Pawadi-a Opwé!

Sé mové bagay-la ki ka fèt asou latè-a ka moutwé ki Pawadi-a opwé. Bib-la té ja di ki nou té kay wè tan ki téwib avan Pawadi-a vini. Nou ka viv an tan sala apwézan! Mi déotwa bagay Bib-la di ki té kay fèt:

Gwan ladjè. “Nasyon kay goumen kont nasyon èvèk wéyòm kont wéyòm.” (Mafyou 24:7) Pwofèsi sala ja vini vwé. Dépi lanné 1914, la té ni dé gwo ladjè an latè-a èvèk an chay lòt ti ladjè. Milyon di moun ja mò an sé ladjè sala.

Maladi toupatou. La kay ni “maladi an yon plas apwé an lòt.” (Louk 21:11) Ès si sa ja vini vwé? Wi. Kansè, maladi tjè, tibi, pisa dou, sida, èvèk lòt diféwan maladi ja tjwé milyon di moun.

Lafen. Toupatou an latè-a la ni moun ki pa ni asé pou manjé. Milyon di moun ka mò pa lafen chak lanné. Sa sé an lòt sin ki Pawadi-a kay la touswit. Bib-la di: “La kay ni lafen.”—Mak 13:8.

Twanblanntè. “La kay ni . . . twanblanntè an yon plas apwé an lòt.” (Mafyou 24:7) Sa ja vini vwé an tan nou osi. Pli pasé yon milyon moun ja mò an twanblanntè dépi lanné 1914.

Lé Méchan. Moun kay “enmen lajan” èvèk “kwè yo enpòtan.” Yo kay “enmen plézi pito yo enmen Bondyé.” Manmay kay “dézobéyi manman yo èvèk papa yo.” (2 Timòfi 3:1-5) Ès si’w pa dakò ki la ni an chay moun kon sa an tan jòdi? Yo pa ni pyès wèspé pou Bondyé, èvèk yo ka fè’y difisil pou moun ki ka éséyé apwann konsèné Bondyé.

Kwim. La kay ni “pli movèzté” osi. (Mafyou 24:12) Pitèt ou kay dakò ki kwim ja vini pli mové pasé avan. Moun toupatou an wis twapé afèkté pa moun ki ka vòlè, kwennen, ében fè yo ditò.

Tout sé bagay sala ka moutwé ki Wéyòm Bondyé opwé. Bib-la di: “Lè’w wè sé bagay sala ka fèt, sav ki wéyòm Bondyé opwé.” (Louk 21:31) Ki sa ki Wéyòm Bondyé? I sé gouvèdman Bondyé ki an syèl ki kay mennen Pawadi asou latè sala. Wéyòm Bondyé kay wiplasé gouvèdman lézòm.—Dannyèl 2:44.