Chonjé Sa Ki Wivé Madanm Lòt

Lòt té ka wété épi tonton’y, Abrahanm, an péyi Kénann. Apwé an tan, Abrahanm èk Lòt té ni an gwan kantité zannimo. Yo té ni tèlman zannimo la pa té ni asé lè pou yo tout. Kon sa Abrahanm di Lòt: ‘Plas-la pa gwan asé pou nou dé-a. Alò, chwazi ki koté ou vlé alé. Si’w alé pa isi-a, mwen menm kay alé pa la.’ Ou tann sa? Abrahanm pa té gadé pou kò’y tousèl. Sa sété an bon bagay Abrahanm té fè, ès pa?

Lòt gadé owon èk i wè an bèl tjò tè tou pwé an vil yo ka kwiyé Sòdonm. Plas-la té ni an chay dlo èk an chay zèb. Alò, Lòt chwazi plas sala pou li èk fanmi’y ay wété.

La té ni an vil tou pwé Sòdonm yo té ka kwiyé Gomòra. Jan toulé dé vil sala té mové toubonnman. Anfen, sé moun-nan té si tèlman mové Jéhova di i kay détwi toulé dé vil-la. Mé Bondyé té vlé sové Lòt èk fanmi’y. Kon sa i voyé dé nanj pou vèti yo. Sé nanj-lan di yo: ‘Annou! Fè vit! Kité vil sala paski Jéhova kay détwi’y.’

Mé Lòt pa té kité la menm. I té la ka tadé. Alò sé nanj-lan pwan Lòt, madanm li, èk dé fi’y-la pa lanmen èk yo halé yo sòti an vil-la. Sé nanj-lan di yo: ‘Kouwi pou chapé lavi zòt! Pa gadé dèyè! Si zòt gadé dèyè, zòt kay mò!’

Tan yo wivé adan an vil yo té ka kwiyé Zowa, Jéhova vidé difé èk souf asou Sòdonm èk Gomòra menm kon lapli. Dé vil-la bwilé nèt. Lòt èk sé fi’y-la pa mò paski yo té obéyi Jéhova. Kanmenm, madanm Lòt dézobéyi Jéhova èk i gadé dèyè. A kòz di sa i tounen sèl! Sa oblijé té kasé tjè Lòt èk sé dé fi’y-la. Mé yo menm té byen kontan yo té fè sa Jéhova di.