Yo té sèvi Bib-la pou wéponn chak kwèsyon!

LAVI MWEN AN TAN PASÉ:

Lè mwen fèt, pawan mwen té ni on ti plantasyon an Galicia, sa sé an vilaj ki an nò Èspann. Pawan mwen té ni ywit ich, èk sé mwen ki té katyenm. Lè mwen té lévé, fanmi mwen té pwé yonn a lòt èk nou té ka enjwi tan nou ansanm. An tan sala, I té konmen an Èspann pou pawan voyé ich yo adan an kouvan. Alò, nou twa an fanmi-an té alé.

Lè mwen té twèz (13) lanné, mwen alé jwenn sésé mwen adan an kouvan an Madrid. Sé moun-lan an kouvan-an pa té ni pyès lanmityé, yo pa té janti, èk yo pa té mélé épi pyèsonn. Sèl sa yo té ka fiksé asou sété wèg èk lapwiyé. Touléjou avan sòlèy lévé, nou té ni pou asanblé an chapèl-la pou mèdité asou Bondyé, mé m’a té ka katjilé asou anyen. Apwé sa, nou té ka chanté èk fè lanmès an Laten. M’a té ka konpwann anyen, èk sa fè mwen santi konmsi Bondyé té lwen mwen. Lavi mwen an kouvan-an té ka pasé an silans paski sé danm-lan pa té ka kité nou palé. Sèl lè nou té sa palé sé apwé nou fini manjé pou on dimi nèditan. Anfen, lè mwen èk sésé mwen té ka jwenn ansanm, sèl sa nou té sa di yonn a lòt sé “Avé Maria”. Lavi mwen an kouvan-an té tèlman diféwan épi bèl lavi-a mwen té ni lè mwen té lakay pawan mwen! Mwen té ka santi mwen té pa kò mwen. Mwen té twis èk touléjou mwen té ka pléwé.

Magwé m’a té janmen santi pwé Bondyé, mwen té vini on danm lè mwen té disèt (17) lanné. Vwéman, mwen té ka annèk fè sa lézòt té vlé mwen fè. Mé touswit apwé, mwen koumansé ni dout. Èk mwen té ka toujou mandé kò mwen si sé Bondyé ki té chwazi mwen pou vini on danm. Sé danm-lan té ka di népòt moun ki ni dout kay bwilé an lanfè! Mé, mwen té kontiné ni dout. Sa sé paski mwen sav Jézi Kwi té sèvi tout tan’y ka édé èk enstwi moun, i pa té wété pa kò’y. (Mafyou 4:​23-​25) Konsa, lè mwen té ven (20) lanné, mwen té vlé kité kouvan-an. Alò, mwen té di chèf sé danm-lan mannyè mwen té ka santi. Mwen té wèsté bouch gwan ouvè lè’y di mwen, si mwen pa té vlé wèsté on danm mwen sa pwan chimen mwen èk alé pli vit ki posib. Mwen wéyalizé i té di mwen sa paski i té pè mwen té kay enflouwansé sé lézòt danm-lan. Konsa, mwen kité kouvan-an.

Lè mwen viwé lakay pawan mwen èk mwen di yo pouki mwen té kité kouvan-an, yo té konpwann. Lè sala, mwen koumansé gadé pou twavay mé m’a té sa twapé pyès. Konsa mwen désidé pou alé jwenn fwè mwen ki té ka wèsté Almany. Fwè mwen té adan yon gwoup Konminis. Gwoup sala té sèlman ni moun ki kité Èspann. Mwen té ka santi alèz épi sé moun-lan an gwoup sala, paski yo té ka goumen pou dwa twavayè èk dwa fanm. Alò, mwen té vini an Konminis èk mwen mayé on nonm an gwoup sala. Nou té ka pwotèsté an lawi-a èk nou té ka bay moun liv Konminis. Mwen té vwéman kwè sa mwen té ka fè-a, sété an bon bagay.

Mé, apwé an lè, mwen koumansé ni dout èk mwen té vini dékouwajé ankò. Sa sé paski sé jan Konminis-la pa té ka fè sa yo té di yo kay fè. Sé dout-la mwen té ni-an té vini pli fò an lanné mil nèf san swasant wonz (1971). Wézon-an pou sa, sé lè sé jenn moun-lan an gwoup-la té mété difé adan on lòfis gouvèdman an vil Frankfurt. Yo té fè sa pou moutwé yo té kont gouvèdman-an an Èspann. M’a té kontan sa yo té fè-a pyès.

Lè pwèmyé gason mwen té fèt, mwen di mawi mwen, mwen pa té kay alé an sé mitin Konminis-la ankò. Ou wè, mwen té désidé pou fè sa paski pyèsonn pa té vini wè mwen épi tibébé mwen. Mwen té ka santi mwen té pa kò mwen. Alò, mwen té ka mandé kò mwen pouki mwen asou latè-a. Èk ès i vwéman ka fè sans pou mwen éséyé wanjé sé pwòblenm-lan an latè-a?

MANNYÈ BIB-LA CHANJÉ LAVI MWEN:

An lanné mil nèf san swasant sèz (1976), dé Témwen Jéhova, on misyé èk madanm li ki sòti Èspann té konyen asou lapòt mwen. Yo ofè mwen déotwa piblikasyon ki bazé asou Bib-la, èk mwen aksèpté yo. Lè yo witounen, mwen koumansé bonmbadé yo épi kwèsyon konsèné soufwans, pasdwa èk enjistis. Pa dé sipwi mwen té sipwi lè yo sèvi Bib-la pou wéponn chak kwèsyon! Konsa, lè yo ofè mwen an létid Bib, mwen dakò.

An koumansman-an, mwen té kontan pou annik apwann enfòmasyon ki an Bib-la. Mé, bagay chanjé lè mwen èk mawi mwen koumansé atandé sé mitin Témwen Jéhova an Lasal Wéyòm-lan. A lè sala, nou té ni dé gason. Sé Témwen-an té byen janti, yo té ka vini jwenn nou pou mennen nou mitin. Osi, diwan sé mitin-lan yo té ka édé nou épi sé manmay-la. Sa vwéman touché tjè mwen! A kòz di sa, mwen vini pwé sé Témwen-an.

Magwé sa, mwen té ni dout konsèné wilizyon toujou. Apwé an lè, mwen désidé pou vizité fanmi mwen an Èspann. Tonton mwen ki té an pwèt, té ka fè tout sa i pé pou fè mwen doubout étidyé Bib-la. Mé sé Témwen-an an Èspann té édé mwen an chay. Yo té sèvi Bib-la pou wéponn tout sé kwèsyon-an mwen té ni-an menm kon sé Témwen-an an Almany. Alò mwen té détèminé pou kontiné étidyé Bib-la lè mwen viwé Almany. Magwé mawi mwen pa té vlé étidyé Bib-la ankò, mwen té fè lidé mwen pou kontiné étidyé. An lanné mil nèf san swasant dizwit (1978), mwen té batizé kon on Témwen Jéhova.

MANNYÈ MWEN TWAPÉ BENNÉFIS:

Lavéwité-a ki an Bib-la ka édé mwen pou viv an pli mèyè lavi. Pou ègzanp, 1 Pita 3:1-4 ka di, “Zòt sé madanm-lan ni pou abésé kò zòt anba mawi zòt . . . [èk] lavi-a zòt sé madanm-lan ka viv-la pé genyen yo bay Bondyé san zòt di yo an mo pawòl lè yo wè mannyè zòt ka pòté Bondyé wèspé épi mannyè zòt ka viv an lavi ki nèt. . . . Bèltéʼw sipozé sòti an tjèʼw, sa sé bèlté-a ki pa ka fini pyès-la épi ki ka wéfléchi adan an lavi ki janti épi byen dous. Sa ni an chay valè an pwézans Bondyé.” Sé vèwsé sala ka édé mwen pou vini an pli mèyè madanm èk manman.

I ja ni apipwé twant-senk (35) lanné dépi mwen vini on Témwen Jéhova. Pa dé kontan mwen kontan mwen ka adowé Jéhova épi pèp li owon latè-a. Osi, mwen si tèlman kontan kat an sé senk manmay mwen-an ka sèvi Jéhova.