Ditonronnonmi

3 “Apwé sa, nou tounen èk nou pwan chimen-an ki ka mennen’w Béchann. Èk Òg, wa Béchann, vini épi tout pèp li, pou batayé épi nou an Èdriyay 2 Kon sa Jéhova di mwen: ‘Sé pa pou ou pè’y, pas mwen kay ladjé li, tout pèp li, èk tout tè’y an lanmen’w, èk ou kay fè’y menm sa ou té fè Sayhonn, wa jan Amorayt, ki té ka wèste Hèshbonn.’ 3 Alò, Jéhova, Bondyé nou-an, ladjé Òg, wa péyi Béshann èk tout pèp li an lanmen nou, èk nou kontiné goumen kont yo jis tan la pa té ni yon moun ki té chapé. 4 Apwé sa, nou pwan tout sé vil yo-a. La pa ni yon vil nou pa té pwan an lanmen yo. Nou pwan swasant «60» vil an tout; tout sé vil-la an wijon Agòb, koté Òg, wa Béchann té ka kondwi. 5 Tout sé vil sala té ni masonn ki byen ho, bayè, èk ba. Apa di sa, nou pwan an gwo kantité ti vil. 6 Nou détwi yo tout, menm kon nou té fè Sayhonn, Wa Hèshbonn lè nou détwi tout sé vil li-a, sé nonm-lan, sé fanm-lan, èk sé manmay-la 7 Èk nou pwan tout sé zannimo-a èk tout sa ki té an sé vil-la pou kò nou. 8 “Lè sala, nou sézi tout tè dé wa jan Amorite ki té ka wèsté an wijon Jouden-an, sòti Fon Anon pou wivé jis Mòn Hèmonn. 9 (Jan Saydonn té ka kwiyé mòn sala Siriyonn èk jan Amorayt té ka kwiyé’y Sinè). 10 Nou osi sézi tout sé vil-la an plato-a, tout Giliyad, èk tout Béchann pou wivé jis Salika èk Èdriyay, sé vil-la ki an wijon-an koté Òg, wa Béchann té ka kondwi. 11 Paski Òg, Wa Béchann, sété dènyé ki té wèsté anpami jan Rèfayim. Senkèy li té fèt épi fè, èk jis toujou i Rabba, vil désandan Amonn. I té apipwé twèz «13» pous an londjè èk apipwé senk «5» pous an gwandè, silon mannyè yo té ka miziwé. 12 Mi sé tè-a nou té sézi a lè-a: sòti Awoyè ki an Fon Anon, èk dimi wijon-an ki an sé mòn-nan an Giliyad. Mwen bay lafanmi Roubenn èk lafanmi Gadd sé vil-la ki an sé plas sala. 13 Mwen bay adan lafanmi Mannasa lèwèstan Giliyad èk tout Béchann, koté wa Òg té ka kondwi. Yo té ka kwiyé tout wijon Agòb, ki an Béchann, Rèfayim