Bouwik Balanm Palé

Jan Izwayèl té ja an savann sèk-la pou pwèskè kawant «40» lanné. Yo té ni laviktwa asou plizyè vil. Apwézan yo kanpé bò péyi Mowab, tou pwé Lawivyè Jouden-an. Èk lè-a té vini pou yo antwé an péyi-a Bondyé té pwonmèt yo-a. Kon sa Balak, wa Mowab, té pè jan Izwayèl té kay pwan péyi’y an lanmen’y osi. Sé sa ki fè Balak envité an nonm yo ka kwiyé Balanm, pou vin Mowab pou modi jan Izwayèl.

Mé Jéhova di Balanm: ‘Pa modi jan Izwayèl.’ Alò Balanm pa alé Mowab. Kon sa Wa Balak voyé kwiyé Balanm ankò èk kou sala i pwonmèt pou ba li népòt sa i vlé. Mé Balanm wifizé alé toujou. Apwé sa Bondyé di’y: ‘Ou sa alé, mé sé sèlman sa mwen kay di’w-la, ou ni pou di.’

Balanm mouté bouwik li èk i pati ay Mowab. Antansyon’y sété pou modi jan Izwayèl menm si Jéhova té di’y pa fè’y. Nanj Jéhova té pawèt asou chimen-an twa «3» fwa. Balanm pa té sa wè nanj-lan, mé bouwik-la té sa wè’y. Pwèmyé fwa-a bouwik-la wè nanj-lan, i kité chimen-an èk i antwé adan an jaden. Dézyenm fwa-a, bouwik-la kwensté kò’y asou an pak wòch. Sa fè pyé Balanm pijé asou pak-la. Finalman, bouwik-la kouché anmitan chimen-an. Chak fwa, Balanm té ka bat bouwik-la épi an baton.

Apwé twazyenm kou-a, Jéhova fè bouwik-la palé. Bouwik-la mandé Balanm: ‘Poutji ou ka bat mwen kon sa?’ Balanm wéponn: ‘Ou fè mwen gadé kon an gwo kouyon. Si mwen té ni an sab, mwen té ja fin tjwé’w.’ Bouwik-la di’y: ‘Ou ka mouté mwen pou konmen lanné, ès mwen janmen twété’w kon sa?’

Apwé sa Jéhova fè Balanm wè nanj-lan èk nanj-lan di’y: ‘Ès Jéhova pa té di’w pa modi Izwayèl?’ Balanm di: ‘Mwen ni tò. N’ay viyé lakay mwen.’ Mé nanj-lan di’y: ‘Ou sa alé Mowab, mé sé sèl sa Jéhova vlé’w di, pou’w di.’

Ès Balanm té apwann an lison an sa? Non. Apwé sa, Balanm éséyé modi jan Izwayèl ankò. I éséyé twa «3» fwa, mé chak fwa, Jéhova fè’y benni yo pito. Alafen, nasyon Izwayèl goumen kont Mowab, èk yo tjwé Balanm. Ès ou pa kwè i té kay pli bon si Balanm té kouté Jéhova dépi an koumansman?