Ki Moun Bondyé Yé?

1. Pou ki sa nou sipozé adowé Bondyé?

Bondyé sé Kwéyatè tout bagay. I pa té ni pyès koumansman èk pa kay janmen ni an finisman. (Sam 90:2) Sé li ki Sous bon nouvèl-la ki an Bib-la. (1 Timòfi 1:11) Paski Bondyé ban nou lavi, sé li yonn nou sipozé adowé.​—Li Wévélasyon 4:11.

2. Ki kalité moun Bondyé yé?

Pyèsonn p’òkò janmen wè Bondyé paski I sé an Lèspwi, sa vlé di fòm lavi’y pli ho pasé tout moun ki ka viv asou latè. (Jan 1:18; 4:24) Kanmenm, nou sa vini konpwann ki kalité moun Bondyé yé lè nou gadé sé bagay-la I ja fè-a. Pa ègzanp, diféwan kalité fwi èk flè ka di nou konsèné lanmityé’y èk lasajès li. Gwòsè inivès-la ka di nou konsèné pouvwa’y.​—Li Ronm 1:20.

Nou sa apwann pli konsèné kawaktè Bondyé lè nou li Bib-la. Pa ègzanp, I ka di nou sa Bondyé enmen èk sa I pa enmen, mannyè I ka twété moun, èk mannyè I ka aji an diféwan sitiwasyon.​—Li Sam 103:​7-10.

3. Ès Bondyé ni an non?

Jézi di: “Papa nou ki an syèl, sé pou ou sanngtifyé non’w.” (Mafyou 6:9) Magwé Bondyé ni plizyè tit, I ni yon sèl non. An chak langaj, yo ni an mannyè pou pwononsé non sala. An Kwéyòl, nou ka di “Jéhova” èben “Jihova”. Mé adan moun ka di “Yawé.”​—Li Sam 83:18.

Yo ja tiwé non Bondyé an plizyè Bib èk mété tit kon Senyè ében Bondyé pou wiplasé’y. Mé lè yo ékwi Bib-la, non Bondyé té ékwi adan’y apipwé 7,000 fwa. Jézi fè moun konnèt non Bondyé lè I té enstwi yo konsèné Bondyé.​—Li Jan 17:26.

Gadé vidéyo-a Ès Bondyé Ni An Non?

4. Ès Bondyé konsèné épi nou?

Paski an chay moun ka soufè, ès sa vlé di Jéhova pa konsèné épi nou? Adan moun di I ka fè nou soufè pou’y tèsté nou, mé sa pa vwé.​—Li Jémz 1:13.

Bondyé dignifyé lézòm épi léchanlib. Ès nou pa ka apwésyé libèté nou pou chwazi pou adowé Bondyé? (Jòchwa 24:15) Mé an chay moun ka chwazi pou fè lòt moun movèzté, kon sa an pil moun ka soufè. I ka fè Jéhova lapenn pou wè sé kalité pasdwa sala.​—Li Jennésis 6:5, 6.

Jéhova sé an Bondyé ki konsèné épi nou. I vlé nou jwi lavi. Touswit I kay tiwé soufwans èk tout sé moun-an ki ka annékòz soufwans-lan. An menm di tan, I ni an bon wézon pou kité soufwans kontiné pou an tan. Nou kay apwann wézon sala an Lison 8.​—Li 2 Pita 2:9; 3:7, 13.

5. Ki mannyè nou sa vansé pli pwé Bondyé?

Jéhova ka envité nou pou palé ba li an lapwiyè pou nou vansé pwé’y. I entéwésé an nou chak. (Sam 65:2; 145:18) I pawé pou pawdonnen. Jéhova ka wè éfò nou ka fè pou plè’y, menm si délè nou pa ka éwisi. Kon sa, magwé nou pa pawfé, nou sa vwéman ni an bon wilasyon épi Bondyé.​—Li Sam 103:​12-14; Jémz 4:8.

Paski Jéhova ban nou lavi, nou sipozé enmen’y pli pasé pyès lòt moun. (Mak 12:30) Pli ou apwann konsèné Bondyé èk ou fè sa I mandé, sé pli ou kay moutwé lanmityé’w ba li èk pli ou kay vansé pwé’y.​—Li 1 Timòfi 2:4; 1 Jan 5:3.