7 Ès Bondyé Kay Tann Èk Wéponn Lapwiyè Nou?

SA SÉ on kwèstyon anpil moun ka mandé, èk yo vwéman vlé konnèt wépons-lan pou kwèstyon sala. Bib-la ka moutwé, jòdi jou Jéhova ka kouté lapwiyè. Mé kon nou ja wè, sé pa tout lapwiyè i ka kouté. Alò, ès Bondyé kay kouté lapwiyè nou opa? Ében, sa ka dépan pli asou nou, pasé i ka dépan asou Bondyé.

Lè Jézi té asou latè-a, i kondanné sé chèf wilizyon-an an tan sala pou ipokwizi yo. Lè yo té ka pwédyé, yo té enmen doubout an sé légliz yo-a, èk an kwen gwan chimen pou tout moun sa wè yo. Jézi té di, sé nonm sala pa kay twapé anyen pasé sa, paskè yo té ka pwédyé pou moun wè yo, pa pou plè Bondyé. Konsa, sèl sa yo té kay twapé sé antansyon hòd lézòm. Bondyé pa té kay kouté lapwiyè yo. (Mafyou 6:5) Jòdi jou osi, an chay moun pa ka pwédyé an ling épi volonté Bondyé. Sèl sa yo ka katjilé asou, sé sa ki enpòtan pou yo. Bondyé pa ka kouté lapwiyè yo, paskè yo pa ka swiv sé pwensip Bib-la nou diskité an magazin sala.

Mé ou menm, ès Bondyé kay kouté lapwiyè’w? Wépons-lan pou kwèstyon sala pa ni anyen pou fè épi was ou, kilti’w, ében si’w ni gwo èdikasyon èk gwo pozisyon opa. Gadé bèl asiwans-lan Bib-la ka ban nou: “Bondyé pa ni pwéféwans pou pyèsonn. I ka aksèpté népòt moun ki ka adowéʼy épi [ki] ka fè sa ki dwèt. I pa mélé ki nasyon i sòti.” (Twav. 10:34, 35) Lè on moun ka adowé Bondyé èk yo ka fè sa ki dwèt an zyé’y, sa vlé di yo ni kwentif pou Bondyé. Konsa, yo ka fè sa Bondyé vlé yo fè, pito yo fè sa yo vlé, ében sa lòt moun vlé yo fè. Alò, si nou vwéman vlé Bondyé kouté lapwiyè nou, nou ni pou swiv sé diwèksyon-an i ban nou an Pawòl li.

Jòdi jou, an chay moun vlé Bondyé fè miwak pou wéponn lapwiyè yo. Mé an tan lontan, Bondyé pa té ka toujou fè miwak pou wéponn lapwiyè sèvant li. Délè, plizyè syèk té ka pasé avan Bondyé fè on miwak. An plis di sa, Bib-la ka moutwé, lépòk-la lè Bondyé té ka fè miwak fini apwé sé zapòt-la mò. (1 Kòrint 13:​8-​10) Mé, ès sa vlé di, Bondyé pa ka wéponn lapwiyè jòdi jou? Mé non! Annou konsidiwé adan sé lapwiyè-a Bondyé ka wéponn.

Bondyé ka bay moun lasajès. Sé Jéhova ki Sous tout lasajès ki vwé, èk i donnan épi’y. I pa ka miziwé lasajès-la i ka bay moun ki ka gadé pou diwèksyon’y, èk ki ka swiv li.​—Jémz 1:5.

Bondyé ka ban nou lisentèspwi’y èpi tout sé bennéfis-la i ka pòté-a. Lisentèspwi Bondyé sé fòs-la i ka sèvi pou akonpli sa i vlé fèt. La pa ni pyès fòs an inivès-la ki pli fò pasé lisentèspwi Bondyé. Lisentèspwi Bondyé sa édé nou pou tjébé fò anba difikilté. I sa ban nou lapé an tjè nou épi an lidé nou lè nou twakasé. Èk i sa édé nou pou dévlopé bèl kawaktè Kwityen. (Galécha 5:​22, 23) Jézi té bay sé disip li-a asiwans-lan ki, Bondyé té kay ba yo lisentèspwi-a yo té bizwen. Mi yon bèl kado!​—Louk 11:13.

Bondyé ka ouvè sèvèl moun ki ka chaché pou li épi tout tjè yo. (Twav. 17:26, 27) Oliwon latè-a, la ni moun ki vwéman vlé konnèt lavéwité-a konsèné Bondyé. Yo vlé konnèt non’y, yo vlé konnèt divwa’y pou latè-a épi pou lézòm, èk yo vlé sav ki mannyè pou vansé pwé’y. (Jémz 4:8) Témwen Jéhova ka toujou jwenn moun kon sa, èvèk yo ka byen kontan pou sèvi Bib-la pou wéponn kwèstyon yo.

Ès ou aksèpté magazin sala paskè ou vlé konnèt Bondyé? Pitèt Bondyé ka sèvi’y pou wéponn lapwiyè’w.