Ki Sa Ki Kondisyon Lé Mò?

Lavi èvèk lanmò diféwan konplètman. Lanmò sé menm kon lè’w ofon sonmèy. (Jan 11:11-14) Lé mò pa sa tann, wè, palé, ében katjilé anyen. (Ékléziyastis 9:5,10) Wilizyon ki fo ka enstwi ki lé mò ka alé adan an plas koté lèspwi ka wèsté pou viv épi ayèl yo. Sé pa sa Bib-la ka enstwi.

Moun ki ja mò pa sa édé nou, èvèk yo pa sa fè nou ditò. Souvanman moun ka fè mès èvèk sakwifis yo kwè ki kay plè moun ki ja mò. Sa ka déplè Bondyé paski sa établi asou yonn an sé mansonj Satan-an. I pa sa plè lé mò nonplis, paski yo pa ni lavi. Nou pa sipozé pè lé mò ében adowé yo. Nou sipozé adowé Bondyé sèlman.—Mafyou 4:10.

Lé mò kay viwé viv ankò. Jehovah kay lévé lé mò pou viv an pawadi asou latè. Sa kay fèt an tan pwochen. (Jan 5:28, 29; Twavay 24:15) Bondyé sa lévé moun ki ja mò menm kon ou sa lévé an moun ki ofon sonmèy.—Mak 5:22, 23, 41, 42.

Katjil-la ki nou pa ka mò sé an mansonj Satan Denmou-an ka simen. Satan èvèk sé vyé lèspwi’y-la ka fè moun kwè ki lèspwi lé mò ka viv èvèk yo sa annékòz maladi èvèk lòt pwòblenm. Délè, Satan ka sèvi wèv èvèk vizyon pou kwennen moun. Jehovah ka kondanné moun ki ka éséyé palé bay lé mò.—Ditonronnonmi 18:10-12.