Apwézan mwen sa édé lézòt

LAVI MWEN AN TAN PASÉ:

Mwen té fèt Acul, an ti vil ki té pa kò’y an Guatemala. Fanmi mwen sé moun Ixil, desandan jan Maya. Mwen ka palé dé langaj - èspannyòl èk langaj-la moun Ixil ka palé. Lè mwen té an ti manmay, Guatemala té ni an gwo ladjè ki té diwé pou twant sis (36) lanné. Diwan ladjè sala, an chay moun Ixil mò.

Lè mwen té kat (4) lanné lavi mwen chanjé konplètman. Ou wè, yon jou, fwè mwen ki té sèt (7) lanné, té ka jwé épi an bonm èk sibitman bonm-lan pété. La menm fwè mwen mò èk mwen vini avèg. Apwé sa fèt, lavi mwen pa té ézé pyès. Manman mwen voyé mwen pou viv adan an lékòl pou manmay ki avèg an Vil Guatemala. An lékòl sala mwen apwann pou li Braille. Mé m’a té kontan lékòl paski mwen pa té ni jan. Sé manmay-la ki té an klas mwen pa té vlé wè mwen èk sé moun-lan ki té ka twavay an lékòl-la pa té vlé mwen palé bay sé lézòt manmay-la. M’a té janmen konpwann pouki yo té ka twété mwen kon sa. Mwen té toujou pa kò mwen. Alò, mwen té ka konté sé jou-a pou mwen sa alé lakay mwen. Anfen, chak lanné m’a té sa èspéyé pou sé dé mwa-a lè mwen té sa pasé tan épi manman mwen. Mwen té enmen manman mwen an chay, i té janti èk i té ni konpasyon. Malèwèzman, lè mwen té dis (10) lanné manman mwen mò. Sa té kwazé tjè mwen, mwen té ka santi mwen té pèd sèl moun-lan ki té enmen mwen-an.

Lè mwen té wonz (11) lanné, mwen viwé Acul. Mwen té ka wèsté épi pli gwan fwè mwen èk fanmi’y. Yo té ka fè tout sa yo pé pou potjiwé sa mwen té bizwen pou viv. Mé mwen té vwéman dékouwajé, pyèsonn pa té sa édé mwen èpi mannyè-a mwen té ka santi. Délè, mwen té ka hélé bay Bondyé: “Pouki manman mwen mò? Pouki mwen avèg?” Moun té ka di mwen tout sé mové bagay sala sé twavay Bondyé. Alò, mwen té ka di kò mwen Bondyé pa jis èk i pa mélé épi mannyè-a mwen ka santi. Vwéman, lavi mwen pa té ka fè pyès sans. Mwen té vlé mò. Sèl wézon mwen pa té tjwé kò mwen sé paski m’a té ni an mannyè pou fè’y.

Lavi mwen vini pli mové. Paski mwen té avèg, mwen pa té sa fè défans kò mwen. A kòz di sa, lè mwen té an ti gason, moun té anvyolé mwen plizyè fwa. M’a té janmen di pyèsonn sa ki té wivé mwen paski mwen pa té kwè yo té mélé épi mwen. Anfen, moun pa té vlé palé épi mwen, èk m’a té ka palé épi yo nonplis. Mwen té toujou pa kò mwen, mwen té dékouwajé èk mwen pa té ka konfyé pyèsonn.

MANNYÈ BIB-LA CHANJÉ LAVI MWEN:

Lè mwen té twèz (13) lanné, dé Témwen Jéhova, on misyé épi madanm li, té vini an lékòl mwen pou palé ban mwen. Yonn an sé titja-a, ki té konpwann sitiwayson mwen, té mandé yo pou vizité mwen. Sé Témwen-an té di mwen Bib-la ka pwonmèt yon jou moun ki mò kay wésisité èk moun ki avèg kay wè ankò. (Izaya 35:5; Jan 5:28, 29) Sé bèl bagay-la yo té ka enstwi mwen hòd Bib-la té ka fè mwen kontan, mé i té wèd pou mwen palé épi yo paski mwen pa té ni labitid-la ka palé bay moun. Èk magwé mwen té byen koutja, yo moutwé mwen jantiyès èk yo té ni pasyans épi mwen. Sé Témwen-an té ni pou fè an chay éfò pou étidyé Bib-la épi mwen. Yo té ni pou mouté désann an montany èk maché plis pasé sis (6) lyé.

Fwè mwen dékwi sé Témwen-an ban mwen kon moun ki ka byen abiyé mé yo pa ni djè bagay. Magwé sa, yo té ka toujou moutwé yo mélé épi mwen èk yo té ka ban mwen ti kado. Sa vwéman touché tjè mwen. Mwen té kwè sé sèlman kwityen ki vwé ki kay enmen moun kon sa.

Sé Témwen-an sèvi piblikasyon ki fèt an Braille pou étidyé Bib-la épi mwen. Mé magwé, mwen té ka konpwann sa mwen té ka apwann, la té ni bagay ki té difisil pou mwen aksèpté. Pou egzanp, yonn an sé bagay-la ki té byen wèd pou mwen aksèpté sé katjilé-la Bondyé vwéman mélé épi mwen, èk la ni moun ki mélé épi mwen menm kon Bondyé. Mwen té konpwann pouki Jéhova ka pèwmité movèsté, mé i té difisil pou mwen wè’y kon an Papa ki ni lanmityé.

Mizi an mizi, sa mwen té apwann hòd Bib-la té édé mwen pou chanjé mannyè-a mwen té ka santi. Pou egzanp, Ègzòdòs 3:7 té édé mwen wè Bondyé ni an chay konpasyon pou moun ki ka soufè. Lè sé moun-lan té ka maltwété pèp li, Bondyé di: ‘Mwen ja vwéman wè soufwans pèp mwen. . . Mwen konnèt penn yo èk soufwans yo byen.’ Pli mwen apwann konsèné sé bèl kawaktè-a Jéhova ni, sé pli lanmityé mwen pou li vini fò. Alò, mwen désidé pou dèdiké lavi mwen pou li. Èvèk, an lanné mil nef san katwiven dizwit (1998), mwen té batizé kon yon Témwen Jéhova.

Yon lanné apwé mwen batizé, mwen atandé an lékòl pou moun ki avèg an vil Escunitla. Paditan mwen té ka atandé lékòl sala, i té difisil pou mwen alé mitin. Ou wè, pou mwen alé mitin, mwen té ni pou mouté désann menm montany-lan sé Témwen-an té ni pou mouté désann pou étidyé épi mwen. Lè yon ansyen apwann sé difikilté-a mwen té ka èspéyansé-a, i fè awanjman pou mwen wèsté épi on fwè épi madanm li. Yo fè mwen santi konfòtab, yo otjipé mwen byen, èk jik jodi, yo ka twété mwen menm kon ich yo.

Vwéman, mwen sa wakonté an chay ègzanp konsèné lanmityé-a sé fwè-a èk sè-a ja moutwé mwen. Wi, sé bèl èspéyans sala ka fè mwen asiwé ki, Témwen Jéhova sé vwéman Kwityen ki vwé. Pa dé kontan mwen kontan mwen ka adowé Bondyé épi yo.—Jan 13:34, 35.

MANNYÈ MWEN TWAPÉ BENNÉFIS:

Apwézan, lavi mwen ka fè sans èk mwen ni an chay djèwté. Mwen ka piyonnè wéglé, èk mwen kontan pou sèvi tan mwen pou édé moun apwann konsèné Bondyé èk sé bèl pwònmèt-la ki an Bib-la. Sa ka édé mwen pou fiksé asou moun, pito mwen fiksé asou pwoblènm mwen. Osi, mwen ni pwivilaj-la pou wann sèvis kon yon ansyen, èk mwen ka bay diskou an diféwan kongwigasyon. An plis di sa, mwen té ni pwivilaj-la pou bay diskou an sé konvansyon-an douvan plizyè mil moun.

An lanné dé mil dis (2010), mwen fini Lékòl-la pou Sèvant Ministiriyal (atjwèlman nou ka kwiyé’y Lékòl pou Pwoklanmatè Wéyòm-lan) ki té pwan kou an El Salvador. Lékòl sala té édé mwen pou vini an pli mèyè ansyen. Wi, entwennman-an mwen wisiwvè té vwéman fè mwen santi lanmityé Jéhova. Èk mwen sav, sé Jéhova ki ka kwalifyé népòt moun pou fè twavay li.

Jodi-a, pa dé kontan mwen kontan, lavi mwen ni an chay djwèté paski mwen sa édé lézòt. M’a té janmen kwè sa té posib. Sa Jézi té di an Twavay 20:35 sé vwéman lavéwité-a. La i di, “Tjè’w ka pli kontan lè ou bay pasé lè ou wisivwè.”