An Lèt Hòd Pwensipal Konmité-a

Sé fwè èk sè nou-an nou kontan an chay-la:

Nou ka ‘alé toupatou pou pwéché bay moun, épi nou ka batizé yo pou yo sa vini disip Jézi’, paski nou enmen Jéhova èk nou enmen moun. (Mafyou 28:​19, 20; Mak 12:​28-31) Wi, lanmityé pou Bondyé èk pou pwochen nou ni on pil fòs! Konsa, si nou ni kalté lanmityé sala, sa kay édé nou pou asisté ‘tout moun ki ni tjè sensè pou twapé lavi étonnèl’.—Twavay 13:48 (New World Translation).

An tan pasé lè nou té ka pwépawé pou minis nou, nou té ka éséyé pou apwann pwézantasyon nou pa tjè, èk lè nou an minis-la nou té ka kité piblikasyon bay moun. Mé, atjwèlman, nou ka fè éfò pou kozé épi moun, èvèk nou ka éséyé pou fè sa pli mèyè. Alò lè nou ka kozé épi moun, nou vlé palé konsèné sijé ki ka antéwésé yo, èk lè nou fè sa, nou ka vwéman moutwé nou enmen yo. Konsa, menm si nou té ni on sijé an lidé pou diskité épi moun-lan, nou sipozé pawé pou fè chanjman an pwézantasyon nou silon sa moun-lan antéwésé adan. Bon, ki mannyè ti liv sala kay édé nou fè sa?

Ti liv sala ni douz (12) lison. Èk chak lison ka diskité yon kawaktè nou bizwen dévlopé ki kay édé nou moutwé moun lanmityé èk édé nou fè disip. An plis di sa, chak lison bazé asou yon wakont an Bib-la koté Jézi ében yon Kwityen an pwèmyé syèk-la té moutwé on sèten kawaktè an minis-la. Osi, sé fwè-a pa té pwépawé ti liv sala pou nou apwann pwézantasyon pa tjè. Pito sa, yo pwépawé ti liv sala pou édé nou gadé pou diféwan mannyè pou moutwé moun lanmityé an minis-la. Bon. Tout sé kawaktè-a ti liv sala ka palé konsèné byen enpòtan lè nou an minis-la. Mé, nou kay konsidiwé mannyè i enpòtan pou moutwé sèten kawaktè an sé twa sitiwasyon sala: (1) lè nou ka koumansé konmézasyon épi moun, (2) lè nou ka witounen asou moun, èk (3) lè nou ka étidyé Bib-la épi moun.

Alò, kon’w ka ègzanminé chak lison, katjilé byen asou mannyè-a ou sa moutwé kawaktè-a lison-an ka diskité lè’w ka palé épi moun an tèwitwa’w. Konsa fè tout sa’w pé pou fòtifyé lanmityé’w pou Jéhova èk pou moun. I byen enpòtan pou’w fè sa, paski sé lanmityé ki kay édé’w pou fè disip.

Sé fwè èk sè nou-an, nou ka vwéman apwésyé gwan pwivilaj-la nou ni pou twavay an lilyon épi zòt. (Zèfannaya 3:9) Konsa, nou ka pwédyé pou Jéhova benni zòt an chay, kon zòt ka kontiné enmen moun èk édé yo vini disip Jézi!