Yo Pini An Wenn Méchan

Yon jou, Wa Éhab té ka asid bò finèt kay li an vil Jèzwiyèl. Padan’y té la, i wè jaden wézen yon nonm yo té ka kwiyé Nébòf. Pa dé vlé Éhab té vlé jaden wézen sala. Kon sa i mandé Nébòf pou vann jaden-an ba li. Mé Nébòf wifizé vann jaden-an. Pouki? Paski silon Lwa Jéhova, moun pa té sipozé vann tè yo éwityé. Mé ès Éhab té wèspèkté Nébòf pas i té vlé fè sa ki dwèt? Non. Okontwè, Éhab té byen faché. I té tèlman faché i pa té ka kité chanm li èk i pa té ka menm manjé.

Jèzibèl, madanm Éhab, sété an wenn méchan. I di Éhab: ‘Pa ou ki wa Izwayèl? Ou sa ni népòt sa ou vlé. Pa anbété kò’w. N’ay fè’w jwenn jaden sala.’ Kon sa, Jèzibèl ékwi sé nonm-lan ki té ni lotowité an vil-la èk i di yo: ‘Manti asou Nébòf. Di i kwiyé malédiksyon asou Bondyé. Èk ba li kout wòch jis tan i mò.’ Sé nonm-lan fè menm sa Jèzibèl di yo pou fè. Apwé sa Jèzibèl di Éhab: ‘Nébòf ja mò. Jaden-an sé sa ou.’

Jèzibèl té ja tjwé plizyè lòt moun inosan apa di Nébòf. I té ja tjwé an pil moun ki té enmen Jéhova. I té ka adowé idòl èk i té ka fè an chay lòt mové bagay. Mé Jéhova té ka wè tout movèzté-a Jèzibèl té ka fè. Ki sa Jéhova té kay fè épi wenn méchan sala?

Apwé lanmò Éhab, gason’y Joranm vini wa. Jéhova voyé an nonm yo té ka kwiyé Jiyou pou pini Jèzibèl èk fanmi’y.

Jiyou mouté kawòs li èk i alé Jèzwiyèl ko Jèzibèl té ka wété. Lè Joranm vin sav Jiyou té ka vini, i mouté kawòs li pou ay jwenn li. Joranm mandé Jiyou: ‘Ba’ay bon épi nou?’ Jiyou wéponn: ‘Bagay pa kay janmen bon tout tan manman’w Jèzibèl, ka fè mové bagay.’ Joranm éséyé tounen kawòs li pou chapé kò’y. Mé avan’y té sa pati, Jiyou té ni chans tjwé’y.

Apwé sa Jiyou alé lakay Wenn Jèzibèl. Lè Jèzibèl apwann Jiyou té ka vini, i ay wanjé chivé’y èk pentiwé fidji’y. Lè’y fini, i mouté bò an finèt pou èspéyé Jiyou. Lè Jiyou wivé, Jèzibèl pòté hadyès ba li. Jiyou di sé sèvant-lan ki té ka doubout a koté Jèzibèl: ‘Jété’y désann!’ Yo jété Jèzibèl dèwò pa finèt-la, i tonbé atè, èk i mò.

Apwé sa, Jiyou fè yo tjwé swasant dis «70» gason Éhab. Apa di sa, i tiwé tout bagay ki té ni pou fè épi adowasyon Bal an péyi-a. Sa ka moutwé Jéhova konnèt tout bagay èk lè lè-a wivé, i ka pini moun ki ka fè movèzté.