David Épi Golayèf

Jéhova di Sanmyèl: ‘Alé lakay Jèsi, paski mwen chwazi yonn an sé gason’y-lan pou vini lòt wa-a an Izwayèl.’ Konsa Sanmyèl alé. Lè’y wivé èk i wè pli gwan gason Jèsi, i di an tjè’y: ‘Oblijé sé jenn nonm sala Jéhova chwazi pou vini wa.’ Mé Jéhova di Sanmyèl, ‘Sé pa sala mwen chwazi, paskè mwen ka wè sa ki andidan tjè an moun, pa sèlman mannyè yo ka pawèt déwò.’

Apwé sa, Jèsi mennen sis «6» lòt gason’y yonn dèyè lòt pou Sanmyèl wè. Mé Sanmyèl di’y: ‘Jéhova pa chwazi pyès di yo. Ou pa ni pyès lòt gason?’ Jèsi di: ‘Mwen ni yon gason ankò. Pli jenn-lan. Sé li sèlman ou p’òkò wè. I pa la paskè i ka gadé apwé sé mouton-an.’ Konsa Sanmyèl di Jèsi: ‘Voyé on moun kwiyé’y.’ Non gason sala sété David, èk i sété on bèl ti boug ki té ni bèl zyé, èk ti lapo’y té wòz. Lè David wivé, Jéhova di Sanmyèl: ‘Lévé, èk vidé lwil asou tèt li, paski sé li mwen chwazi.’ Konsa Sanmyèl vidé lwil asou tèt David, pou annonté’y kon wa an Izwayèl.

Tjèk tan apwé sa, jan Izwayèl té ka goumen ladjè épi sé Filistin-lan. Mé sé Filistin-lan té ni on majò sòlda yo té ka kwiyé Golayèf, an lawmé yo. Kon Golayèf sala té gwo, sé kon sa i té ho. Osi, i té ni fòs ki té èstòdinè. Èk i té ka gaskonnen jan Izwayèl touléjou. I té ka di yo: ‘Voyé on nonm ki sa goumen épi mwen. Si’y bat mwen, nou kay vini èslav zòt. Mé si mwen bat li, zòt kay vini èslav nou.’

Bon, David té ni twa «3» fwè ki té sòlda, èk yo té an lawmé Izwayèl. Konsa papa David di’y: ‘Pwan on ti manjé pou’w mennen bay sé fwè’w-la épi chèf sé sòlda-a, èk alé wè ki mannyè yo yé pou’w pòté nouvèl yo ban mwen.’ Konsa, David pwan manjé-a èk i alé. Lè’y wivé koté lawmé Izwayèl té yé ka goumen ladjè-a, Golayèf vini ka gaskonnen jan Izwayèl kon lakoutim. Lè sala, tout sé nonm Izwayèl-la pitjé kouwi, paskè yo té tèlman pè Golayèf. Mé David di: ‘Mwen kay goumen épi’y.’ Lè Wa Sòl tann sa, i di David: ‘Mé ou sé on jenn ti boug toujou. Ki mannyè ou kay sa goumen épi majò sòlda sala?’ David di’y: ‘Jéhova kay édé mwen.’

Konsa, Sòl pwan had-la li menm ka sèvi pou pwotéjé kò’y lè’y ka goumen ladjè, èk i mété’y asou David. I mété kastò’y asou tèt David, èk i bay David sab li. Mé David pa té abitwé épi tout sé bagay sala, konsa i di Sòl: ‘Mwen pa sa alé goumen épi sé bagay sala asou mwen.’ Lè sala, David tiwé had-la épi tout sé bagay-la Sòl té ba’y-la. Apwé sa, i pwan katapòl li, i alé bò an ti lawivyè, èk i anmasé senk «5» ti wòch. I mété sé ti wòch-la andidan on ti sak i té ni, èk i kouwi alé pou’y goumen épi Golayèf. Lè Golayèf wè David ka vini épi ti katapòl li, i di David: ‘Tibway! Ès ou kwè mwen sé on chyen, ou ka vini douvan mwen épi ti baton’w? Wi, vini pou mwen fè sé jibyé-a èk bèt sovay manjé’w.’ Mé David pa té pè. I di Golayèf: ‘Ou ka vini épi sab ou èk pitjèt fè’w, mé mwen ka vini an non Jéhova, paskè sé pa épi nou ou ka goumen, sé épi Bondyé. Èk tout moun isi-a kay wè, Jéhova ni pli pouvwa pasé sab-la èk pitjèt fè-a. I kay ladjé zòt tout an lanmen nou jòdi-a menm.’

Lè sala, David mété on ti wòch an katapòl li, èk i voyé wòch-la épi tout fòs li. Épi èd Jéhova, ti wòch-la antwé an fon Golayèf. Èk Golayèf tonbé atè-a wèd. Lè sé Filistin-lan wè Golayèf mò, yo pitjé kouwi pou sové lavi yo. Wi, David té ni an chay konfyans an Jéhova. Ès ou ni menm kalité konfyans sala an Jéhova?