Bondyé Envité Ou Pou Vini Jan’y

Bondyé vlé ou fè jan épi’y. Ès si’w ja janmen katjilé ki ou sa fè jan épi Moun-an ki pli enpòtan an inivès-la? Yo kwiyé Abrahanm, ki viv an tan lontan, jan Bondyé. (Jémz 2:23) Bib-la mansyonnen lézòt moun osi ki enjwi jan épi Bondyé èvèk jwenn gwan bennédiksyon. An tan jòdi, moun ki sòti an tout diféwan plas an latè-a ja vini jan Bondyé. Ou osi sa fè jan épi Bondyé.

Lè ou sé jan Bondyé I pli mèyè pasé lè ou ni lézòm pou jan’w. Bondyé pa kay janmen dézapwenté jan’y ki fidèl. (Sam 18:25) Lè ou sé jan Bondyé I pli mèyè pasé wichès. Lè an moun ki wich mò, sé lézòt moun ki ka jwenn lajan’y. Kanmenm, moun ki ka enjwi jan épi Bondyé ni an wichès pyèsonn pa sa pwan.—Mafyou 6:19.

La ni moun ki pé éséyé anpéché’w apwann konsèné Bondyé. Jis jan’w èvèk fanmi’w ki pé fè sa. (Mafyou 10:36, 37) Si lézòt pwan’w sèvi wizib ében mennasé’w, mandé kò’w, ‘Ki moun mwen vlé plè—lézòm ében Bondyé?’ Katjilé asou sa: Si an moun di’w pou pa manjé, ès si ou kay kouté’y? Mé non! Ou bizwen manjé pou’w viv. Mé Bondyé sa fè’w viv pou tout tan! Kon sa, pa janmen kité pyèsonn anpéché’w apwann mannyè ou sa fè jan épi Bondyé.—Jan 17:3.