Bondyé Fè Syèl Èk Latè

Sé Jéhova ki Kwéyatè nou. Sé li ki fè tout bagay, ni sa nou sa wè ni sa nou pa sa wè. Mé avan i fè sé bagay-la nou sa wè, i fè an chay nanj. Di mwen, ès ou konnèt ki sa nanj yé? Ében nanj sé lèspwi Jéhova fè èk yo menm kon li. Menm mannyè nou pa sa wè Jéhova, nou pa sa wè nanj. Pwèmyé nanj-lan Jéhova té fè, édé’y fè tout lòt bagay. Nanj sala édé Jéhova fè sé étwal-la, sé plannèt-la, èk tout lòt bagay. Yonn an sé plannèt-la i édé’y fè sé latè-a, bèl plas-la koté nou ka viv.

Apwé sa, Jéhova pwépawé latè-a pou zannimo èk lézòm sa viv asou’y. Apa di sa, i fè sòlèy-la pou bay latè-a klèté. I osi fè montany, lanmè èk lawivyè.

Bon, ki sa ki fèt apwé? Mi sa Jéhova té di: ‘Mwen kay fè zèb, plan èk pyé bwa lévé.’ Alò tout sòt kalité fwi, lédjim, èk flè koumansé lévé. Apwé, Jéhova fè tout sé zannimo-a. I fè zannimo ki sa volé, sa ki ka najé, sa ki ka hédi, èk lòt ki ka maché. I fè ti zannimo tèl kon lapen, èk gwo zannimo kon léfan. Di mwen, ki zannimo ou pli kontan?

Apwé, Jéhova di pwèmyé nanj-lan: “Annou fè lézòm.” Kanmenm lézòm èk zannimo té kay diféwan. Ki mannyè? Lézòm té kay sa fè bagay ki pa té janmen la avan. Yo osi té kay sa palé, wi, èk pwédyé. Apa di sa, yo té kay gadé apwé latè-a èk sé zannimo-a. Ès ou konnèt ki moun pwèmyé nonm-lan té yé? Ében nou kay apwann sa touswit.