Pwépawé Apwézan Pou Sitiwasyon Médikal Ki Pé Fèt Sibitman

Pouki ou sipozé pwépawé? Ou bizwen pwépawé paski sibitman ou pé ni pou aji épi on sitiwasyon médikal ében ou pé ni pou alé lopital. Alò si’w fè tout sa’w pé pou pwépawé avan ou ni on sitiwasyon kon sa, i kay pli ézé pou’w twapé bon otjipasyon. Osi, lè’w fè tout sa’w pé pou pwépawé, ou ka moutwé ou ka wèspèkté lwa Jéhova konsèné san èk ou ka moutwé ou ni wèspé pou lavi.​—Twavay 15:28, 29.

Kisa ou sa fè pou pwépawé?

• Pwédyé èk pwan tan’w pou plen kat-la, ‘durable power of attorney’ (DPA).a Sé fwè èk sè-a sa twapé on DPA kat pou kò yo èk Identity Card (ic) pou ich yo hòd sé ansyen-an.

• Si’w ansent mandé sé ansyen-an pou fòm-lan Information for Expectant Mothers (S-401). Enfòmasyon-an asou fòm sala kay édé’w fè bon disizyon konsèné sitiwasyon médikal ou pé èspéyansé diwan tan-an ou ansent, èk lè’w ka akouché.

• Si’w sav ou ni pou alé lopital, ou ni pou fè on lopowasyon ében ou bouzwen twètman ki ni pou fè épi san, di sé ansyen-an sa andavans. Osi, di sé dòktè-a èk sé nòs-la an lopital-la ou kay kontan pou sé ansyen-an vizité’w.

Kisa sé ansyen-an sa fè pou édé’w? Sé ansyen-an sa édé’w plen DPA kat-la. Kanmenm lè’y vini pou twètman médikal, sé ansyen-an pa kay fè disizyon’w ba’w èk yo pa kay di’w sa yo té kay fè si yo té an sitiwasyon’w. (Ronm 14:12; Galécha 6:5) Lè’w di sé ansyen-an ou ni on sitiwasyon médikal ki ni pou fè épi san, yo kay palé épi Konmité-a Pou Konminiké Épi Lopital-la konsèné sitiwasyon’w.

Kisa Konmité-a Pou Konminiké Épi Lopital-la sa fè pou édé’w? Ògannizasyon-an ja étwennen sé fwè-a ki ka wann sèvis asou Konmité-a Pou Konminiké Épi Lopital-la, an mannyè-a pou palé épi moun kon dòktè èk avoka, konsèné pozisyon Témwen Jéhova konsèné san. Konsa sé fwè sala sa palé épi dòktè’w konsèné diféwan bagay ki pa ni san yo sa sèvi pou twété’w. Osi yo sa édé’w twapé on dòktè ki kay otjipé’w san’y sèvi san.

GADÉ VIDIYO-A KI MANNYÈ NOU SA FÈ BON DISIZYON KONSÈNÉ SANTÉ NOU LÈ’Y VINI POU SAN? ÈK APWÉ WÉPONN KWÈSYON SALA:

• Kisa ou apwann an vidiyo-a ki sa édé’w pwépawé si antouka sibitman ou ni on sitiwasyon médikal ki ni pou fè épi san?

  Wépons ou