Samz

1 Pa dé bon i bon pou moun-an

ki pa ka pwan konsèy sé méchan-an,

ki pa ka swiv ègzanp sé péchè-a,

ki pa ka asid ansanm èk moun ki ka pwan Bondyé sèvi widitjil.

 2 Pito i fè sa, i ka pwan plézi pou obéyi lwa Bondyé Senyè-a,

èk i ka étidyéʼy lajouné kon lannwit.

 3 I menm kon an pyé bwa yo planté koté ki ni an pil dlo,

ki ka pòté fwi lè sézonʼy wivé,

èk fèy li pa ka fennen pyès.

 4 Mé sé méchan-an pa kon sa pyès.

Yo menm kon pay sèk van-an ka vanté alé.

 5 Sé pou sa Bondyé kay kondanné sé péchè-a,

èk yo pa kay anpami sé moun-an ki dwèt douvan Bondyé-a.

 6 Bondyé Senyè-a ka pwotèkté sé moun-an ki asou chimen dwèt-la,

mé sé méchan-an ja asou chimen pou yo péwi.

2 Pouki sé nasyon latè-a ka fè plan pou yo lévé kont Bondyé?

Pouki sé moun-an ka fè konplo ki pa kay vo yo anyen?

 2 Sé wa yo-a ka lévé kont Bondyé,

sé nonm-lan ki ka kondwi-a ka asanblé ansanm

pou yo fè konplo kont Bondyé Senyè-a èk kont wa-a i chwazi-a.

 3 Yo di, “Annou kasé sé chenn-an Bondyé èk wa-a i chwazi-a mété anlè nou-an,

èk annou pa kité yo kondwi nou ankò.”

 4 Bondyé Senyè-a ki ka kondwi-a asid an syèl, i wi,

èk i pwan yo sèvi widitjil.

 5 Lè i fini, i vini faché kont yo èk i hélé dèyè yo.

I fè lapè pwan yo.

 6 Bondyé Senyè-a di, “Mwen ja établi wa-a mwen chwazi-a

asou Mòn Zayonn,* mòn-an ki pou mwen yonn-an.”

 7 Wa-a di, “Mwen kay fè zòt konnèt ki sa Bondyé Senyè-a di mwen.

I di mwen, ‘Ou sé gason mwen,

dépi jòdi-a mwen vini papaʼw.

 8 Mandé mwen, mwen kay ba ou tout sé nasyon-an pou sa ou menm.

Mwen kay ba ou tout latè-a pou pozèsyonʼw.

 9 Ou kay kwazé yo èk an baton fè,

ou kay kwazé yo an miyèt menm kon an kannawi.’ ”

10 Bon, atjwèlman mwen ka vèti zòt ki wa,

sé pou zòt ki ka kondwi an latè-a ni lakonpwann.

11 Sé pou zòt sèvi Bondyé Senyè-a èk wèspé

èk twanblé douvanʼy.

12 Sé pou zòt abésé kò zòt douvanʼy.

Si pa sa, zòt kay fèʼy faché

èk zòt kay mò sibit,

paski adan an ti mouman i sa moutwé mannyè i faché.

8 Bondyé Senyè, sé ou ki Senyè nou.

Toupatou moun gadé an latè-a yo ka wè pouvwaʼw.

 2 Manmay èk ti manmay ki ka tété ka chanté pou lévé nonʼw.

Pyès lèlmiʼw pa sa fèʼw anyen,

ou ka détwi népòt moun ki doubout kont ou.

 3 Lè mwen gadé syèl-la ou ja fè-a,

lalin-an èk sé étwal-la ou ja mété an plas yo-a,

 4 mwen di, “Ki sa lézòm yé kon sa, pouʼw ni yo an lidéʼw,

èk ki sa gason lézòm yé, pouʼw kontanʼy kon sa?”

 5 Ou mété yo an ti tak pli ba paséʼw,

ou onnowé yo èk ou ba yo pouvwa.

 6 Ou mété yo anho tout bagay.

Ou ba yo kondwi tout sa ou fè:

 7 mouton épi bèf,

èk tout bèt sovay ki an lafowé,

 8 sé jibyé-a èk sé pwéson-an,

èk tout bèt ki lanmè.

 9 Bondyé Senyè, sé ou ki Senyè nou.

Toupatou moun gadé an latè-a yo ka wè pouvwaʼw.

14 Sé kouyon-an ka di an tjè yo,

“La pa ni Bondyé.”

 2 Bondyé Senyè-a wèsté an syèl-la

èk i gadé lézòm an latè-a,

pouʼy wè si la ni pyès an yo ki ni lasajès,

pyès an yo ki ka adowéʼy.

 3 Yo tout ja pwan vyé chimen.

Yo tout mové menm mannyè.

Pa ni yonn an yo ki ka fè sa ki bon,

pa menm yonn.

 4 Bondyé Senyè-a di, “Ès sé moun-an ki ka fè méchansté-a pa konnèt anyen?

Yo ka manjé sé moun mwen-an menm kon yo ka manjé pen.

 5 Mé lapè kay pwan yo, yo kay twanblé

paski Bondyé ka édé sé moun-an ki ka obéyiʼy-la.

 6 Sé moun méchan-an vlé anpéché plan sé maléwé-a twavay,

mé sé Bondyé Senyè-a menm ki ka pwotèkté sé maléwé-a.

 7 Pa dé anvi mwen anvi wè Bondyé

sòti Zayonn pou vin sové sé moun li-an.

Sé désandan Jakòb-la kay wéjwi, sé jan Izwayèl-la kay kontan

lè Bondyé Senyè-a kay fè yo viwé doubout asou dé pyé yo ankò,

pou yo vini an nasyon ki fò.

15 Bondyé Senyè, ki moun ki sa wèsté an Kay ou?

Ki moun ki sa viv asou mòn-an ki sa ou yonn-an?

 2 Sé an moun ki ka obéyi Bondyé an tout bagay,

èk ki toujou ka fè sa ki dwèt,

èk ki toujou ka palé lavéwité-a mannyè i yé an tjèʼy.

I pa ka fè janʼy movèzté,

ni i pa ka di bagay ki pa vwé kont pwochenʼy.

 4 I pa sa sipòté sé moun-an Bondyé widjèkté-a,

mé i ka onnowé sé moun-an ki ka wèspèkté Bondyé Senyè-a.

I toujou ka fè sa i pwonmèt pou fè,

i pa mélé sa i pé koutéʼy.

 5 Lè i pwété an moun lajan,

i pa ka mandéʼy lantéwé asouʼy.

I pa ka aksèpté lajan an séwan pou manti

kont moun ki inosan.

16 Pwézèvé mwen, Bondyé,

paski sé an ou mwen ka chaché pwotèksyon.

 3 Pli gwan plézi mwen sé pou mwen toujou la épi sé moun Bondyé-a ki an péyi-a.

Sé yo ki méwité wèspé.

 4 Sé moun-an ki ka adowé lézòt bondyé-a

ka mennen twaka asou kò yo menm.

Mwen pa kay ni anyen pou fè épi sé sakwifis san-an yo ka ofè bay sé imaj sala.

Mwen pa kay menm mansyonnen non sé bondyé yo-a.

 5 Bondyé Senyè, sé ou ki tout byen mwen,

èk sé ou ki ban mwen tout sa mwen bizwen.

 6 Pòsyon-an mwen éwityé-a sé an pòsyon mwen kontan an pil.

Byen-an mwen éwityé-a bèl an pil!

 7 Mwen ka lévé non Bondyé Senyè-a, paski i ka di mwen ki chimen pou mwen pwan,

jis lannwit konsyans mwen ka di mwen ki sa pou mwen fè.

 8 Mwen toujou ka mété Bondyé Senyè-a douvan mwen.

I tou pwé, kon sa anyen pa sa jété mwen.

 9 Kon sa mwen ni tjè kontan épi mwen ka chanté,

èk anyen pa sa wivé mwen.

10 Ou pa kay kité lam mwen koté sé mò-a yé-a,

épi ou pa kay kité kò sèvant ou-a ki ka viv baʼw tousèl-la pouwi an twou-a.

11 Ou ka moutwé mwen chimen-an ki ka ban mwen lavi-a.

Ou ban mwen tjè kontan paski ou toujou la épi mwen.

19 Syèl-la ka fè moun konnèt pouvwa Bondyé.

I ka moutwé aklè twavay lanmenʼy.

 2 Chak jou ka palé konsèné pouvwa Bondyé bay lòt jou-a ki ka vini-an,

èk chak swè ka di sa i konnèt konsèné Bondyé bay lòt swè-a ki ka vini-an.

 3 Yo pa ka palé, yo pa ka di an ti mo,

ni ou pa ka tann vwa yo.

 4 Mé konmisyon sala ja alé an tout latè-a

èk moun ja tann jis an dènyé bout latè-a.

 5 Lé bonmaten i ka lévé èk i ka sòti dèwò kon an nonm ki fini mayé ka sòti an chanm li.

I kontan menm kon an nonm ki byen pawé pou alé kouwi an kous.

 6 I ka lévé an yon bout syèl-la

èk i ka twavèsé pou lòt bout-la.

Chalèʼy ka chofé asou tout bagay.

 7 Lwa Bondyé Senyè-a pawfé.

I ka viwé baʼw kouway nèf.

Ou sa mété tout apiʼw asou lésisyon Bondyé Senyè-a.

I ka bay lakonpwann pou tout moun ki pa ni.

 8 Lwa Bondyé Senyè-a bon.

Tout moun ki obéyiʼy ka ni tjè kontan.

Konmandman Bondyé Senyè-a klè,

i ka ouvè zyé moun.

 9 I bon pou moun adowé Bondyé Senyè-a èk wèspé.

Yo kay kontiné adowéʼy pou tout tan.

Jijman Bondyé Senyè-a dwèt,

yo pa ni pwéféwans.

10 Jijman Senyè-a vo plis pasé lò,

wi, plis pasé pli bon lò-a.

Yo pli dou pasé siwo myèl,

wi, pasé pli bon siwo-a ki ka koulé sòti an kasav-la.

11 Yo ka ouvè sèvèl mwen, sèvant ou,

èk lè mwen obéyi yo, mwen ka wisivwè bon bagay.

12 Ki mannyè mwen kay fè konnèt tout sé lèwè-a ki ka séwé an tjè mwen-an?

Senyè, lavé sé fòt-la mwen fè san mwen sav-la!

13 Pa kité mwen fè sé péché-a mwen ka vlé fè-a.

Pa kité yo ni pouvwa asou mwen.

Sé lè sala mwen pa kay ni tach,

sé lè sala mwen pa kay koupab anba mové péché.

14 Bondyé Senyè, mwen ka mandéʼw pou aksèpté

pawòl ki ka sòti an bouch mwen, èk lidé ki ka twavay an tèt mwen,

paski sé ou ki kayè mwen,

sé ou ki ka pwotèkté mwen!

22 Bondyé mwen, Bondyé mwen, pouki ou ja tounen doʼw anlè mwen?

Pouki ou wèsté lwen mwen kon sa

lè mwen té ka pléwé pouʼw vini édé mwen?

 2 Bondyé mwen, mwen ka kwiyéʼw lajouné,

ou pa ka wéponn.

Mwen ka kwiyéʼw òswè,

mwen pa sa menm dòmi.

 3 Mé sé ou ki wa-a ki san fòt-la ki asid asou gwan chèz-la ka kondwi-a,

wa-a sé jan Izwayèl-la ka adowé-a.

 4 Sé gwan gwanpapa lontan nou-an té mété tout konfyans yo an ou,

yo konfyéʼw èk ou délivwé yo.

 5 Yo kwiyé, èk ou délivwé yo lè yo té an danjé.

Yo mété konfyans yo an ou èk ou sové yo menm kon ou té ja di.

 6 Mé atjwèlman mwen sé pa menm an nonm ankò, mwen menm kon an vè tè.

Tout moun ka mépwizé mwen, yo ka pwan mwen pou bétiz!

 7 Tout moun ki wè mwen ka pwan mwen sèvi widitjil,

yo ka tousé né yo èk yo ka fè sin anlè mwen.

 8 Yo ka di mwen, “Ou mété tout konfyans ou an Bondyé Senyè-a,

en i pa ka délivwéʼw atjwèlman?

Si ou ka plè Bondyé kon sa,

pouki i pa ka délivwéʼw?”

 9 Mé Senyè, sété ou menm ki té tiwé mwen san danjé an bouden manman mwen,

ou pwotèkté mwen lè mwen té piti.

11 Pa wèsté lwen mwen,

paski twaka ka vini anlè mwen,

èk mwen pa ni pyèsonn pou édé mwen.

Yo fè won mwen,

menm kon towo bèf mové ki sòti an péyi Bachan.

13 Yo ka ouvè djòl yo menm kon lyon,

yo ka gwondé, yo pawé pou dévowé mwen.

14 Mwen vini fèb

menm kon dlo ki tonbé atè.

Tout zo mwen sòti an plas.

Tjè mwen menm kon bouji ki fonn.

15 Gòj mwen sèk menm kon lapousyè,

lanng mwen ka kolé anba palé mwen.

16 La ni an gany nonm méchan tout oliwon mwen.

Yo fè won mwen menm kon chyen mawon.

17 Sa mwen wèsté sé zo èk lapo.

Lèlmi mwen ka gadé, yo pa ka tiwé zyé yo anlè mwen.

18 Yo jwé gwenndé pou had mwen

èk yo sépawéʼy anpami yo.

19 Bondyé Senyè, pa wèsté lwen mwen!

Sé ou ki tout kouway mwen. Vini vit pou sa chapé mwen!

20 Délivwé mwen pou yo pa tjwé mwen èk sab-la.

Délivwé lavi mwen anba sé chyen sala.

21 Tiwé mwen anba djòl sé lyon sala.

Sové mwen anba kòn sé towo bèf mové sala.

23 “Sé pou tout moun ki ni wèspé pou Bondyé Senyè-a lévé nonʼy!

Sé pou ou ki désandan Jakòb-la onnowéʼy!

I pa ka tounen doʼy asou yo,

mé i ka wéponn lè yo kwiyéʼy pou édé yo.”

Anpami sé moun-an ki ka adowéʼw-la,

mwen kay ofè sé sakwifis-la mwen pwonmèt-la.

26 Sé maléwé-a kay manjé bouden yo wèd.

Moun ki vini adowé Bondyé Senyè-a kay lévé nonʼy.

27 Tout nasyon kay chonjé sa Bondyé Senyè-a té fè.

Toupatou an latè-a moun kay tounen vin jwenn li.

28 Sé Bondyé Senyè-a ki wa,

èk sé li ki ka kondwi sé nasyon-an.

29 Tout nonm ki ni kwéyans kay bésé tèt douvanʼy.

Tout moun ki ni pou tounen lapousyè kay bésé tèt douvanʼy.

Yon jennenwasyon kay di lòt jennenwasyon-an

konsèné Senyè-a.

31 Yo kay fè moun ki pʼòkò fèt atjwèlman konnèt mannyè Bondyé sové sé moun li-an.

Yo kay tann sé Bondyé ki fè sa.

23 Bondyé Senyè-a sé bèwjé mwen.

Mwen pa ka mantjé anyen.

 2 I ka kité mwen pozé koté zèb-la pli bèl.

I ka mennen mwen bwè koté dlo-a pli dous.

I ka mennen mwen an chimen dwèt-la,

paski sé kalité gadyenn sala i yé.

 4 Menm si mwen ka pasé an fon-an ki pli fènwè-a,

mwen pa kay pè anyen ki mové,

paski ou la épi mwen.

 5 Ou pwépawé an tab ban mwen

douvan zyé tout lèlmi mwen.

 2 I mété fondasyon latè-a ofon lanmè-a

èk i fèʼy asid asou dlo-a.

 4 Sé moun ki pa ka fè bagay ki mové,

moun ki pa ni vyé lidé.

Sé moun ki pa ka adowé imaj,

èk moun ki pa ka fè pwonmèt yo pa ka tjenn.

 7 Ouvè sé bayè-a gwan,

ouvè sé lapòt-la ki la dépi lontan-an,

pou gwan wa-a sa antwé.

 9 Ouvè sé bayè-a gwan,

ouvè sé lapòt-la ki la dépi lontan-an

pou gwan wa-a sa antwé.

 2 Lè méchan nonm ataké mwen,

èk lè lèlmi mwen pawé pou tjwé mwen,

sé yo menm ki ka twilbiché èk tonbé.

 3 Menm si an gwan kantité sòlda bawé mwen tout oliwon,

mwen pa kay pè.

Menm si yo lévé ladjè kont mwen,

mwen kay toujou ni konfyans an Bondyé.

 4 Yon bagay mwen ja mandé Bondyé Senyè-a.

Yon sèl bagay mwen vlé,

sé pou viv an Kay Bondyé Senyè-a pou tout lavi mwen,

pou mwen gadé bèlté Bondyé Senyè-a,

èk pou mwen mandéʼy pou kondwi lavi mwen.

 5 Lè twaka vini anlè mwen, i kay pwotèkté mwen lakay li.

I kay séwé mwen byen fon an Kay li,

èk i kay mété mwen anlè an kayè ki ho pou anyen pa wivé mwen.

 6 Kon sa, mwen kay genyen batay-la kont sé lèlmi-an ki tout oliwon mwen-an.

Mwen kay kwiyé fò èk tjè kontan, mwen kay ofè sakwifis an Kay li.

Mwen kay chanté, èk mwen kay glowifyé Bondyé Senyè-a.

 7 Kouté mwen Bondyé Senyè, lè mwen kwiyéʼw!

Ni mizéwikòd anlè mwen èk wéponn mwen!

Sé ou ki té toujou ka édé mwen.

Pa kité mwen, pa ladjé mwen.

10 Menm si manman mwen ében papa mwen tounen do yo anlè mwen,

Bondyé Senyè-a kay anmasé mwen.

11 Bondyé Senyè, moutwé mwen sa ou vlé mwen fè,

èk fè mwen maché adan an chimen ki dwèt,

paski mwen ni an pil lèlmi.

12 Pa ladjé mwen an lanmen lèlmi mwen.

Yo ka manti anlè mwen,

yo sòti pou ataké mwen.

13 Mwen asiwé mwen kay viv

pou mwen wè bonté Bondyé Senyè-a an lavi sala.

14 Sé pouʼw ni konfyans an Bondyé Senyè-a.

Tjenbé fò, pa pèd kouway.

32 Pa dé bon i bon pou moun-an Bondyé pawdonnen fòt li-a,

èk i pa ka gadé sé péché-a i té fè-a.

 2 Pa dé bon i bon pou moun-an Bondyé Senyè-a pa ka akizé pou movèzté-a i fè-a,

moun-an ki pa ka viv an lavi kwennad-la.

 3 Lè mwen pa konfésé péché mwen,

mwen vini mizéwab afòs mwen té ka pléwé tout lajouné.

 5 Lè sala mwen konfésé péché mwen baʼw,

mwen pa té séwéʼw movèzté mwen.

Mwen di bay kò mwen, “Mwen kay konfésé tout fòt mwen bay Bondyé Senyè-a,”

èk ou pawdonnen mwen èk ou pa pini mwen pou péché mwen.

Lè twaka ka vini anlè yo menm kon an lawivyè gwo,

i pa kay wivé anlè yo.

 7 Sé an ou mwen ka séwé.

Ou kay délivwé mwen lè mwen an twaka.

Mwen ka chanté fò pou fè moun konnèt

mannyè ou délivwé mwen.

Moun ni pou sèvi an kòd èk an bwid pou kondwi yo,

pou fè yo obéyi.”

10 Sé mové moun-an kay ni pou soufè an chay,

mé Bondyé Senyè-a kay toujou pwotèkté sé moun-an ki mété konfyans yo an li-a,

paski i enmen yo.

11 Sé pou ou ki ka viv dwèt douvan Senyè-a ni tjè kontan èk chanté

pou sa Bondyé Senyè-a ja fè baʼw.

33 Sé pou zòt tout ki dwèt fè tjè zòt kontan,

épi glowifyé Bondyé Senyè-a pou sa i ja fè.

 2 Jwé hap-la bay Bondyé Senyè-a pou diʼy mèsi.

Chanté ba li èk mizik kòd-la.

 3 Chanté an chanté nèf ba li,

jwé hap-la byen,

èk hélé fò afòs zòt kontan!

 4 Pawòl Bondyé Senyè-a vwé,

èk ou sa mété tout konfyans ou an sa i fè.

 6 Bondyé Senyè-a palé, èk syèl-la vini fèt,

i souflé, èk sé étwal-la ki an syèl-la vini fèt.

 7 I sanblé tout lanmè-a adan an sèl plas.

I mété an bòn bay lanmè-a pouʼy pa janbé.

 9 Lè i palé, latè-a té fèt.

Èk lè i konmandé, tout bagay pawèt.

10 Bondyé Senyè-a ka kwazé plan sé nasyon-an,

èk i ka anpéché yo fè sa yo ni lidé fè-a.

11 Mé plan Bondyé Senyè-a ka doubout pou tout tan.

Sa i ni lidé fè-a ka toujou fèt.

12 Pa dé bon i bon pou nasyon-an ki ni Bondyé Senyè-a pou Bondyéʼy-la.

Pa dé bon i bon pou sé moun-an i ja chwazi pou wisivwè sa i pwonmèt-la!

13 Bondyé Senyè-a wèsté an syèl-la,

i gadé anba èk i wè tout lézòm.

14 Koté i asid ka kondwi-a,

i gadé tout moun ki ka viv an latè-a.

15 Sé li ki ba yo sèvèl-la yo ni an tèt yo-a

èk i sav tout sa yo ka fè.

16 Sé pa an gwan kantité sòlda ki ka fè an wa genyen ladjè-a.

Sé pa an pil kouway ki ka fè an sòlda bat lèlmiʼy.

17 Pa kwè an chouval ladjè kay fèʼw genyen batay-la.

Tout kouway-la i ni-an pa kay chapé sòlda-a ki anlèʼy-la.

18 Mé zyé Bondyé Senyè-a asou sé moun-an ki ni wèspé pou li-a,

sé moun-an ki ka èspéyé èk tout konfyans yo an lanmityé-a i toujou ni pou yo-a.

19 I ka délivwé yo hòd lanmò,

èk i ka tjenn yo vivan lè péyi-a ni lafen.

Sé li ki ka pwotèkté nou,

sé li ki ka édé nou.

21 Nou ni tjè kontan pou sa i ja fè ban nou.

Nou ja mété tout konfyans nou an li paski sé li yonn ki Bondyé.

22 Bondyé Senyè, kité lanmityéʼw toujou wèsté épi nou,

menm kon nou ka èspéyé asouʼw èk konfyans.

34 Mwen kay toujou wimèsyé Bondyé Senyè-a.

Mwen pa kay janmen las di ki otan gwan i gwan.

 2 Mwen kay lévé non Bondyé Senyè-a pou sa i ja fè.

Sé pou tout sé moun-an yo ka pwan lavantay asou-a kouté èk fè tjè yo kontan!

 3 Annou vini ansanm pou di ki mizi gwan Bondyé Senyè-a gwan.

Annou lévé nonʼy ansanm!

 5 Sé moun-an ki mété konfyans yo an Senyè-a vin ni tjè kontan.

Yo pa kay janmen hont.

 7 Nanj Bondyé Senyè-a ka wèsté oliwon sé moun-an ki ni wèspé pou Senyè-a pou pwotèkté yo,

èk i ka délivwé yo lè yo an danjé.

 8 Gouté, èk zòt kay wè mannyè Bondyé Senyè-a bon.

Pa dé bon i bon pou tout moun i ka pwotèkté.

 9 Sé pou sé moun Bondyé Senyè-a ni wèspé pou li.

Moun ki ka wèspèktéʼy kay jwenn tout sa yo bizwen.

10 Jis sé jenn lyon-an ki ka fen paski yo ka mantjé manjé délè,

mé moun ki gadé pou Bondyé Senyè-a pa kay mantjé anyen.

11 Vini, ich mwen, èk kouté mwen,

èk mwen kay moutwé zòt mannyè pou ni wèspé pou Bondyé Senyè-a.

12 Ès ou vlé jwi lavi?

Ès ou vlé viv lontan èk tjè kontan?

13 Ében, pa palé moun mal,

èk pa manti anlè moun.

14 Tounen kont movèzté èk fè sa ki bon.

Fè kon zòt pé pou viv an lapé èk tout moun.

15 Bondyé Senyè-a toujou ka kité zyéʼy asou sé moun-an ki dwèt-la,

èk zòwèy li toujou ouvè lè yo kwiyéʼy.

16 Mé Bondyé Senyè-a kont sé moun-an ki ka fè movèzté-a,

èk apwé yo mò, pyèsonn pa ka chonjé yo ankò.

17 Lè an nonm ki dwèt kwiyé Bondyé Senyè-a, i ka kouté,

èk i ka délivwéʼy hòd tout twakaʼy.

18 Bondyé Senyè-a toujou pwé sé moun-an ki dékouwajé-a,

èk i ka sové sé moun-an ki pèd èspwa-a.

19 Nonm-lan ki dwèt-la ka pasé an pil soufwans,

mé Bondyé Senyè-a ka tiwéʼy an tout.

20 Bondyé Senyè-a ka pwotèktéʼy pou anyen pa wivéʼy.

Pa menm yonn an zoʼy ki ka kasé.

21 Movèzté kay tjwé sé méchan-an.

Sé moun-an ki hayi sé moun-an ki dwèt-la kay jwenn pinisyon.

22 Bondyé Senyè-a kay sové sé moun li-an.

I pa kay kondanné pyèsonn ki vini chaché pwotèksyon kotéʼy.

37 Pa twakasé kòʼw pou lapéti sé méchan-an.

Pa anvi sa sé mové moun-an ni.

 2 Talè yo kay dispawèt menm kon lè zèb ka sèk.

Yo kay mò menm kon pyé bwa ki ka fennen.

 3 Mété tout konfyans ou an Bondyé Senyè-a èk fè sa ki bon.

Viv an tè-a mwen ba ou-a an lapé.

 4 Pwan tout pléziʼw an Bondyé Senyè-a,

èk i kay baʼw dézi tjèʼw.

 5 Mété laviʼw an lanmen Bondyé Senyè-a.

Mété konfyans ou an li èk i kay édéʼw.

 6 I kay fè moun wè ou ka viv dwèt

menm kon klèté sòlèy lévé.

I kay fè moun wè ou ni wézon

menm kon klèté sòlèy midi.

 7 Sé pouʼw ni pasyans èk èspéyé pouʼw wè Bondyé Senyè-a twavay.

Pa twakasé kòʼw lè ou wè sé mové moun-an ka pwòspéwé,

lè ou wè tout sé vyé plan-an yo ni-an ka maché byen.

 8 Sé pa pouʼw twakasé kòʼw ében faché.

Sa kay fèʼw fè movèzté.

 9 Sé moun-an ki mété konfyans yo an Bondyé Senyè-a kay éwityé tè-a Bondyé té pwonmèt yo-a,

mé Bondyé kay kouwi dèyè sé méchan-an sòti an tè-a.

10 Sé méchan-an kay dispawèt touswit.

Ou kay las gadé pou yo, mé ou pa kay menm jwenn yo.

11 Mé moun ki ka abésé kò yo kay éwityé tè-a Bondyé té pwonmèt yo-a.

Yo kay pwan plézi an kantité lapé-a yo kay ni-an.

12 Méchan-an ka fè konplo kont nonm-lan ki dwèt-la.

I ka gadéʼy, i ka anvi manjéʼy.

13 Mé Bondyé Senyè-a ka wi sé méchan nonm-lan,

paski i kay koupé asou lavi yo.

14 Sé méchan-an ka hédi fèman yo èk yo ka pliyé bannza yo

pou sa tjwé sé maléwé-a èk sé moun-an ki bizwen-an,

pou fini èk sé moun-an ki ka fè sa ki dwèt-la.

15 Mé sé an tjè yo menm fèman yo kay antwé,

èk bannza yo kay kasé.

16 Ti tak-la nonm-lan ki dwèt-la ni-an

vo plis pasé sé wichès-la tout sé méchan-an ni-an,

17 paski Bondyé Senyè-a kay kasé pouvwa sé méchan-an,

mé i kay sipòté sé moun-an ki dwèt-la.

18 Bondyé Senyè-a ka otjipé sé moun-an ki san fòt-la,

èk tè-a kay sa yo pou tout tan.

19 Yo pa kay hont lè bagay vini mové.

Yo kay ni plis pasé yo sa manjé lè lafen tonbé an péyi-a.

20 Mé sé méchan-an kay mò.

Lèlmi Bondyé Senyè-a kay dispawèt menm kon sé bèl flè-a ki an savann-an.

21 Sé méchan-an ka pwété èk yo pa ka wimèt viwé,

mé nonm-lan ki dwèt-la ni bon tjè, i toujou ka bay.

22 Sé moun-an Bondyé Senyè-a benni-an kay éwityé tè-a Bondyé té pwonmèt yo-a,

mé i kay kouwi dèyè sé sa i modi-a.

23 Bondyé Senyè-a ka moutwé an nonm ki chimen pouʼy pwan

èk i ka pwotèkté sé moun-an ki ka plèʼy-la.

24 Si yo mantjé an so, yo pa kay tonbé,

paski Bondyé Senyè-a ka ba yo lanmen.

25 Mwen té jenn, èk atjwèlman mwen ja gwan,

mé mwen pa janmen wè Bondyé tounen doʼy asou nonm-lan ki dwèt-la,

ni mwen pa janmen wè ich li ka mandé lachawité.

26 Nonm sala donnan, i ka pwété lézòt moun,

èk ich li sé an bennédiksyon.

27 Tounen kont movèzté èk fè sa ki bon,

èk désandanʼw kay toujou viv an tè-a Bondyé té pwonmèt-la.

28 Paski Bondyé Senyè-a enmen sa ki dwèt

èk i pa ka tounen doʼy asou sé moun li-an.

I ka pwotèkté yo tout tan,

mé i kay kouwi dèyè ich sé méchan-an sòti an tè-a.

29 Sé moun-an ki dwèt-la kay éwityé tè-a Bondyé té pwonmèt yo-a,

èk yo kay viv adanʼy pou tout tan.

30 An nonm ki dwèt ni lasajès.

Sé bon pawòl tousèl ki ka sòti an bouch li.

31 I ka tjenbé lwa Bondyé an tjèʼy,

èk pyéʼy pa ka janmen kité bon chimen-an.

32 Nonm méchan-an ka véyé nonm-lan ki dwèt-la

èk i ka chaché mannyè pou tjwéʼy.

33 Mé Bondyé Senyè-a pa kay ladjéʼy an lanmen lèlmiʼy,

ni i pa kay kité yo kondannéʼy lè i lodyans.

34 Èspéyé èk konfyans asou Bondyé Senyè-a èk obéyi konmandmanʼy.

I kay onnowéʼw, i kay baʼw tè-a,

35 Mwen té konnèt an nonm méchan

ki té ka pwan lavantay asou lòt moun.

36 Mé apwé sa lè mwen pasé, i pa té la.

Mwen gadé pou li, mé mwen pa wèʼy pyès koté.

37 Gadé nonm-lan ki bon èk dwèt-la, gadé mannyè i ka viv.

An nonm ki ni lapé an tjèʼy ka ni an pil désandan.

38 Mé moun-an ki ka kasé lwa Bondyé-a kay dispawèt nèt,

èk pyèsonn pa kay wè désandanʼy.

39 Bondyé Senyè-a ka sové nonm-lan ki dwèt-la

èk i ka pwotèktéʼy lè twaka vini anlèʼy.

I ka tiwéʼy anba lanmen sé méchan-an èk i ka sovéʼy,

paski sé an li i ka vini chaché pwotèksyon.

42 Menm kon an zannimo anvi bwè dlo,

sé menm kon sa lam mwen anviʼw, Bondyé.

3 Lé swè kon lajouné,

sé dlo zyé mwen ki ka sèvi mwen manjé.

 4 Tjè mwen ka fè mwen mal lè mwen chonjé tan avan,

lè mwen té ka alé èk tout sé moun-an an Kay Bondyé-a.

Sé mwen ki té ka douvan lè nou té ka maché alé.

An latilyé moun té ka fè fèt,

nou té ka andjélé, nou té ka chanté pou glowifyé Bondyé.

Mwen kay èspéyé èk konfyans an Bondyé,

èk mwen kay viwé glowifyéʼy,

paski sé li ki ka édé mwen, sé li ki Bondyé mwen.

 6 Tjè mwen ka fè mwen mal,

sé pou sa mwen ka chonjé bontéʼw.

Mwen la bò Lawivyè Jouden-an,

bò Mòn Hèmonn-an èk Mòn Miza-a.

 7 Lanmè-a ka woulé,

yon lanm ka kwiyé lòt-la.

Twaka ka kouvè mwen

menm kon lanm ka sòti an lanmè-a.

 8 Lajouné Bondyé Senyè-a ka moutwé mwen mannyè i toujou enmen mwen,

èk lé swè mwen ka chanté an chanté ba li.

Pouki ou ka kité mwen soufè kon sa

anba sé méchansté sé lèlmi mwen-an?”

10 Mwen ka santi zo mwen ka kwazé lè sé lèlmi mwen-an ka motjé mwen

èk chak lè yo ka mandé mwen,

Mwen kay èspéyé èk konfyans an Bondyé,

èk mwen kay viwé glowifyéʼy,

paski sé li ki ka édé mwen, sé li ki Bondyé mwen.

43 Bondyé, ban mwen jistis kont sé moun-an ki pa konnèt ou-a.

Fè tout moun wè mannyè mwen inosan.

Pouki ou ka kité mwen soufè kon sa

anba sé méchansté sé lèlmi mwen-an?

Kité yo kondwi mwen viwé asou Mòn Zayonn, mòn-an ki sa ou yonn-an,

koté Kay ou yé-a.

 4 Lè sala mwen kay alé bò lotèl ou, Bondyé.

Sé ou ki ka ban mwen tjè kontan.

Mwen kay èspéyé èk konfyans an Bondyé,

èk mwen kay viwé glowifyéʼy,

paski sé li ki ka sové mwen, sé li ki Bondyé mwen.

3 Bouklé sab ou an wenʼw, gwan wa.

Ou ni pouvwa èk moun ka onnowéʼw.

 4 Mouté kawòs ou, gwan wa. Alé goumen

pou fè défans tout sa ki vwé èk dwèt.

 5 Sé flèch-la ou ka voyé-a filé an pil,

yo ka pèsé tjè lèlmiʼw,

èk sé nasyon-an kay tonbé an pyéʼw.

 6 Gouvèdman-an Bondyé ja ba ou-a kay doubout pou tout tan èk pou tout tan.

Ou ka sèvi baton wa-a pou kondwi sé moun ou-an san pwéféwans.

Sé pou sa Bondyé ki Bondyéʼw-la ja chwaziʼw

épi i ja baʼw tjè kontan

pasé pyès lòt wa.

 8 Had ou ni lòdè losyon ki fèt èk lanmi*, lalwé èk kas.

Yo ka jwé mizik baʼw pou fè tjèʼw djé,

an bèl kay ou-a ki dékowé èk pik léfan-an.

Épi wenn-an doubout an plas lonnè-a asou lanmen dwèt ou

épi an pil lò anlèʼy ki sòti an péyi Ofir.

10 Ou ki ni pou mayé èk wa-a, kouté sa mwen ka di-a.

Sé pouʼw obliyé moun péyiʼw èk tout fanmiʼw ki lakay papaʼw.

11 Bèltéʼw ki kay fè wa-a plézi.

Sé li ki mèt ou, kon sa ou ni pou obéyiʼy.

12 Jan péyi Taya kay mennen an pil kado baʼw.

Moun ki wich kay vini flatéʼw pou favèʼw.

13 Pwennsès-la abiyé an chanm li — pa dé bèl i bèl!

Had li fèt épi fil ki fèt an lò.

15 Yo ka antwé an kay wa-a

èvèk lajwa èk kontantman an tjè yo.

pou pwan plas ou,

èk ou kay mété yo kondwi tout latè-a.

46 Sé Bondyé ki tout kouway nou,

sé li ki ka pwotèkté nou.

 2 Menm si latè-a soukwé,

épi sé mòn-an tonbé désann ofon lanmè-a,

nou pa kay pè.

3 Menm si lanmè-a gwondé èk tjimé,

épi sé ti mòn-an soukwé lè lanmè-a fwapé anlè yo,

nou pa kay pè.

 4 La ni an lawivyè ki ka mennen lajwa an vil Bondyé-a,

plas-la koté Bondyé ki pa ni pyès anhoʼy-la ka wèsté-a, plas-la ki sa li yonn-an.

 6 Sé nasyon-an ka fè kwi afòs yo pè, gouvèdman yo ka tonbé.

Bondyé palé kon an kout loway èk latè-a fonn.

 7 Bondyé Senyè-a ki ni tout pouvwa-a la épi nou.

Sé Bondyé Jakòb-la ki ka pwotèkté nou.

 8 Vini wè sa Bondyé Senyè-a ja fè,

bagay ki ja fè jan latè-a wèsté bouch gwan ouvè.

i ka kasé sé bannza-a, i ka détwi sé pitjèt fè-a yo ka sèvi pou goumen-an,

èk i ka bwilé sé kawòs ladjè-a.

Sé mwen ki anho tout sé nasyon-an

èk sé mwen ki anho tout latè-a.”

11 Bondyé Senyè-a ki ni tout pouvwa-a la épi nou.

Sé Bondyé Jakòb-la ki ka pwotèkté nou.

 2 Lavé tout movèzté mwen byen,

èk nétwayé tout péché mwen!

3 Mwen konnèt fòt mwen,

èk péché mwen toujou asou konsyans mwen.

 4 Mwen ja péché kont ou, èk sé kont ou yonn mwen ja péché,

èk sé douvanʼw menm mwen fè movèzté sala.

Kon sa ou ni wézon lè ou pasé jijman asou mwen,

èk ou byen jijé lè ou kondanné mwen.

 5 Mwen ni péché an tjè mwen dépi lè mwen fèt,

èk mwen ni movèzté andidan mwen dépi lè mwen té fòmé an bouden manman mwen.

 6 Ou enmen moun ki ka di lavéwité-a mannyè i yé an tjè yo,

kon sa plen lidé mwen èk lasajès ou.

 7 Tiwé péché mwen èk an bwanch hisòp,* èk mwen kay vini nèt.

Lavé mwen, èk mwen kay vini blan pasé koton.

 8 Plen tjè mwen èk lajwa, épi ban mwen tjè kontan.

Magwé ou ja kwazé zo mwen, ou kay viwé fè mwen ni tjè kontan ankò.

 9 Tiwé péché mwen pou ou pa wè yo ankò,

èk éfasi tout méchansté mwen.

10 Kwé an tjè nèt andidan mwen, Bondyé.

Ban mwen an lèspwi nèf ki kay fè mwen swiv ou.

11 Pa kouwi dèyè mwen sòti douvanʼw,

èk pa pwan Lèspwiʼw viwé.

12 Viwé ban mwen menm lajwa-a mwen té ni lè ou té sové mwen-an,

èk fè mwen pawé pou mwen sa obéyiʼw.

13 Sé lè sala mwen kay sa moutwé sé péchè-a chimenʼw,

èk yo kay tounen viwé vin jwenn ou.

14 Pawdonnen mwen pou san moun mwen mété dèwò, Bondyé, èk sové mwen,

èk mwen kay di moun ki otan bon ou bon.

15 Mété pawòl ou an bouch mwen, Senyè,

èk mwen kay glowifyéʼw.

16 Si ou té kay pwan plézi an sakwifis, mwen té kay ofèʼy baʼw,

mé ou pa mélé èk zannimo yo bwilé baʼw.

17 Sakwifis ki ka fèʼw plézi, Bondyé, sé lè an moun abésé kòʼy douvanʼw.

Ou pa kay tounen doʼw asou an moun ki abésé kòʼy èk ki wépantiʼy pou sa i ja fè.

18 Bondyé, fè an pil byen bay Zayonn paski ou ni bon tjè.

Viwé bati bawad wòch ho-a oliwon Jérouzalèm.

19 Épi sé lè sala ou kay pwan plézi an sakwifis-la ou mandé-a,

lè yo bwilé zannimo tou antyè èk lézòt kado yo ofè baʼw,

èk yo kay sa ofè sakwifis towo bèf asou lotèl ou-a.

Tout kò mwen bizwenʼw,

menm kon an tè sèk an tan sòlèy ki pa ka jwenn dlo.

 2 Kité mwen wèʼw an Kay ou-a.

Kité mwen wè pouvwaʼw èk bèltéʼw.

3 Lanmityé-a ou toujou ni pou nou-an pli mèyè pasé lavi,

kon sa mwen kay glowifyéʼw.

 4 Mwen kay wimèsyéʼw tout lavi mwen,

mwen kay lévé lanmen mwen anlè lè mwen ka pwédyé.

 5 Lam mwen kay satisfè, menm kon an moun ki manjé adan an gwan fèt.

Mwen kay chanté èk tjè kontan pou glowifyéʼw.

 6 Lè mwen kouché asou kouch mwen, mwen ka chonjéʼw,

tout swè-a mwen ka katjilé asouʼw,

 7 paski sé ou ki toujou ka édé mwen.

Lè mwen anba zèl ou, mwen ka chanté èk tjè kontan.

 8 Mwen ka tjenbéʼw fò,

èk lanmen dwèt ou ka pwotèkté mwen.

 9 Mé sé moun-an ki vlé détwi lavi mwen-an

kay désann anba latè-a koté sé mò-a yé-a.

10 Yo kay mò an ladjè,

épi bèt sovay kay manjé kò yo.

Tout moun ki fè pwonmèt an non Bondyé kay glowifyé Bondyé,

mé Bondyé kay fèmé bouch sé mantè-a.

67 Bondyé, ni mizéwikòd asou nou èk benni nou.

Voyé bontéʼw asou nou,

 2 pou tout latè-a konnèt sa ou vlé yo fè,

pou tout nasyon konnèt sé ou ki sa sové yo.

3 Sé pou tout moun glowifyéʼw, Bondyé.

Sé pou tout moun glowifyéʼw!

 4 Sé pou tout sé nasyon latè-a chanté afòs yo kontan,

paski ou ka jijé sé moun-an san pwéféwans,

épi ou ka kondwi tout nasyon ki asou latè-a.

 5 Sé pou tout moun glowifyéʼw, Bondyé.

Sé pou tout moun glowifyéʼw!

 6 Tè-a ja pwodwi wékòt li.

Bondyé ki Bondyé-a nou ka adowé-a ja benni nou.

 7 Bondyé ja benni nou.

Sé pou tout moun toupatou wèspèktéʼy.

84 Pa dé bèl Kay ou bèl, Bondyé Senyè,

ou ki ni tout pouvwa-a!

 2 Mwen anvi alé lakay ou.

Dézi tjè mwen sé pou wèsté an Kay ou, Bondyé Senyè.

Mwen ka chanté épi tout tjè mwen

afòs Bondyé-a ki vivan-an ban mwen lajwa.

3 Jis sé sikwiyé-a ki ka jwenn koté pou yo wèsté la,

èk sé pijon-an ka fè nich

pou yo fè piti yo bò lotèl ou, Bondyé Senyè-a ki ni tout pouvwa-a.

 5 Pa dé bon i bon pou sé moun-an ou ka bay fòs-la,

sé moun-an ki ka kontan pou maché lonng lawout-la pou alé Mòn Zayonn-an.

 6 Kon yo ka pasé an fon sèk-la yo ka kwiyé Baka-a,

i ka vini an plas ki ni an pil sous dlo,

akwèdi pwèmyé lapli-a ka bay an bennédiksyon.

 7 Sé moun sala ka ni pli kouway kon yo ka maché alé.

Yo ka alé Zayonn pou pwézanté kò yo douvan Bondyé.

 8 Tann lapwiyè mwen, Bondyé Senyè-a ki ni tout pouvwa-a.

Panché tèt ou èk kouté mwen, Bondyé Jakòb-la.

 9 Bondyé, gadé wa-a ki ka pwotèkté nou-an.

Sé li ki wa-a ou ja chwazi-a.

10 Yon jou an Kay ou

pli mèyè pasé yon mil lézòt jou an lòt koté.

Mwen simyé wèsté an pa lapòt Kay Bondyé-a

pasé pou mwen wèsté an kay sé méchan-an.

11 Sé Bondyé Senyè-a ki klèté nou, sé li ki ka pwotèkté nou.

I ka voyé bontéʼy asou nou èk i ka onnowé nou.

12 Pa dé bon i bon pou sé moun-an ki mété konfyans yo an ou-a,

Bondyé Senyè-a ki ni tout pouvwa-a!

90 Senyè, sé ou ki ka pwotèkté nou

pou tout tan.

 2 Dépi avan ou fè sé mòn-an,

èk avan ou fè latè-a èk tout sa ki andidanʼy,

ou té toujou Bondyé èk ou kay toujou Bondyé pou tout tan.

 4 Yon mil lanné pa anyen pou ou, i

menm kon yè ki pasé,

i menm kon yon ti nèditan an lannwit-la.

 5 Ou ka fè lavi lézòm bout sibitman,

ou ka fè yo pasé menm kon yon wèv,

menm kon zèb ki ka lévé lé bonmaten,

 6 zèb ki fléwi bèl,

mé tan pou sòlèy kouché i ka fennen èk i ka mò.

 7 Lè ou an kòlè, sé détwi ou ka détwi nou.

Lè ou faché, nou ka pè.

 8 Ou ja mété movèzté nou douvanʼw,

jis sé péché-a nou ka fè an séwan-an ou mété koté pou wè.

 9 Ou ka koupé asou lavi nou afòs ou faché.

Avan nou pwan an ti lisouf, lavi nou ja fini.

10 Swasant dis (70) lanné sé tout nou ni pou viv.

Si nou ni bon santé, nou kay wivé katwiven (80),

mé sé épi an pil twaka èk mizè.

Talè lavi nou ka bout èk nou ka fini nèt.

12 Fè nou konnèt ki otan kout lavi nou kout,

pou nou sa ni lasajès Bondyé an tjè nou.

14 Voyé lanmityé-a ou toujou ni-an asou nou toulé bonmaten,

pou nou sa chanté èk pou ni tjè kontan tout lavi nou.

15 Atjwèlman, ban nou menm otan tjè kontan kon soufwans nou té ni

pou tout sé tan-an nou té an mizè-a.

16 Kité nou, sé sèvant ou-a, wè gwan twavay ou,

kité désandan nou wè ki otan pouvwa èk klèté ou ni.

17 Bondyé Senyè nou, nou ka mandéʼw pou voyé bontéʼw asou nou.

Fè nou pwòspéwé an tout sa nou ka fè.

91 Moun-an ki chaché pwotèksyon koté Bondyé-a ki anho tout lézòt-la,

moun-an ki wèsté anba zèl Bondyé-a ki ni tout pouvwa-a,

 2 ka di Bondyé Senyè-a,

“Sé ou ki ka fè défans mwen, sé ou ki ka pwotèkté mwen.

3 I kay délivwéʼw pouʼw pa pwi an zatwap,

i pa kay kité sé vyé maladi-a ki ka tjwé moun-an vini anlèʼw.

 4 I kay kouvèʼw anba zèl li menm kon an manman poul,

i kay pwotèktéʼw pou anyen pa wivéʼw.

 5 Ou pa bizwen pè anyen ki ka fèt lannwit,

ni lè lèlmi-an ataké lajouné,

 6 ni sé mové maladi-a ki ka tonbé asou moun lé swè-a,

ni sé movèzté-a ki ka tjwé moun gwan midi-a.

 7 Yon mil moun pé mò asou fasad gòch ou,

épi dis mil pé tonbé asou fasad dwèt ou,

mé sé malè sala pa kay tonbé anlèʼw.

 8 Ou menm kay gadé èk ou kay wè

mannyè pinisyon ka tonbé asou sé nonm méchan-an.

 9 Ou aksèpté Bondyé Senyè-a pou défans ou,

èk Bondyé ki anho tout lézòt-la pou pwotèktéʼw,

10 kon sa pyès movèzté pa kay wivé asouʼw,

pyès malè pa kay wivé bò kay ou.

11 Bondyé kay konmandé sé nanj li-a pou yo véyéʼw,

yo kay pwotèktéʼw koté ou pasé.

12 Yo kay pòtéʼw an lanmen yo,

épi pa menm pyéʼw yo kay kité konyen asou an wòch.

13 Ou kay maché asou lyon èk sèpan,

ou kay pilonnen jis jenn lyon èk sèpan.

14 Senyè-a di, “Mwen kay délivwé moun ki enmen mwen,

èk mwen kay pwotèkté moun ki konnèt mwen kon Bondyé yo.

15 Lè yo kwiyé, mwen kay wéponn,

mwen kay la épi yo lè twaka vini anlè yo.

16 Mwen kay satisfè yo èk lonng lavi,

mwen kay fè yo wè mannyè mwen ka sové yo.”

 2 Annou vini douvanʼy èk wimèsyéʼy,

annou chanté fò èk tjè kontan pou glowifyéʼy.

3 Paski Bondyé Senyè-a sé an Bondyé ki ni an pil pouvwa,

i sé an gwan wa ki anho tout sé lézòt bondyé-a.

 4 Sé li ki ka kondwi tout latè-a,

dépi koté-a ki pli fon-an pou wivé anlè mòn-an ki pli ho-a.

 5 Lanmè-a sé sa li paski sé li ki fèʼy,

èk i fòmé tè-a èk lanmenʼy menm.

 6 Vini èk annou tonbé an pyéʼy èk adowéʼy,

annou ajounou an pyé Bondyé Senyè-a ki fè nou-an!

 7 Sé li ki Bondyé nou,

nou sé moun li, sé li ki ka otjipé nou

menm kon mouton ki an savann li.

Kouté jòdi-a ki sa i ka di, i di,

 8 “Sé pa pou zòt fè tèt wèd kon gwan gwanpapa lontan zòt té fè lè yo té Mèriba,

kon yo té fè jou sala bò gwan savann sèk Masa-a.

 9 Lè sala, yo tanté mwen pou yo té wè si mwen té kay fè sa mwen té di-a,

magwé yo té ja wè tout sa mwen té ja fè ba yo.

‘Zòt pa kay janmen antwé an tè-a

koté mwen té kay mennen zòt pozé-a.’ ”

3 Fè sé nasyon-an konnèt pouvwaʼy,

èk fè moun konnèt tout gwan twavay i ja fè.

 5 Sé bondyé-a sé nasyon-an ka adowé-a sé imaj,

mé sé Bondyé Senyè-a ki fè syèl-la.

 6 Moun ki vini douvanʼy ka wè gwandèʼy èk lonnèʼy,

yo ka wè pouvwa Senyè-a èk bèltéʼy an Kay li.

 7 Sé pou tout moun ki an latè-a glowifyé Bondyé Senyè-a,

sé pou yo lévé nonʼy pou pouvwaʼy èk fòs li.

 9 Adowé Bondyé Senyè-a ki pa ni fòt-la lè i pawèt,

sé pou tout latè-a twanblé douvanʼy.

11 Sé pou syèl-la kontan èk kité latè-a wéjwi.

Kité lanmè-a èk tout sa ki andidanʼy fè dézòd afòs yo kontan.

12 Sé pou savann-an èk tout sa ki andidanʼy kontan.

Sé pyé bwa-a ki an lafowé-a kay chanté afòs yo kontan,

13 paski Bondyé Senyè-a ka vini!

I ka vini pou jijé latè-a.

I kay jijé sé jan latè-a èk jistis

èk sé nasyon-an san pwéféwans.

 4 Wimèsyéʼy kon ou ka antwé an bayè-a,

glowifyéʼy kon ou ka antwé an lakou-a.

 5 Bondyé Senyè-a bon,

i enmen nou pou tout tan,

èk i toujou ka tjenn pwonmèt li pou tout jennenwasyon.

103 Kité mwen glowifyé Bondyé Senyè-a èk tout lam mwen!

Sé pou tout sa mwen ni andidan mwen glowifyé non Senyè-a ki pa ni pyès fòt-la.

 2 Kité mwen glowifyé Bondyé Senyè-a èk tout lam mwen,

mwen pa kay obliyé tout sé bon bagay-la i ja fè-a.

3 I ka pawdonnen tout movèzté mwen,

i ka djéwi tout maladi mwen.

 4 I ka chapé mwen sòti an djòl lanmò

èk i ka benni mwen èk mizéwikòd li èk lanmityé-a i toujou ni pou mwen-an.

 5 I ka voyé bontéʼy asou mwen tout lavi mwen,

kon sa mwen ka wèsté jenn èk fò menm kon an malfini.

 6 Bondyé Senyè-a ka jijé an favè sé moun-an yo ka pwan lavantay asou-a

èk i pa ka vòlè wézon yo.

 7 I fè Moziz konnèt sa i té ni plan pou fè,

èk i fè sé Manmay Izwayèl-la wè gwan twavay li.

 8 Bondyé Senyè-a ni mizéwikòd èk lagwas,

i pa ka faché vit, èk tjèʼy toujou plen lanmityé.

 9 I pa ka pwi dèyè nou tout lè,

ni i pa ka wèsté faché pou tout tan.

10 I pa ka pini nou kon i sipozé pini nou,

ni i pa ka ban nou jijman-an nou méwité-a pou péché èk movèzté nou.

11 Menm hòtè ou ka wè syèl-la anho latè-a,

sé menm mannyè-a i toujou ni lanmityé pou sé moun-an ki ka wèspèktéʼy-la.

12 Menm kon koté sòlèy-la ka lévé-a lwen koté i ka kouché-a,

sé menm otan lwen i ja jété fòt nou.

13 Menm kon an papa ka twété manmay li byen,

sé menm mannyè-a Bondyé Senyè-a ka twété sé moun-an ki ka wèspèktéʼy-la.

14 I konnèt èk ki sa nou fèt,

i pa ka obliyé nou sé lapousyè.

15 Lavi nou sé menm kon zèb-la.

Nou ka pwofité èk nou ka vini bèl kon an flè ki an savann-an,

16 mé kon an ti van vantéʼy, i ka dispawèt

èk pyèsonn pa ka wèʼy ankò.

17 Mé Bondyé Senyè-a ka toujou enmen sé moun-an ki ka wèspèktéʼy-la,

èk bontéʼy ka diwé pou tout jennenwasyon

18 asou moun ki ka tjenn agwémanʼy

èk ki ka obéyi konmandmanʼy èk tout tjè yo.

19 Bondyé Senyè-a mété gwan chèz li an syèl,

sé li ki wa-a ki ka kondwi tout bagay-la.

20 Glowifyé Bondyé Senyè-a, zòt nanj ki ni pouvwa,

ki ka obéyi konmandmanʼy,

ki ka fè tout sa Senyè-a di.

21 Glowifyé Bondyé Senyè-a, zòt sòlda syèl-la,

zòt sèvant li ki ka fè tout sa i vlé!

22 Sé pou tout sa Bondyé Senyè-a fè glowifyéʼy

toupatou koté i ka kondwi.

 2 èk ou ni klèté anlèʼw menm kon an had.

Ou ouvè syèl-la anho latè-a menm kon an tant,

3 èk ou fè kay ou jis pli ho pasé sé nwaj lapli-a.

Ou ka sèvi sé nwaj-la menm kon kawòs ou,

èk van-an ka pòtéʼw alé koté ou vlé.

 4 Ou ka sèvi van-an kon konmisyonnèʼw,

èk zéklè-a kon sèvant ou.

 5 Ou mété latè-a doubout fò asou fondasyonʼy,

èk anyen pa sa janmen soukwéʼy.

 6 Ou mété lanmè-a kouvèʼy menm kon an had,

èk dlo-a té ka kouvè sé mòn-an.

 7 Lè ou hélé dèyè dlo-a, i pati alé.

Lè i tann vwaʼw kon loway, i mété kouwi.

 8 Dlo-a filé désann mòn-an alé an fon-an,

i alé an plas-la ou pwépawé ba li-a.

 9 Ou mété an bòn ba li pouʼy pa sa janmen pasé,

pou anpéchéʼy kouvè latè-a ankò.

10 Ou fè sé sous dlo-a koulé désann an sé fon-an,

èk ou fè sé lawivyè-a kouwi désann an fant sé mòn-an.

11 Sé an yo bèt mawon ka bwè dlo,

sé adan yo bouwik mawon ka bwè lè yo swèf.

12 Sé jibyé-a ka fè nich yo èk yo ka chanté

an sé pyé bwa-a ki bò dlo-a.

13 Ou ka wèsté an syèl-la èk ou ka fè lapli tonbé asou sé mòn-an,

ou ka plen latè-a épi bennédiksyonʼw.

14 Ou ka fè zèb lévé bay sé bèf-la

èk ou ka fè plan lévé pou moun sa sèvi

pou yo sa planté jaden yo

15 èk pou yo sa fè diven pou fè tjè yo djé,

épi lwil doliv pou fè fidji yo kléwé,

èk manjé pou ba yo kouway.

16 Sé pyé bwadnò Lèbannonn-an ka jwenn an chay lapli,

yo sé sa Bondyé Senyè-a, sé li menm ki planté yo.

17 Sé jibyé-a ka fè nich yo adan,

èk sé kayal-la ni nich yo asou tèt sé pyé onflen-an.

18 Sé kabwit mawon-an ka wèsté asou tèt sé mòn-an ki ho-a,

èk sé mannikou-a ka séwé an sé twou kayè-a.

19 Ou fè lalin-an pou moutwé ki tan chak mwa ka koumansé,

épi sòlèy-la konnèt ki lè pouʼy kouché.

20 Sé ou ki fè nwit-la, èk lè sòlèy kouché,

tout bèt an bwa ka sòti dèwò.

21 Sé jenn lyon-an ka gwondé paditan yo ka chaché manjé,

manjé-a Bondyé menm ka ba yo-a.

22 Lè sòlèy lévé, yo ka alé

kouché an twou yo.

23 Moun ka alé fè twavay yo,

yo ka twavay pou jis lè sòlèy kouché.

25 La ni lanmè-a ki gwan èk fon-an,

la ni bèt nou pa sa menm konté ka viv adanʼy,

gwo kon piti.

26 Sé batiman-an ka navidjé anlèʼy, èk bèt-la yo ka kwiyé Léviyatan-an* ka jwé andidanʼy.

Sé ou menm ki fè gwo bèt sala.

27 Yo tout ka dépan anlèʼw

pou ba yo manjé lè yo bizwenʼy.

28 Ou ka ba yo manjé èk yo ka manjéʼy,

bouden yo ka plen èk bon manjé-a ou ba yo-a.

lè ou pwan lisouf-la ou ba yo-a, yo ka mò

èk yo ka viwé tounen lapousyè.

30 Mé lè ou ba yo lisouf, yo ka viv.

Ou ka viwé bay latè-a an fidji nèf.

32 I ka gadé latè-a èk latè-a ka koumansé twanblé,

i ka touché mòn-an èk lafimen ka sòti adanʼy.

33 Mwen kay chanté bay Bondyé Senyè-a tout lavi mwen.

Tout tan mwen ka viv mwen kay chanté pou glowifyé Bondyé mwen-an.

35 Sé pou tout moun ki ka fè péché an latè-a dispawèt,

sé pou sé méchan-an fini nèt.

i diʼy, “Asid asou lanmen dwèt mwen

jis tan mwen fè lèlmiʼw tounen an ti ban pou mété pyéʼw.”

3 Jou-a ou kay goumen èk sé lèlmiʼw-lan,

tout sé moun ou-an kay vin édéʼw.

Menm kon séwen ka tonbé bonnè bonmaten,

sé kon sa sé jenn nonm ou-an kay vini jwenn ou asou sé mòn-an ki sa ou yonn-an.

I di, “Ou sé an pwèt pou tout tan,

an pwèt menm kon Mèlkizidèk.”

 5 Senyè-a doubout asou lanmen dwèt ou.

Lè i faché, i kay kwazé sé wa-a.

 6 I kay pasé jijman asou sé nasyon-an,

la kay ni moun mò yonn asou lòt.

 2 Soukou mwen ka sòti an lanmen Bondyé Senyè-a

ki fè latè èk syèl-la.

 4 Zyé moun-an ki ka véyé sé jan Izwayèl-la

pa ka fèmé ni i pa ka dòmi.

 6 Kon sa, lajouné sòlèy-la pa kay bat ou,

ni lalin-an pa kay fèʼw ditò lé swè.

 8 Bondyé Senyè-a kay pwotèktéʼw ni lè ou ka sòti ni lè ou ka antwé,

dépi apwézan èk pou tout tan.

 2 Atjwèlman nou wivé la,

nou doubout andidan bayè-a an Jérouzalèm!

3 Jérouzalèm sé an vil yo byen bati,

an vil koté tout bagay byen wanjé.

 4 Sé la tout sé bwanch fanmi-an ka vini,

tout sé bwanch fanmi Izwayèl-la.

Yo ka vini pou yo wimèsyé Bondyé Senyè-a,

menm kon i té konmandé yo.

 5 Sé an Jérouzalèm tout sé désandan Wa David-la

asid pou jijé sé moun-an.

 6 Sé pou zòt pwédyé pou vil Jérouzalèm sa ni lapé.

Mandé Bondyé pou fè tout moun ki enmen Jérouzalèm pwòspéwé.

 7 Mandé Bondyé pou la toujou ni lapé andidan bawad-la ki oliwonʼw-lan,

èk pou tout moun ki an kay wa-a viv san twaka.

 9 Pou lapéti Kay Bondyé Senyè-a ki Bondyé nou-an,

mwen ka pwédyé pouʼy pwòspéwé.

127 Si sé pa Bondyé Senyè-a ki bati kay-la,

twavay sé moun-an ki ka batiʼy-la pa vo anyen.

Si sé pa Bondyé Senyè-a ki pwotèkté vil-la,

twavay sé moun-an ki ka véyéʼy-la pa vo anyen.

 2 I pa ka voʼw anyen pouʼw lévé bonnè èk alé dòmi ta,

ka twavay wèd pouʼw viv.

Paski lè Bondyé enmen an moun,

i ka ba li tout sa i bizwen paditan i ka dòmi.

3 Manmay sé an kado Bondyé Senyè-a baʼw,

yo sé an bennédiksyon.

 4 Sé gason-an yon nonm fè paditan i jenn-an

sé menm kon flèch ki an lanmen an sòlda.

I pa kay hont

lè i ka dispité èk lèlmiʼy an bayè vil-la.

 2 Tann lè mwen ka kwiyéʼw, Mèt mwen,

èk kouté lè mwen ka mandéʼw pou édé mwen!

3 Si ou té ka ékwi tout péché nou, Bondyé Senyè,

kilès ki té kay sa chapé anba kondannasyonʼw?

 4 Mé ou ka pawdonnen nou,

pou nou sa adowéʼw èk wèspé.

 5 Mwen ka èspéyé èk tout lam mwen pou Bondyé Senyè-a vin édé mwen,

èk mwen ka mété tout konfyans mwen an pawòl li.

 6 Mwen ka èspéyé pou Bondyé Senyè-a èk tout lam mwen,

plis pasé lè an gad ka véyé pou sòlèy lévé,

wi, plis pasé an gad ka èspéyé jou ouvè.

 7 Sé pou sé jan Izwayèl-la èspéyé èk tout konfyans yo an Bondyé Senyè-a,

paski Bondyé Senyè-a toujou enmen yo

èk i toujou pawé pou sové yo.

 8 Sé li ki kay sové sé jan Izwayèl-la

hòd tout movèzté yo.

139 Bondyé Senyè, ou ja ègzanminé mwen

èk ou konnèt mwen.

 2 Ou konnèt lè mwen asid èk lè mwen lévé,

byen lwen koté ou yé-a ou konnèt tout sa ki ka pasé an lidé mwen.

3 Ou konnèt tout sa mwen ka fè,

ou konnèt lè mwen lévé èk lè mwen kouché.

 4 Avan pawòl-la menm sòti an bouch mwen, Bondyé Senyè,

ou ja konnèt sa mwen kay di-a.

 5 Ou ni dèyè mwen ni douvan mwen,

èk lanmenʼw ka pwotèkté mwen.

 7 Koté mwen sa alé pou lèspwiʼw pa jwenn mwen?

Koté mwen sa kouwi pouʼw pa la èk mwen?

 8 Si mwen mouté an syèl, ou la,

si mwen kouché koté sé mò-a yé-a, ou la tou.

 9 Si mwen volé alé koté sòlèy-la ka lévé-a,

épi si mwen wèsté an bout lanmè-a koté sòlèy-la ka kouché-a,

10 jis la lanmenʼw kay kondwi mwen,

èk lanmen dwèt ou kay sipòté mwen.

12 pa menm nwèsè-a ki nwèsè pou ou.

Fènwè-a ka kléwé menm kon lajouné pou ou.

Nwèsè èk klèté pa ni diféwans pou ou.

13 Sé ou ki fòmé tout sa ki andidan mwen,

ou byen pentwi mwen an bouden manman mwen.

15 Ou té konnèt tout zo mwen,

dépi lè ou fòmé mwen an sigwé,

lè ou byen wanjé mwen an bouden manman mwen.

16 Ou té ja wè mwen avan mwen té fèt.

Tan-an ou té ban mwen pou viv-la

té ja ékwi an liv ou

avan tan sala té koumansé.

Tiwé kòʼw bò mwen, débann nonm ki ka mété san moun dèwò!

20 Yo ka malpaléʼw,

yo ka ensilté nonʼw.

21 Bondyé Senyè, pa dé hayi mwen hayi sé moun-an ki hayiʼw-la!

Mwen pa sa wè sé moun-an ki ka lévé kont ou-a!

22 Mwen hayi yo èk tout tjè mwen,

mwen ka gadé yo kon lèlmi mwen.

24 Gadé si mwen ni pyès movèzté andidan mwen,

èk kondwi mwen an chimen-an ki la pou tout tan-an.