Yon Konmisyon Pou Pawan:

Kon an pawan, san dout ou enmen ich ou. Ou vlé édé yo enmen Jéhova èk dèdiké lavi yo pou li. Ki sa ou sa fè pou pwépawé yo pou batenm? Ki lè yo kay pawé pou fè gwan disizyon sala pou batizé?

Jézi té di sé disip li-a: “Alé toupatou épi pwéché bay sé moun-an pou yo sa vini disip mwen, épi batizé yo.” (Mafyou 28:19) Silon vèwsé sala, avan an moun batizé I nésésè pou moun sala vini an disip. An disip pa ka annèk konpwann èben enmen sa Jézi enstwi, mé osi, an disip ka fè sa Jézi té di. Sa sé an bagay jis jenn manmay sa fè.

Pawan, ou sipozé an bon ègzanp bay ich ou èk fè pawòl Bondyé antwé an tjè yo. (Dito. 6:6-9) Pou édé pawòl Bondyé antwé tjè ich ou, sèvi sé liv-la Sa Nou Sa Apwann An Bib-la​—Sé Wézimé-a èk How to Remain in God’s Love. Si ou sèvi sé dé liv sala, sa kay édé yo apwann lavéwité-a. I kay édé yo wézonnen asou pwensip ki an Bib-la èk osi pou sèvi sé pwensip sala an lavi yo. Édé ich ou pou èspliké sa yo konpwann an Bib-la an pawòl yo menm. (1 Pita 3:15) Nòlaj-la èk ankouwajman-an ou bay yo èk sa yo wisivwè hòd létid pèsonnèl yo sa édé yo pou kwalifyé pou batenm. Osi, yo sa twapé nòlaj èk ankouwajman hòd létid fanmi-an, sé mitin-lan, èk bon asosiyasyon. Tout sa kay édé yo pou kontiné fè pwogwé jis apwé batenm. Alò, toujou édé ich ou pou kontiné katjilé konsèné mannyè yo sa vansé pli pwé Jéhova.

Pwovèb 20:11 ka di: “Ou sa jis konnèt an manmay pa aksyon’y, I sa moutwé si kondwit li bon èk dwèt.” Si an manmay ja vini an disip Jézi Kwi èk I pawé pou batenm, ki kalité atitid I kay ni?

An manmay ki ka fè pwogwé pou batizé sipozé obéyi pawan’y. (Twav. 5:29; Kòl. 3:20) Lè Jézi té ni 12 lanné, Bib-la di konsèné’y: “I té ka obéyi yo [pawan’y].” (Louk 2:51) Kanmenm, ou sav ich ou pa pawfé. Mé an manmay ki vlé batizé kay éséyé swiv ègzanp Jézi, èk moun kay konnèt li kon an zanfan ki ka obéyi pawan’y.

I kay osi moutwé I entéwésé pou apwann lavéwité-a. (Louk 2:46) Ès zanfan’w vlé atandé mitin èk patisipé? (Sam 122:1) Ès I enmen li Bib-la èk ès I ka fè létid pèsonnèl wèglé?​—Maf. 4:4.

An manmay ki ka fè pwogwé pou batenm ka mété lantéwé Wéyòm-lan pwèmyé an lavi’y. (Maf. 6:33) I ka patajé lafwa’y épi lézòt moun. I ka patisipé an diféwan fason an minis-la èk I pa hont pou di sé titja’y-la èk jan lékòl li I sé an Témwen Jéhova. I ka pwan asaynman’y pou mitin-lan diwan simenn-lan byen sèwyé.

Ti manmay sala pa ka swiv mové konpany paski I vlé wèsté nèt mowalman. (Pwov. 13:20; 1 Kòr. 15:33) I ka moutwé I vlé wèsté nèt mowalman an chwa’y lè’y vini pou: mizik, pòtwé, vidiyo gémz, pwogwanm I ka gadé asou télévizyon, èk mannyè I ka sèvi intannèt-la.

An chay manmay ja moutwé yo apwésyé éfò pawan yo. Sé manmay sala té fè lavéwité-a sa yo, èk yo té kwalifyé pou batenm menm si yo té jenn. Jéhova kay benni’w kon ou éséyé pou édé ich ou kwalifyé pou batenm pou yo sa vansé pli pwé Jéhova.

Yon Konmisyon Pou An Pwoklanmatè Ki P’òkò Batizé:

I vwéman sé an pwivilaj pou wann sèvis an kongwigasyon-an kon an pwoklanmatè ki p’òkò batizé. Nou vlé aplodi’w pou pwogwé-a ou ja fè an sèvis Bondyé. Létid Bib ou édé’w pou vini konnèt Bondyé. Ou ja moutwé ou ni lafwa an sé pwonmèt Bondyé-a.​—Jan 17:3; Hib. 11:6.

Avan ou té koumansé étidyé épi Témwen Jéhova pitèt ou té adan an diféwan wilizyon, èben pitèt ou pa té adan pyès wilizyon. Pitèt ou té ka fè bagay ki pa té ka dakò épi pwensip Bib. Mé ou moutwé lafwa’w lè ou wépanti, sa vlé di ou wigwété tout sa ou té fè avan ki pa té bon. Osi, ou moutwé lafwa’w lè ou tounen hòd péché’w, sa vlé di ou doubout fè sa ki pa bon èk ou koumansé fè sa ki dwèt.​—Twav. 3:19.

Pitèt ou té lévé an lavéwité-a, èk sa pwotéjé’w hòd mové kondwit èk anpéché’w fè péché ki gwav. (2 Tim. 3:15) Ou apwann mannyè pou wézisté mové enflouwans èk lòt tantasyon pou fè sa ki mové an zyé Jéhova. Ou moutwé lafwa lè ou chwazi pou sipòté adowasyon ki vwé èk ou patajé sa ou ka kwè adan épi lézòt. Ou ja twapé bon étwennman an minis-la èk ou té fè disizyon’w pou wann sèvis kon an pwoklanmatè ki p’òkò batizé.

Ki ou lévé an lavéwité-a ki ou vini konnèt Jéhova pli ta an lavi’w, ou pitèt ka katjilé konsèné dèdikasyon èk batenm apwézan. Ou ka fè an dèdikasyon bay Jéhova lè’w pwonmèt Jéhova an lapwiyè ou kay adowé’y tousèl pou tout tan. (Maf. 16:24) Pou moutwé ou dèdiké lavi’w bay Jéhova, ou kay batizé an dlò. (Maf. 28:19, 20) Lè ou dèdiké lavi’w bay Jéhova èk ou batizé, ou kay vini yon sèvant Jéhova apwenté. Sa sé an bèl pwivilaj èk an gwan lonnè!

Kon ou té apwann an létid ou, ou pé èspéyansé difikilté. Mé chonjé, touswit apwé Jézi batizé, “Lèspwi Bondyé mennen Jézi an hòtè pou Denmou té tanté’y.” (Maf. 4:1) Kon sa, apwé ou batizé kon an disip Jézi ou sa èkspèkté pli tès. (Jan 15:20) Yo kay vini an diféwan mannyè. Ou pé jwenn òpozisyon hòd fanmi’w. (Maf. 10:36) Osi, jan ou té ni avan, moun ou ka twavay épi, èben jik moun ou ka alé lékòl épi pé pwan’w sèvi widitjil. Mé toujou chonjé sa Jézi té di an Mak 10:29, 30: “Mwen ka di’w lavéwité, pyès moun ki ja kité kay li ében sésé’y ében manman’y ében papa’y ében ich li ében tè’y pou lapéti mwen épi Bon Nouvèl-la kay wisivwè yon san fwa pli an tan sala. I kay wisivwè pli kay, fwè, sésé, manman, manmay épi tè—èk épi yo I kay jwenn an chay pèsikasyon, épi an tan pou vini-an, lavi étonnèl.” Alò, kontiné fè tout sa ou pé pou wèsté pwé Jéhova èk pou swiv tout wèg li.

Si ou vlé batizé, di koòdinatè sé ansyen-an. Sé ansyen-an kay sèvi sé kwèsyon-an an ti liv sala pou détèminé si ou kwalifyé pou batenm. Ou pé koumansé wivizé sé kwèsyon sala pa kò’w.

Pou pwépawé pou sé diskasyon-an sé ansyen-an kay ni épi’w, pwan tan pou li èk mèdité asou sé lévanjil-la ki sité. Si ou vlé, ou sa matjé bagay ou vlé chonjé an ti liv sala, èben ou sa matjé’y an lòt koté. Ou sa sèvi sé nòt-la ou matjé-a èk ti liv sala padan diskasyon’w épi sé ansyen-an. Si ou ni difikilté épi népòt kwèsyon, ou sa mandé moun-lan ki ka étidyé Bib-la épi’w, èben ou sa mandé sé ansyen-an pou èd.

Lè ou ka diskité sé kwèsyon-an épi sé ansyen-an, pa santi konmsi ou ni pou bay wépons ki lonng èben konpliké. I pli mèyè pou wéponn adan an mannyè ki senp, kout èk an pawòl ou menm. Lè ou ka wéponn adan sé kwèsyon-an, I bon pou mansyonnen yonn èben dé lévanjil ki ka sipòté wépons ou.

Si ou p’òkò ni asé nòlaj konsèné sa Bib-la ka enstwi, sé ansyen-an kay awanjé pou an moun asisté’w konpwann sé lévanjil-la pli mèyè. Sa kay édé’w pou èspityé sé lévanjil-la an pawòl ou menm èk pou ou sa kwalifyé pou batenm pli ta.

[Nòt pou sé ansyen-an: Ou kay twapé sé diwèksyon-an pou lè ou ka ni sé diskasyon-an épi moun ki vlé batizé asou paj 54-59.]