I Vin Faché Èk I Tjwé Fwè’y

Apwé Bondyé fè Adanm épi Èv kité jaden Édenn, yo té fè an chay ich. Non pwèmyé gason yo sété Kén èvèk non dézyenm gason yo sété Ébèl. Kén té ka fè jaden èk Ébèl té ka gadé apwé mouton.

Yon jou, Kén èk Ébèl té ofè Jéhova an lofwann. Ès ou sav sa an lofwann yé? Ében an lofwann sé an kalité kado spésyal nou ka bay Bondyé. Lofwann Ébèl té fè Jéhova kontan, mé i pa té kontan épi lofwann Kén. Sa té fè Kén faché toubonnman. Kon sa Jéhova vèti Kén. I di’y si’y pa pwan gad, faché sala i faché-a, kay fè’y fè an bagay ki byen mové. Mé Kén pa té kouté Bondyé.

Pito sa, Kén di Ébèl: ‘Ann’ an jaden-an épi mwen.’ Padan yo dé-a té an jaden-an, Kén ataké fwè’y èk i tjwé’y. Ki sa Jéhova fè Kén pou sa? Ében Jéhova pini’y. I voyé Kén wèsté byen lwen fanmi’y. Kén pa té kay sa janmen viwé.

Alò ki lison nou sa apwann an sa? Ann’ di bagay pa maché mannyè nou kwè yo sipozé maché. Si nou santi nou ka vin faché, ében lòt moun vèti nou pas yo wè nou faché, ki sa nou sipozé fè? Ében nou sipozé chanjé atitid nou vitman èk bésé kòlè nou. Si nou fè sa, sa kay anpéché nou fè an bagay ki pa bon.

Ébèl té enmen Jéhova èk i té fè sa ki dwèt. Kon sa Jéhova kay toujou chonjé’y. Lè Bondyé fè latè-a an pawadi, i kay wésisité Ébèl.