Mafyou

7 “Las jijé, lè sala yo pa kay jijé’w. 2 Paski mannyè-a ou jijé, sé kon sa yo kay jijé’w. Èk mannyè-a ou twété moun, sé kon sa yo kay twété’w. 3 Pouki ou ka gadé ti tjò pay-la ki an zyé fwè’w-la, mé ou pa ka menm wè gwo bi bwa-a ki an zyé’w-la? 4 Ki mannyè ou sa ni tjè pou di fwè’w, ‘Kité mwen tiwé ti tjò pay-la ki an zyé’w-la,’ lè ou menm ni an gwo bi bwa an sa ou-a? 5 Ipokwit! Tiwé gwo bi bwa-a ki an zyé’w-la avan, èk apwé ou tiwé’y, ou kay wè pli klè mannyè pou tiwé ti tjò pay-la ki an zyé fwè’w-la. 6 “Pa bay chyen bagay ki sa Bondyé, èk pa jété bagay ki valowab douvan kochon. Si ou fè sa, yo kay pilonnen yo anba pat yo, èvèk apwé sa, yo kay tounen dèyè èk ataké’w. 7 “Kontiné mandé Bondyé pou sa ou bizwen èk i kay ba ou’y. Kontiné chaché èk ou kay twapé. Kontiné konyen èk i kay ouvè ba ou. 8 Paski tout moun ki mandé kay wisivwè, tout moun ki chaché kay twapé, èk tout moun ki konyen, yo kay ouvè ba yo. 9 Di mwen, si yonn an sé ich ou-a mandé’w an pen, ès ou kay ba li an wòch? 10 Èk si i mandé’w an pwéson, ès ou kay lonjé’y an sèpan? 11 Bon, magwé ou ka fè an chay bagay ki pa bon, ou konnèt mannyè pou bay ich ou bon bagay. Alò, ou sa asiwé Papa’w ki an syèl kay bay tout moun bon bagay dépi yo mandé’y. 12 “Toujou twété moun mannyè-a ou vlé yo twété’w. Anfen, sé sa Lwa-a èk pawòl sé Pwofèt-la bazé asou. 13 “Antwé an bayè-a ki étwèt-la, paski chimen-an ki ka mennen lanmò gwan épi bayè-a laj, èk an pil moun ka pasé la. 14 Mé chimen-an ki ka mennen lavi piti èk bayè-a étwèt, èk sé byen pé moun ki ka twouvé chimen sala. 15 “Véyé pou sé fo pwofèt-la ki ka vini palé an non Bondyé. Yo ka vini dous kon mouton, mé yo vwéman kon chyen mawon ki vlé manjé’w. 16 Alò, aksyon yo kay fè’w konnèt ki moun yo vwéman yé. Moun pa ka tjouwi wézen asou pyé pikan. Èk zèb pa ka pòté fig fwans. 17 An bon pyé fwi ka pòté bon fwi, mé an pyé fwi ki pa bon ka pòté fwi ki pa vo anyen. 18 An bon pyé fwi pa sa pòté fwi ki pa bon, èk an pyé fwi ki pa bon pa sa pòté fwi ki bon. 19 Si an pyé fwi pa ka pòté bon fwi, moun ka koupé’y èk yo ka bwilé’y. 20 Vwéman, sé aksyon sé fo pwofèt sala ki kay fè’w konnèt yo. 21 “Sé pa tout moun ki ka kwiyé mwen, ‘Senyè, Senyè,’ ki kay antwé an Wéyòm di syèl. Mé sé sèlman moun ki ka obéyi Papa mwen ki an syèl ki kay antwé. 22 Jou-a kay wivé lè an pil moun kay di mwen, ‘Senyè, Senyè, ou pa chonjé nou té pwéché an non’w, nou té tiwé vyé lèspwi an non’w, èk nou té fè an chay miwak an non’w? Ou pa chonjé sa?’ 23 Mé lè sala mwen kay di yo, ‘M’a konnèt ki moun zòt yé. Sòti douvan mwen débann méchan!’ 24 “Alò, népòt moun ki tann sa mwen di èk obéyi mwen, yo kay menm kon an nonm ki ni lasajès ki bati kay li asou kayè. 25 Èk lè lapli dévidé, dlo mouté èk gwo van vanté, kay-la pa anfondwé paski i té bati asou kayè. 26 Okontwè, népòt moun ki tann pawòl mwen èk yo pa obéyi’y, moun sala kay menm kon an nonm ki kouyon ki bati kay li asou sab. 27 Èk lè lapli dévidé, dlo mouté èk gwo van vanté, kay-la anfondwé èk i kwazé an miyèt.” 28 Lè Jézi fini palé, sé moun-nan wèsté bouch gwan ouvè lè yo wè mannyè i té ka enstwi. 29 Paski i pa té enstwi yo kon sé Jwif-la ki ka enstwi Lwa-a, mé i enstwi yo kon an moun ki ni lotowité.