Mwen Apwann Jéhova Sé An Dyé Ki Plen Mizéwikòd Èk Ka Pawdonnen

LAVI MWEN AN TAN PASÉ:

Mwen té lévé an Montreal, Kanada. Lavi an vil sala té wèd, paski i pa té ézé pou moun jwenn twavay. Pawan mwen té ni ywit «8» ich èk sé mwen ki té dènyé-a. Lè mwen té sis mwa, papa mwen mò. Konsa, manman mwen té ni pou otjipé nou ywit pa kò’y.

Kon an tibway, jan mwen sété moun ki té ka fè bagay kont lwa-a. Pou wézon sala, mwen té vini vyolan, mwen koumansé sèvi dwòg, èk mwen té ka payé. Lè mwen té dis «10» lanné, mwen koumansé fè konmisyon bay djanmèt èk mové kwiminèl. Mwen té ka manti an chay, èk sa mwen té kontan plis sé pou fè bòbòl. Vwéman, sé bagay sala té ka ban mwen an chay plézi.

Lè mwen té katòz «14» lanné, mwen té an chèf bòbòlis. Mi sa mwen té ka fè. Mwen té ka achté an pil bijou ki té sanm konmsi yo té fèt épi lò. Apwé sa, mwen té ka alé asou lawi-a èk lòt koté pou vann yo bay moun kon bagay ki fèt épi lò. Mwen té vwéman kontan fè lajan kon sa. Yon fwa, mwen té fè dis «10,000» mil goud an yon sèl jou!

Paditan sala mwen té ka wèsté adan an lékòl pou jenn moun ki ni pwoblenm èk ki ka fè bagay kont lwa-a. Mé lè mwen té kenz «15» lanné, yo mété mwen dèwò lékòl sala, konsa, m’a té ni pyès koté pou wèsté. Alò, mwen té ka dòmi asou lawi, an plas piblik, èk lakay jan mwen.

Paski mwen té ka fè bagay kont lwa-a, polis té ka toujou kwèsyonnen mwen. Mé m’a té janmen alé lajòl paski sé bagay-la mwen té ka vann, sé pa bagay mwen vòlè. Kanmenm, paski mwen té ka fè bòbòl èk vann bagay san an lisans, mwen té ni pou péyé an chay lajan plizyè fwa. Sé bagay sala pa té ka fè mwen anyen. M’a té mélé épi anyen èben pyèsonn. Pou di’w lavéwité-a, mwen té ka jis anmasé lajan bay mové kwiminèl. Twavay sala té byen danjéwé, konsa, mwen té ka maché épi fizi mwen. Èk délè, mwen té ka fè bagay bay gwo ògannizasyon ki ka fè bagay ki kont lwa-a.

MANNYÈ BIB-LA CHANJÉ LAVI MWEN:

Pwèmyé fwa-a mwen tann konmisyon Bib-la, sé lè jal-la mwen té ka wèsté épi-a, koumansé étidyé Bib-la épi Témwen Jéhova. Mé, m’a té dakò épi sa Bib-la té ka di konsèné mannyé pou viv an lavi ki pwòp. Konsa, mwen kité jal sala èk mwen alé wèsté épi an lòt jal mwen té ja ni. Lè sala, mwen té disèt «17» lanné.

An gwo chanjman fèt lè jal sala koumansé étidyé Bib-la épi sé Témwen-an. Sé chanjman-an i té fè an lavi’y vwéman touché tjè mwen. Pèsonnalité’y chanjé konplètman. I té vini pli dous èk i té ni pli pasyans. Konsa, lè sé Témwen-an envité mwen pou atandé on mitin an Lasal Wéyòm-lan, mwen désidé pou alé. Lè mwen wivé an Lasal Wéyòm-lan, sé Témwen-an byenvini mwen. Yo fè mwen santi konfòtab èk yo té janti. Anplis di sa, yo té byen abiyé. Sa mwen èspéyansé an mitin sala té tèlman diféwan épi lavi-a mwen té ka viv-la. Dépi mwen té toupiti, m’a té ni an bon wilasyon épi fanmi mwen. Yo pa té janmen moutwé mwen lanmityé. Mé, lanmityé-a mwen èspéyansé anpami sé Témwen-an té ban mwen an chay djèwté. Sa sé ègzaktiman sa mwen té ka mantjé tout lavi mwen. Alò, lè sé Témwen-an ofè mwen an létid Bib, m’a té ni pou katjilé dé fwa, mwen annèk di yo wi!

Sa mwen té ka apwann an Bib-la vwéman sové lavi mwen. Mwen ka di sa paski mwen èk dé jan mwen té fè an plan pou vòlè lajan pou péyé dèt mwen. Ou wè, mwen té enmen payé èk a kòz di sa, mwen té ka dwé plis pasé senkant mil «50,000» goud. Mé sa mwen apwann an Bib-la fè mwen chanjé lidé mwen. Konsa, mwen di jan mwen mwen pa vlé fè’y ankò. Pa dé kontan mwen té kontan mwen désidé pou fè sa. Kanmenm, dé jan mwen désidé pou kontiné épi plan-an èk yo alé. Mé bagay pa té maché mannyè-a yo té vlé. A kòz di sa, polis awété yonn èk yo tjwé lòt-la.

Pli mwen étidye Bib-la, sé pli mwen wéyalizé mwen té bizwen fè chanjman an lavi mwen. Pou ègzanp, sa mwen apwann an 1 Kòrint 6:10 vwéman touché tjè mwen. La i di: “Sa ki ka vòlè, ében sa ki vowas, ében sa ki toujou sou, ében sa ki ka sali non lézòt, ében sa ki ka bwitalizé moun pou pwan bagay yo — pyès sé kalité moun sala pa kay ni dwa pou kondwi épi Bondyé.” Lè mwen li vèwsé sala dlo sòti an zyé mwen. Sé a lè sala mwen wéyalizé, mwen té vwéman bouzwen chanjé lavi mwen konplètman, paski mwen té ka faché vit èk mwen té vyolan. (Ronm 12:2) An plis di sa, tout lavi mwen té bazé asou mansonj.

Létid Bib mwen té édé mwen wè Jéhova sé an Dyé ki plen mizéwikòd èk ka pawdonnen konplètman. (Izaya 1:​18) Konsa, sa pousé mwen pou pwédyé bay Jéhova. Mwen sipliyé’y èk mwen mandé’y pou édé mwen chanjé lavi mwen. Jéhova wéponn lapwiyè mwen, èk piti an piti épi èd li, mwen té fè sé chanjman-an mwen té bizwen fè-a. Yonn an sé chanjman-an mwen té fè-a, sé pou mayé jal mwen.

Mwen té vennkat «24» lanné lè nou mayé, èk nou té ni twa ich. Paski mwen té ka chanjé lavi mwen, mwen té vlé twavay ki onnèt. Mé sa pa té ézé paski m’a té ni djè endikasyon. Alò, mwen mandé Jéhova pou édé mwen jwenn twavay. Apwé sa, mwen alé diféwan koté pou chaché twavay. Èvèk mwen té ka di sé mèt twavay-la, mwen té ka chanjé lavi mwen èk mwen té vlé fè twavay ki onnèt. Délè, mwen té ka jik di yo, mwen té ka étidyé Bib-la épi Témwen Jéhova èk dézi mwen sété pou vini an pli mèyè moun. Magwé mwen té ka di yo sé bagay sala, yo pa té vlé ban mwen twavay. Mé yon bagay chanjé, lè mwen ouvè tjè mwen bay an lòt mèt twavay. Mwen di’y kalité lavi-a mwen té ka viv avan-an, èk sé éfò-a mwen té ka fè pou chanjé lavi mwen èk vini an pli mèyè moun. Lè sala i di mwen: “M’a sav on, mé lidé mwen ka di mwen pou ba’w twavay-la.” Pa dé kontan mwen té kontan lè i di mwen sa. Mwen asiwé sé Jéhova ki té wéponn lapwiyè mwen. Tjèk tan apwé, mwen èk madanm mwen té batizé kon Témwen Jéhova.

MANNYÈ MWEN TWAPÉ BENNÉFIS:

Mwen vivan jòdi-a paski mwen ka swiv sé pwensip-la ki an Bib-la. Anplis, fanmi mwen ni lakontantman. Osi, mwen ni an konsyans ki nèt paski mwen asiwé Jéhova ja pawdonnen mwen.

I ja ni katòz «14» lanné dépi mwen ka wann sèvis kon on piyonnè wéglé. Èk sa ki fè mwen pli kontan, sé lè madanm mwen koumansé piyonnè wéglé ansanm épi mwen. I ka ban mwen an chay lajwa pou enstwi moun sa Bib-la ka di. Mwen ja édé venndé «22» jan twavay mwen pou dèdiké lavi yo bay Jéhova. Wi, lavi mwen chanjé konplètman. Avan mwen té an bòbòlis, mé apwézan mwen ka patajé bon nouvèl-la konsèné Wéyòm Bondyé bay tout moun. Mwen ka di yo konsèné pawadi-a, koté la pa kay ni vòlè èk movèsté ankò.​—Sam 37:10, 11.