Jéhova Pwotéjé Jézi

La té ni on péyi ki té toupwé Izwayèl, asou koté sòlèy lévan. Èk sé moun-lan ki té ka wèsté an péyi sala té ka kwè, sé étwal-la té sa djidé yo. Yon swè, déotwa nonm ki té sòti asou fasad sala wè on bagay ka pasé an syèl-la. Bagay-la té ka sanm yon étwal ki té ka kléwé byen bwiyan, èk yo swiv li. “Étwal-la” mennen yo Jérouzalèm. Lè sé nonm-lan wivé Jérouzalèm, yo koumansé mandé moun: ‘Ti manmay-la ki kay vini wa sé Jwif-la, ki koté i yé? Nou vini pou bésé douvan’y èk onnowé’y.’

A lè sala, Hèròd sété wa an Jérouzalèm. Èk lè’y tann yo ka palé konsèné on wa nèf, sa twakasé’y an chay. Konsa, i voyé kwiyé sé chèf pwèt-la épi i mandé yo: ‘Ki koté ti manmay sala sipozé fèt?’ Yo di’y: ‘Silon ékwiti sé pwofèt-la, ti manmay-la kay fèt an vil Bèfléyenm.’ Konsa, Hèròd voyé kwiyé sé nonm-lan ki té sòti asou fasad sòlèy lévan-an, èk i di yo: ‘Alé Bèfléyenm èk gadé pou ti manmay-la byen. Lè zòt jwenn li vini di mwen, pou mwen sa alé bésé douvan’y èk onnowé’y.’ Mé sa pa té vwé pyès. Hèròd té vlé konnèt ki koté ti manmay-la yé pou’y té sa tjwé’y.

Lè sala, “étwal-la” koumansé pasé an syèl-la ankò. Konsa, sé nonm-lan swiv li. “Étwal-la” mennen yo an vil Bèfléyenm, èk i pozé dwèt asou kay-la koté ti manmay-la té yé-a. Lè sé nonm-lan antwé andidan kay-la, yo wè ti manmay-la épi manman’y Mari. Yo ajounou douvan ti manmay-la, èk yo bésé tèt yo byen ba douvan’y. Lè yo fini, yo ouvè sak yo èk yo ba’y lò, frankinsens, épi lanmi, kon kado. Ès ou kwè sé Jéhova ki té voyé sé nonm-lan sala koté Jézi té yé-a? Mé non!

Menm swè sala, Bondyé voyé on nanj pou palé épi Jozèf adan on wèv. Nanj-lan di Jozèf: ‘Hèròd ka gadé pou ti manmay-la pou’y tjwé’y. Konsa lévé, pwan ti manmay-la épi manman’y, alé an péyi Éjip, èk wèsté la jistan mwen di’w pou witounen.’ Konsa Jozèf lévé menm swè-a, i pwan ti manmay-la épi Mari, èvèk i alé Éjip.

Bon. Bondyé té vèti sé nonm-lan adan on wèv. I té di yo pou pa alé di Hèròd yo jwenn ti manmay-la. Konsa, apwé yo wè ti manmay-la, yo pasé on diféwan chimen, èk yo witounen an péyi yo. Ében, lè Hèròd wéyalizé sé nonm-lan té kwennen’y, i twapé i té tèlman faché i di sòlda’y pou ‘alé an vil Bèfléyenm épi an tout sé plas-la ki oliwon vil-la, èk tjwé tout ti gason ki té ni dé «2» lanné ében mwens.’ Mé, anyen pa wivé Jézi paski i pa té an Bèfléyenm. I té ja an péyi Éjip.

Apwé Hèròd mò, on nanj palé bay Jozèf adan an wèv èk i di’y: ‘Sé moun-lan ki té vlé tjwé ti manmay-la ja mò. Konsa pwan ti manmay-la épi manman’y, èk viwé an Izwayèl.’ Lè sala Jozèf pwan Mari épi Jézi, yo witounen Izwayèl, èk yo alé wèsté an vil Nazawèt.