Samz
An Pòsyon Liv
Samz-la
Liv Samz-la sé an liv chanté èk an liv lapwiyè ki an Bib-la. Wa David èk lézòt moun ékwi sé chanté sala èk sé lapwiyè sala adan diféwan tan èk sikonstans an lavi yo. Sé jan Izwayèl-la té ka sèvi yo lè yo té ka adowé Bondyé. Yo vin mété tout adan an sèl liv, èk apwé sa yo vini an pa an Bib-la.
La ni diféwan Samz an Bib-la. La ni chanté pou glowifyé Bondyé, chanté pou wimèsyé Bondyé, lapwiyè pou mandé Bondyé pou pwotèksyon, èk lapwiyè pou mandé Bondyé padon. Adan sé Samz-la ka di mannyè an moun ka santi an tjèʼy, èk lézòt ka palé konsèné nasyon-an.
La ni yon san senkant Samz. Sé an ti pòsyon tousèl nou ni la. Jézi èk sé nonm-lan ki ékwi Tèstèman Nèf-la té sèvi pawòl ki té sòti an sé Samz-la, kon sa sé Samz sala enpòtan pou édé nou konpwann sa yo ékwi-a.
Mannyè Pou Viv An Bon Lavi
1 Pa dé bon i bon pou moun-an
ki pa ka pwan konsèy sé méchan-an,
ki pa ka swiv ègzanp sé péchè-a,
ki pa ka asid ansanm èk moun ki ka pwan Bondyé sèvi widitjil.
2 Pito i fè sa, i ka pwan plézi pou obéyi lwa Bondyé Senyè-a,
èk i ka étidyéʼy lajouné kon lannwit.
3 I menm kon an pyé bwa yo planté koté ki ni an pil dlo,
ki ka pòté fwi lè sézonʼy wivé,
èk fèy li pa ka fennen pyès.
Moun sala ka pwòspéwé an tout sa i ka fè.
4 Mé sé méchan-an pa kon sa pyès.
Yo menm kon pay sèk van-an ka vanté alé.
5 Sé pou sa Bondyé kay kondanné sé péchè-a,
èk yo pa kay anpami sé moun-an ki dwèt douvan Bondyé-a.
6 Bondyé Senyè-a ka pwotèkté sé moun-an ki asou chimen dwèt-la,
mé sé méchan-an ja asou chimen pou yo péwi.