BIB-LA KA CHANJÉ LAVI MOUN
Mwen Té Enmen Baseball Plis Pasé Pyès Lòt Bagay!
LANNÉ MWEN FÈT: 1928
PÉYI MWEN FÈT: COSTA RICA
AVAN: SÈL SA KI TÉ ASOU LIDÉ MWEN SÉTÉ POU JWÉ BASEBALL ÈK PAYÉ
LAVI MWEN AN TAN PASÉ
Mwen té lévé an Puerto Limón, an vil an Costa Rica. Pawan mwen té ni ywit ich, èk sé mwen ki té avan dènyé-a. Lè mwen té ywit «8» lanné, papa mwen mò. Konsa, manman mwen té ni pou otjipé nou pa kò’y.
Dépi mwen té toupiti, mwen té enmen jwé baseball, èk i té vini pli enpòtan bagay-la an lavi mwen. Lè mwen té apipwé ven lanné, mwen koumansé jwé baseball épi an ti gwoup. Apwé an tan, an nonm ki té ka chaché pou moun ki té ka jwé baseball byen, mandé mwen pou jwé épi an gwoup an Nicaragua. Mé, paski manman mwen té malad èk sé mwen ki té ka otjipé’y, m’a té vlé alé wèsté an Nicaragua. Alò, mwen di’y non. Pli ta, an lòt nonm mandé mwen pou jwé épi an gwoup an Costa Rica. Fwa sala, mwen dakò. Mwen jwé baseball épi gwoup sala pou twa «3» lanné. Nou té jwé an Cuba, Mexico èk Nicaragua. Èk lè mwen té ka jwé, sa mwen té kontan pli, sé pou tann sé moun-lan kwiyé non mwen.
Malèwèzman, mwen té ka kouwi vyé lavi. Magwé mwen té ni on jal, mwen té ni plizyè fanm asou koté. An plis di sa, mwen té ka bwè jistan mwen vini sou. Anfen, yon jou mwen bwè si tèlman wonm li denmen lè mwen lévé mwen té bazoudi, m’a té ka chonjé ki mannyè mwen wivé lakay mwen. Osi, mwen té kontan payé. Pou ègzanp, mwen té ka jwé lotto èk mwen té ka jwé dòmino pou lajan.
Diwan tan sala, manman mwen té vini an Témwen Jéhova. I té ka fè tout sa i pé pou édé mwen étidyé Bib-la. Mé m’a té antéwésé paski sèl sa ki té asou lidé mwen, sé pou jwé baseball. Pou di’w lavéwité-a, lè mwen té ka jwé m’a té ka menm santi fen. Mwen té enmen baseball plis pasé pyès lòt bagay!
Lè mwen té ventnèf «29» lanné, mwen blésé janm mwen paditan mwen té ka jwé. Apwé janm mwen djéwi, mwen désidé pou doubout jwé baseball. Kanmenm, mwen té ka entwennen an ti gwoup moun pou jwé baseball toupwé kay mwen.
MANNYÈ BIB-LA CHANJÉ LAVI MWEN
An lanné mil nèf san senkant sèt «1957», sé Témwen-an envité mwen pou atandé an konvasyon an menm plas-la mwen té ka jwé baseball. Èk mwen désidé pou alé. Diwan pwogwanm-lan, mwen té ka gadé tout oliwon mwen, èk sa mwen wè fè mwen wèsté épi bouch mwen gwan ouvè. Mannyè-a sé Témwen-an té ka konpòté kò yo té diféwan épi sé moun-lan ki té ka vini an plas sala pou gadé baseball. Sé Témwen-an té byen abiyé, yo té ni bon mès èk yo té ka tjenn plas-la nèt. Sa mwen wè an konvasyon-an vwéman touché tjè mwen. Anfen, sé sa ki té pousé mwen pou atandé mitin yo èk pou aksèpté an létid Bib.
Mwen té kontan sa mwen té ka apwann an Bib-la. Pou ègzanp, mwen apwann Jézi di asou dényè tan-an sé disip li-a té kay pwéché bon nouvèl-la konsèné Wéyòm Bondyé owon latè-a. (Mafyou 24:14) Osi, mwen apwann Kwityen ki vwé pa ka mandé moun lajan lè yo ka étidyé Bib-la épi yo. Wézon-an sé sa, yo ka swiv sa Jézi di an Mafyou 10:8, la i di, “fè sé bagay sala bay moun san péyiman.”
Bon. Mwen té ka fè éfò pou konpawé sa mwen té ka apwann an Bib-la épi sa sé Témwen-an té ka fè-a. Lè mwen wè mannyè-a yo té ka fè fòs kò yo pou pwéché bon nouvèl-la owon latè-a, sa touché mwen. Yo té ka apliké konsèy-la Jézi bay Kwityen pou enmen pwochen yo menm kon yo enmen kò yo. Èk sa ki pousé mwen pou vini an Témwen Jéhova, sé lè mwen li Mak 10:21. An vèwsé sala Jézi ka envité moun pou swiv li.
Malèwèzman, i té pwan mwen an chay tan pou fè sé chanjman-an mwen té bizwen fè-a. Yonn an sé bagay-la mwen té ni pou doubout fè, sé pou payé. Ou wè, mwen té enmen jwé lotto. Anfen, pou plizyè lanné mwen té ka jwé asou an sèten limowo chak simenn. Kanmenm, mwen désidé pou doubout payé lè mwen apwann Bondyé ka kondanné ‘moun ki ka pwépawé an tab pou dyé Chans-lan’, èk moun ki vowas. (Izaya 65:11; Kòlòsé 3:5) Pwèmyé Dimanch-lan apwé mwen doubout jwé lotto, sé limowo-a mwen té ka toujou jwé-a yo kwiyé. Paski m’a té jwé lotto simenn sala, moun babyé épi mwen, yo pwan mwen sèvi widitjil èk yo jik kwiyé mwen on kounoumounou. Pa dé tèt cho yo té ban mwen pou mwen jwé, mé m’a té janmen fè sa ankò.
An lanné mil nèf san senkant ywit «1958», mwen té batizé kon an Témwen Jéhova. Asou menm jou sala, mwen té ni an gwo tjalinj pou aji épi. (Èfésòs 4:24) Ou wè, swè sala lè mwen viwé an lotèl-la, mwen té sipwi lè mwen wè jal-la mwen té ka sòti épi-a an tan pasé, té la ka doubout bò lapòt mwen. Kon zyé’y tonbé asou mwen, i di: ‘Sammy, doudou mwen, ann’ alé ni an bon tan.’ La menm mwen di’y, ‘Awa! Apwézan, mwen ka viv lavi mwen an ling épi sé pwensip-la ki an Bib-la.’ (1 Kòrint 6:18) I hélé, “Kisa?” Èk i di mwen, sa Bib-la ka di konsèné sèks pa enpòtan, konsa nou sa kontiné wilasyon nou. Lè i di mwen sa, mwen annik antwé an chanm mwen èk mwen laklé lapòt-la. Dépi jou sala, mwen ka wèsté fidèl pou Jéhova.
MANNYÈ MWEN TWAPÉ BENNÉFIS
Jéhova ja benni mwen an chay paski mwen ka fè tout sa mwen pé pou viv an ling épi pwensip Bib. Anfen, si mwen té ni pou ékwi tout sé bennédiskyon-an i ja ban mwen, mwen sav mwen té kay sa ékwi on liv. Lavi mwen dou, mwen ni bon jan èk tjè mwen kontan.
Èk wi, mwen enmen baseball toujou, mé sa sé pa pli enpòtan bagay-la an lavi mwen. Apwézan, mwen enmen Jéhova èk pèp li plis pasé pyès lòt bagay! Bon. Lè mwen té ka jwé baseball, moun té ka onnowé mwen èk mwen té ka fè an chay lajan, mé sé bagay sala pa té diwé. Vwéman, sa Bib-la di an 1 Jan 2:17 sé lavéwité. La i di: “Épi latè-a épi tout sé bagay-la ki andidanʼy-lan moun anvi-a kay fini anyen, mé moun-lan ki fè sa Bondyé vléʼy fè-a kay viv pou tout tan.”