Ki Mannyè Ou Sa Vansé Pwé Bondyé?

1. Ès Bondyé ka kouté tout lapwiyè?

Bondyé ka envité moun an tout nasyon pou vansé pwé’y an lapwiyè. (Sam 65:2) Mé, I pa ka kouté, ében aksèpté tout lapwiyè. Pa ègzanp, si an nonm ka maltwété madanm li, sa pé jennen lapwiyè’y. (1 Pita 3:7) Osi, lè jan Izwayèl kontiné fè sa ki mové, Bondyé wifizé kouté lapwiyè yo. Alò, I a klè lapwiyè sé an pwivilaj. Kanmenm, Bondyé kay jis aksèpté lapwiyè moun ki fè gwo péché si yo wépanti.​—Li Izaya 1:15; 55:7.

Gadé vidéyo-a Ès Bondyé Ka Kouté Tout Lapwiyè?

2. Ki mannyè nou sipozé pwédyé?

Lapwiyè sé yon mannyè nou ka adowé Bondyé, kon sa nou sipozé pwédyé sèlman bay Jéhova, Kwéyatè nou. (Mafyou 4:10; 6:9) Osi, paski nou pa pawfé, nou sipozé pwédyé an non Jézi paski I mò pou péché nou. (Jan 14:6) Jéhova pa vlé nou wépété lapwiyè nou apwann pa tjè ében pou wépété lapwiyè moun ékwi. I vlé lapwiyè nou sòti an tjè nou.​—Li Mafyou 6:7; Filipay 4:6, 7.

Kwéyatè nou sa jis tann lapwiyè nou di an silans. (1 Sanmyèl 1:12, 13) I ka envité nou pou pwédyé népòt lè, tèl kon an koumansman jouné-a, lé swè, lè nou ka manjé, èk lè nou ni pwòblenm.​—Li Sam 55:22; Mafyou 15:36.

3. Pou ki wézon Kwityen ka jwenn ansanm?

I pa ézé pou vansé pwé Bondyé paski nou ka viv anpami moun ki pa ni lafwa an Bondyé èk ki ka pwan pwonmèt Bondyé konsèné lapé asou latè sèvi wizib. (2 Timòfi 3:1, 4; 2 Pita 3:3, 13) Kon sa nou bizwen asosiyé épi Kwityen kon nou menm pou jwenn ankouwajman èk yo menm bizwen ankouwajman nou osi.​—Li Hibrou 10:24, 25.

Lè nou asosiyé épi moun ki enmen Bondyé, sa kay édé nou vansé pwé Bondyé. Mitin Témwen Jéhova ka potjiwé bon lokazyon pou nou jwenn bennéfis an lafwa lézòt.​—Li Ronm 1:11, 12.

4. Ki mannyè ou sa vansé pwé Bondyé?

Ou sa vansé pwé Jéhova lè ou mèdité asou sa ou ja apwann an Pawòl li. Katjilé fon asou sa I ja fè, asou konsèy I ja bay, èk asou pwonmèt l ja fè. Lapwiyè èk mèditasyon ka ogoumanté apwésiyasyon an tjè nou pou lanmityé Bondyé épi pou lasajès li.​—Li Jòchwa 1:8; Sam 1:​1-3.

Ou sa vansé pwé Bondyé sèlman si ou ni konfyans an li, si ou ni lafwa an li. Mé lafwa sé menm kon an bagay ki vivan èk ki bizwen nouwiti. Pou’w sa toujou nouwi lafwa’w ou ni pou kontiné wéfléchi asou sé wézon-an pou sa ou kwè-a.​—Li Mafyou 4:4; Hibrou 11:1, 6.

5. Ki bennéfis ou kay jwenn lè ou vansé pwé Bondyé?

Jéhova konsèné épi moun ki enmen’y. I sa pwotéjé yo kont népòt bagay ki sa donmajé lafwa yo èk èspwa yo pou lavi étonnèl. (Sam 91:1, 2, 7-10) I ka vèti nou kont tout bagay ki sa mété santé nou an danjé èk ki sa fè nou pèd lajwa nou. Jéhova ka enstwi nou pli mèyè mannyè-a pou nou viv.​—Li Sam 73:27, 28; Jémz 4:4, 8.