Piyonnè

Yon mannyè nou sa sèvi kouway nou, sé an sèvis Jéhova. (1 Kòr. 9:26) La pa ni djè tan avan vyé sistèm sala bout, konsa, si nou ni an plan sa kay édé nou pou sèvi tan nou byen. (Èfés. 5:15, 16) Diwan létid fanmiʼw, diskité sa zòt vlé fè an lanné sèvis nèf-la. Pou asistéʼw, ti liv mitin sala, ni atik ki ni diféwan sijèsyon ki sa édéʼw. Alò, pwan tan pou gadé sé sijèsyon-an èk mandé Jéhova pou èd.—Jémz 1:5.

Pou ègzanp, ès fanmi-an sa twavay ansanm pou édé yon moun an fanmi-an pou wann sèvis kon an piyonnè wéglé? Siʼw pa asiwé ou sa fè tan-an an piyonnè sipozé fè, ou sa mandé déotwa piyonnè wéglé pou sijèsyon asou sa ou sa fè. (Pwov. 15:22) Osi, ou sa envité an piyonnè asou létid fanmiʼw, èk pitèt ou sa mandéʼy koumannyè i ka fè tanʼy an minis-la. Apwé sa, ékwi mannyè ou sa fè tan-an an piyonnè sipozé fè. Si ou té ja wann sèvis kon an piyonnè an tan pasé, gadé pou wè si sitiwasyonʼw kay pèwmitéʼw pou fè sa ankò.

Ès déotwa moun an fanmiʼw sa piyonnè òkzilè pou yonndé mwa? Ében, menm si ou pa ni djè fòs, ou sa piyonnè òkzilè. Pitèt ou sa pasé an ti tan an minis-la toulé jou. Osi, siʼw an lékòl, ében ou ka twavay ou sa chwazi an mwa ki ni an hòlidé, ében an mwa ki ni senk (5) wikenn pouʼw piyonnè òkzilè. Ékwi ki mwa ou vlé wann sèvis kon on piyonnè òkzilè, èk osi ékwi mannyè ou kay fè tanʼw.—Pwov. 21:5.

GADÉ VIDIYO-A PWAN KOUWAJ . . . PIYONNÈ, ÈK APWÉ WÉPONN KWÈSYON SALA:

• Jéhova ka otjipé moun ki ka fè sakwifis pou piyonnè. Ki mannyè èspéyans sésé Aamand ka moutwé sa?