kité’y ba ou on souflé asou lòt fasad fidji’w tou. 40 Èk si an moun vlé mennen’w lodyans pou chimiz ou, ba li kanmizòl ou osi. 41 Èk si an moun ki ni lotowité oblijé’w fè an bagay, fè plis pasé i mandé’w. 42 Si an moun mandé’w an bagay, ba li’y, èk si an moun vlé pwété an bagay lanmen’w, pa di’y non. 43 “Ou tann yo té di: ‘Ou sipozé enmen pwochen’w èk hayi lèlmi’w.’ 44 Mé mwen menm ka di’w: Kontiné enmen lèlmi’w èk pwédyé bay moun ki ka pèsikité’w. 45 Si ou fè sa, ou ka moutwé ou menm kon Papa’w ki an syèl; paski i ka fè sòlèy li lévé anlè ni moun ki mové ni moun ki bon, èk i ka fè lapli tonbé asou moun ki fè sa ki bon èk moun ki fè sa ki pa bon. 46 Si sé sèlman moun ki enmen’w ou enmen, ki sa sa ka fè ba ou? Jis sé moun-nan ki ka anmasé taks ki ka fè sa. 47 Èk si sé jan’w tousèl ou ka di bonjou, sé pa anyen tèlman ou ka fè la. Ès sé pa menm bagay-la moun ki pa konnèt Bondyé ka fè? 48 Sé pou’w pawfé, menm kon Papa’w ki an syèl pawfé.