BIB-LA KA CHANJÉ LAVI MOUN

KISA ki pousé an nonm pou witounen an wilizyon-an i té kité lè’y té piti? Ki mannyè an jenn nonm ki té vlé an papa pou tout lavi’y ka wè Jéhova kon an Papa? Annou konsidiwé sa sé moun sala ni pou di.

“Mwen té bizwen viwé jwenn Jéhova.”—ELIE KHALIL

LANNÉ MWEN FÈT: 1976

PÉYI MWEN FÈT: CYPRUS

AVAN: MWEN TÉ AN GASON KI TÉ PÈD

LAVI MWEN AN TAN PASÉ: Mwen fèt Cyprus mé mwen té lévé Australia. Pawan mwen sé Témwen Jéhova, èk yo té fè tout sa yo pé pou édé mwen dévèlopé lanmityé pou Jéhova èk Pawol li, Bib-la. Mé lè mwen té an jenn moun, mwen koumansé wébèlé. Mwen té ka mawon kay-la lé swè pou jwenn épi jan mwen. Nou té ka vòlè vwati èk twapé kò nou adan an chay dézagwéman.

An koumansman-an, mwen té fè sé bagay sala an sigwé paski m’a té vlé déplè pawan mwen. Mé mizi an mizi tjè mwen vini wèd, èk m’a té mélé ankò. Mwen té fè jan épi moun ki té pli gwan pasé mwen. Yo pa té enmen Jéhova èk yo té enflouwansé mwen pou fè sa ki mové. Apwé an tan, mwen di pawan mwen, m’a té vlé ni anyen pou fè épi wilizyon yo ankò. Pawan mwen té fè tout sa yo pé pou édé mwen, mé mwen té ja fè lidé mwen, alò, mwen widjèkté tout éfò yo. Désizyon-an mwen té fè-a kwazé tjè yo.

Lè mwen kité kay pawan mwen, mwen koumansé pwan dwòg. Mwen té ka jis planté èk vann an chay zèb. An plis disa, mwen té ka kouwi vyé lavi èk mwen té ka pasé an chay tan an fèt. Osi, mwen té ka kontwayé vit. Pa ègzanp, si an moun té di èben fè an bagay m’a té kontan, mwen té ka gonflé épi waj. Mwen té ka hélé dèyè yo èk bat yo. Pou di’w lavéwité-a, mwen té ka fè tout sa an Kwityen pa sipozé fè.

MANNYÈ BIB-LA CHANJÉ LAVI MWEN: Mwen té vini bon jan épi an nonm ki té ka sèvi dwòg, èk lè’y té jenn papa’y mò. Souvan, lé swè nou té ka wèsté byen ta ka palé konsèné lavi. Délè, i té ka di mwen ki mizi mantjé i té ka mantjé papa’y. Paski mwen lévé an lavéwité-a mwen té konnèt konsèné èspwa wèzèweksyon-an. Konsa, mwen koumansé di’y konsèné Jézi èk mannyè i té wésisité moun ki mò èk i pwònmèt pou fè sa ankò an tan pou vini. (Jan 5:28, 29) Mwen té di’y, “Imajiné mannyè ou kay santi lè ou wè papa’w ankò? Nou tout sa viv pou tout tan an Pawadi asou latè-a.” Sé pawòl sala vwéman touchè tjè’y.

An lòt lè, jan mwen té ka mandé mwen kwèsyon konsèné dènyé tan-an èk enstwiksyon-an twa pèwsonn an yon dyé. Konsa, mwen té sèvi Bib-la pou moutwé’y lavéwité-a konsèné Jéhova, Jézi Kwi èk dènyé tan-an. (Jan 14:28; 2 Timòfi 3:​1-5) Pli mwen té ka palé konsèné Jéhova, sé pli mwen té ka katjilé konsèné’y.

Mizi an mizi, sé gwenn lavéwité-a pawan mwen té planté an tjè mwen koumansé pwofité. Pa ègzanp, lè mwen èk jan mwen té ka pwan dwòg adan an fèt, délè mwen té ka katjilé konsèné Jéhova. An chay jan mwen té di yo enmen Bondyé, mé mannyè-a yo té ka viv lavi yo té ka di an lòt bagay. Kanmenm, m’a té vlé vini menm kon yo, konsa, mwen wéyalizé mwen té bizwen fè kéchòy épi lavi mwen. Mwen té bizwen viwé jwenn Jéhova.

Mwen té konnèt sé chanjman-an mwen té bizwen fè. Adan di yo té wèd èk adan di yo té ézé. Pa ègzanp, i té ézé pou mwen doubout pwan dwòg èk, i té ézé pou mwen doubout asosiyé épi jan mwen. Apa di sa, mwen koumansé étidyé Bib-la épi on ansyen.

Kanmenm, la té ni lòt chanjman ki té pli wèd pou fè. I té byen difisil pou mwen kontwolé kòlè mwen. Pou di’w lavéwité-a, pou an tan mwen té ka fè byen, mé apwé tjèk tan pasé mwen té ka fè menm bagay-la ankò. Èk chak fwa mwen fè an lèwè, konsyans mwen té ka bat mwen, mwen té santi mwen pa vo anyen. Magwé mwen té dékouwajé, mwen ouvè tjè mwen bay ansyen-an ki té ka étidyé épi mwen. I té janti, i té moutwé mwen pasyans èk i té ankouwajé mwen an chay. Yon fwa, i mandé mwen pou li on atik an Gad-la ki té ka palé konsèné mannyè i enpòtan pou tjenbé fò.a Èk apwé, nou diskité sa mwen té sa fè lè mwen vini faché. Piti an piti, mwen té apwann mannyè pou kontwolé kòlè mwen. Sa ki té édé mwen sé lè mwen sipliyé Jéhova pou èd èk lè mwen fè éfò pou apliké konsèy-la an atik-la. Alafen, an Avwi lanné dé mil (2000), mwen té batizé kon on Témwen Jéhova. Pa dé kontan pawan mwen té kontan.

MANNYÈ MWEN TWAPÉ BENNÉFIS: Apwézan, mwen ni lapé an lidé mwen èk an tjè mwen paski mwen pa ka fè sé bagay-la ki ka déplè Jéhova. Népòt sa mwen ka fè, ki mwen ka twavay, ki mwen ka atandé mitin èben ki mwen ka enjwi an ti anmizman, mwen ni tjè kontan. Wi, lavi mwen dou.

Touléjou mwen ka wimèsyé Jéhova pou pawan mwen, paski yo pa té janmen abandonnen mwen. Osi, mwen ka toujou mèdité asou sa Jézi di an Jan 6:44. La i di, “Pyèsonn pa sa vini jwenn mwen si Papa-a ki voyé mwen-an pa mennenʼy ban mwen.” Lè mwen chonjé sé Jéhova ki té édé mwen pou viwé jwenn li, sa ka touché tjè mwen.

“Mwen té vlé on papa.”—MARCO ANTONIO ALVAREZ SOTO

LANNÉ MWEN FÈT: 1977

PÉYI MWEN FÈT: CHILE

AVAN: MWEN TÉ ADAN AN GWOUP KI KA JWÉ ON KALITÉ MIZIK YO KA KWIYÉ “DEATH METAL”

LAVI MWEN AN TAN PASÉ: Mwen té lévé épi manman mwen an Punta Arenas, sa sé an bèl vil bò lanmè Magellan an Soud Lanméwik. Lè mwen té senk (5) lanné pawan mwen sépawé, èk sa fè mwen santi konmsi papa mwen té abandonnen mwen. Mwen té mantjé’y an chay. Mwen té vwéman vlé on papa.

Manman mwen té étidyé Bib-la épi Témwen Jéhova, èk i té ka mennen mwen épi’y lè’y té ka alé Lasal Wéyòm-lan. Mé, mwen té hayi sé mitin-lan. Èk pou sa, mwen té ka fè kwiz pwan mwen lè nou té asou chimen pou alé mitin. Konsa, lè mwen té twèz (13) lanné mwen doubout atandé sé mitin-lan nèt.

Diwan tan sala, mwen vini enmen mizik, èk mwen wéyalizé mwen té sa jwé’y byen. Lè mwen té apipwé kenz (15) lanné, mwen té ka jwé on kalité mizik yo ka kwiyé “death-metal” an fèsten, an sé kabawé-a èk lakay moun. Èk paski mwen té fè jan épi moun ki té ka jwé diféwan kalité mizik, sa té fè mwen vini entéwésé an mizik klasik. Konsa, mwen désidé pou étidyé mizik adan an lékòl an Punta Arenas. Èk lè mwen té ven (20) lanné, mwen alé wèsté Santiago pou kontiné étidyé mizik. Osi, mwen té kontiné jwé mizik death-metal épi diféwan gwoup.

Paditan sala, mwen té ka santi an bagay té ka mantjé an lavi mwen. Alò, pou édé mwen aji épi sé santiman sala, mwen té ka pasé an chay tan épi sé moun-lan mwen té ka jwé mizik épi, paski mwen té ka konsidiwé yo kon fanmi mwen. Mwen koumansé bwè wonm èk pwan dwòg épi yo. An plis di sa, mwen té ni an mové atitid, èk sa té byen klè an mannyè-a mwen té ka abiyé. Sé sèlman had nwè mwen té ka mété, bab mwen té lonng, èk chivé mwen té ka wivé pwèskè an wen mwen.

Paski mwen té ni an mové atitid mwen té ka toujou goumen, èk souvan mwen té ka twapé kò mwen an dézagwéman épi polis. Yon jou, lè mwen té sou, mwen goumen épi deotwa moun ki té ka vann dwòg paski yo té ka anbété mwen èk sé jan mwen-an. Yo bat mwen si tèlman mové, yo kasé zo bazou mwen.

Mé sa ki vwéman blésé mwen, sé lè mwen apwann jal mwen té ka kòné mwen épi pli bon jan mwen pou plizyè lanné. Èk tout sé jan mwen-an té sav sa, mé pyèsonn pa té di mwen anyen. Sa kwazé tjè mwen!

Alò, mwen désidé pou witounen Punta Arenas. La mwen té ni plizyè djòb. Mwen té ka enstwi mizik èk mwen té ka jwé vyélon. Osi, mwen kontiné jwé mizik death-metal épi diféwan gwoup. An ti tan apwé, mwen jwenn an bèl fanm non’y sé Sussan, èk nou koumansé viv ansanm. Yon jou, Sussan té apwann manman’y ka kwè an Twa Pèwsonn an yon Dyé, mé mwen pa té ka kwè adan’y. Alò, i mandé mwen: “Kisa ki lavéwité-a?” Mwen di’y, mwen asiwé la pa ni Twa Pèwsonn an yon Dyé mé m’a té sav ki koté an Bib-la ki ka moutwé sa. Mé Témwen Jéhova sa moutwé’y lavéwité-a ki an Bib-la. A lè sala, mwen té fè an bagay mwen pa té fè pou konmen lanné, mwen sipliyé Bondyé pou édé mwen.

Déotwa jou apwé, mwen wè an nonm mwen té konnèt avan, alò mwen mandé’y ès i sé on Témwen Jéhova. Mwen té sa wè i té pè pou palé, mé épi jantiyès i wéponn tout kwèsyon mwen té ni konsèné sé mitin-lan an Lasal Wéyòm-lan. Mwen té asiwé èspéyans sala té wépons-lan pou lapwiyè mwen. Konsa, mwen désidé pou atandé yonn an sé mitin-lan. Lè mwen wivé an Lasal Wéyòm-lan, mwen alé asiz an dènyé ban-an paski m’a té vlé pyèsonn wè mwen. Mé, plizyè an sé fwè-a ki té konnèt mwen lè mwen té on ti manmay chonjé mwen. Pa dé kontan yo té kontan pou wè mwen, yo byenvini mwen èk yo anbwasé mwen. Mannyè-a yo té twété mwen té ban mwen lapé an lidé mwen èk an tjè mwen. Pou di’w lavéwité-a, sé konmsi mwen té viwé lakay mwen. Konsa, lè mwen wè fwè-a ki té étidyé Bib-la épi mwen lè mwen té toupiti, mwen mandé’y pou étidyé Bib-la épi mwen ankò.

MANNYÈ BIB-LA CHANJÉ LAVI MWEN: Yon jou, mwen li Pwovèb 27:11, la i di: ‘Gason mwen, moutwé ou savan, èk fè tjè mwen kontan.’ Lè mwen mèdité asou lévanjil sala, i té édé mwen pou wè an moun ki fèt épi lapousyè sa fè Kwéyatè inivès-la kontan. Sa vwéman touché tjè mwen! A lè sala, mwen wéyalizé Jéhova sé Papa-a mwen té vlé pou tout lavi mwen!

Magwé mwen té vlé plè Papa mwen ki an syèl èk fè vòlonté’y, i té wèd pou mwen fè, paski pou plizyè lanné mwen té yon èslav pou dwòg èk wonm. Sé lè sala, mwen vini konpwann sa Jézi té di an Mafyou 6:24. La i di, ‘pyèsonn pa sa sèvi dé mèt.’ Vèwsé sala vwéman pousé mwen pou fè tout sa mwen pé pou chanjé lavi mwen. An lòt lévanjil ki té édé mwen sé 1 Kòrint 15:33, i di: “Swiv mové konpanni épi ou oblijé twapé kò’w an dézagwéman.” Lévanjil sala touché mwen an pil. Mwen wéyalizé m’a té sa doubout sé vyé labitid sala, si mwen kontiné asosiyé épi menm sé moun sala èk si mwen kontiné fè menm sé bagay-la mwen té ka fè avan. Wi, konsèy-la ki an Bib-la té byen klè. Mwen té ni pou fè gwo éfò pou mwen kité tout sé bagay-la ki té ka fè mwen péché.​—Mafyou 5:​30.

Disizyon-an ki té pli difisil pou mwen fè, sé lè mwen té ni pou doubout jwé mizik heavy-metal paski mwen té kontan’y an chay. Mé épi èd sé fwè èk sè-a an kongwigasyon-an mwen kité’y. Mwen kontiné fè pli chanjman an lavi mwen. Pa ègzanp, mwen doubout bwè an chay wonm èk mwen doubout pwan dwòg. Osi, mwen koupé chivé mwen, mwen wazé bab mwen, èk mwen chanjé mannyè-a mwen té ka abiyé. Jou-a mwen di Sussan mwen té vlé koupé chivé mwen, i pa té sa kwè sa. I té vlé sav kisa mwen té ka fè an Lasal Wéyòm-lan. Alò, i di mwen: “Mwen ka alé épi’w pou mwen wè kisa ki ka fèt an Lasal Wéyòm sala!” Sussan té kontan sa i té wè èk apwann an Lasal Wéyòm-lan. Konsa, i koumansé étidyé Bib-la. Apwé an lè, mwen èk Sussan mayé. Èk an lanné dé mil ywit (2008), nou té batizé kon Témwen Jéhova. Apwézan, nou kontan nou ka sèvi Jéhova épi manman mwen.

MANNYÈ MWEN TWAPÉ BENNÉFIS: Mwen chapé anba an latè ki ka ankouwajé fo lakontantman èk jan ki twèt. Mwen kontan mizik toujou, mé apwézan mwen ka chwazi sa mwen ka kouté. Mwen ka sèvi èspéyans mwen pou édé fanmi mwen èk lézòt, sitou jenn moun. Vwéman, mwen vlé édé yo wè, an chay bagay an latè-a ka sanm konmsi yo bèl, mé sé “zòdi” yo yé.​—Filipay 3:8.

Osi, mwen twapé bon jan an kongwigasyon-an, sé la ki ni lapé èk lanmityé. Alafen, mwen twapé Papa-a mwen té vlé paski mwen fè éfò pou vansé pwé Jéhova.

[Footnote]

[Blurb]

“Mwen té sa viwé jwenn Jéhova paski i mennen mwen viwé”