Jij
16 Yon jou lè Sanmsin té alé Gaza, i wè a fanm vyé lavi èk i antwé lakay fanm-lan. 2 Yo di sé jan Gaza-a: “Sanmsin la.” Konsa, yo vini ansanm bò bayé vil-la, épi yo èspéyé Sanmsin tout lannwit pou bouwé anlè’y. Tout lannwit yo wèsté twantjil, èk yo té ka di an lidé yo: “Lè jou ouvè, nou kay tjwé’y.” 3 Mé Sanmsin wèsté kouché koté i té yé-a jis mennwit. A mennwit, i lévé épi i tjébé bayè vil-la èk sé dé poto-a. Épi i waché yo, ansanm épi bwa-a yo té sèvi pou fenmen bayè-a. I mété yo asou zépòl li, èvèk i pòté yo mouté tèt montany-lan ki ka gadé Hèbron. 28 Sanmsin plédé bay Jéhova èk i di’y: “Jéhova, Senyè-a ki Pli Ho-a, tanpwi souplé chonjé mwen. Bondyé mwen, souplé, ban mwen fòs pou denyé fwa-a. Èk kité mwen pwan wivanj asou sé Filistin-lan pou yonn an sé dé zyé mwen-an.” 29 Apwé sa, Sanmsin mété lanmen’y asou sé dé poto-a ki té an mita kay-la ki té ka sipòté kay-la. Épi i mété lanmen dwèt li asou yonn, èk lanmen gòch li asou lòt la. 30 Épi Sanmsin andjélé: ”Kité mwen mò épi sé Filistin-lan!” Èk i pousé sé dé poto-a épi tout fòs li, èk kay-la tonbé asou sé chèf Filistin-lan èk tout sé lézòt moun-lan ki té la. Konsa, jou-a Sanmsin mò, i tjwé plis moun pasé kantité moun-lan i té tjwé patan i té vivan.