Ni Konfyans Jéhova Kay Pwotéjé Nou Lè Sistèm Sala Bout

Toutalè Jéhova pa kay ni pasyans épi lézonm ankò. Sé gouvèdman-an kay détwi fo wilizyon, on gwoup nasyon kay ataké pèp Bondyé, èk Jéhova kay détwi lé méchan diwan Anmagèdonn. Kwityen byen èksité kon yo ka èspéwé sé bagay enpòtan sala pou fèt.

Nou pa konnèt tout sé détay-la konsèné gwan twibilasyon-an. Pou ègzanp, nou pa konnèt ègzaktiman ki lè gwan twibilasyon-an kay koumansé. Nou pa konnèt ki wézon sé gouvèdman-an kay bay pou yo ataké wilizyon. Osi nou pa konnèt kisa sé gwoup nasyon-an kay fè lè yo ataké pèp Bondyé. An plis di sa, nou pa konnèt pou ki mizi tan yo kay ataké nou. Èvèk nou pa sav ègzaktiman ki mannyè Jéhova kay détwi lé méchan diwan Anmagèdonn.

Kanmenm, sé lévanjil-la ka di nou tout sa nou bizwen konnèt pou nou sa ni konfyans épi kouwaj lè sistèm sala bout. Pou ègzanp nou sav nou ka viv an bout “dènyé tan-an”. (2 Tim. 3:1) Nou sav lè sé gouvèdman-an ataké wilizyon sa pa kay diwé pou on lonng tan, konsa, wilizyon vwé-a pa kay détwi. (Maf. 24:22) Osi nou sav Jéhova kay sové pèp li. (2 Pita 2:9) Èvèk nou sav Moun-lan Jéhova chwazi pou détwi lé méchan, épi pou pwotéjé gwan latilyé-a diwan Anmagèdonn, sé on Moun ki dwèt épi ki ni an chay pouvwa.​—Wév. 19:11, 15, 16.

Sé bagay-la ki kay fèt an tan ki ka vini kay fè moun “tèlman pè yo kay kon yon fèy ki fennen”. Mé si nou li èk mèdité asou sa Jéhova ja fè an tan pasé pou sové pèp li, épi asou saʼy ja di nou konsèné tan ki ka vini, nou sa “doubout épi gadé anlè,” èvèk ni konfyans-lan ki, touswit Jéhova kay délivwé nou.​—Louk 21:26, 28.