Yon Èslav Ki Té Obéyi Bondyé

Jozèf sété gason Jakòb. Jakòb té ni wonz «11» gason, èk Jozèf té avan dènyé-a. Mé, Jakòb té enmen Jozèf pli pasé i té enmen sé lézòt gason’y-lan. Lè sé pli gwan fwè-a wè sa, yo té jalou Jozèf, èk yo té hayi’y. Jozèf té ni yonndé wèv ki té dwòl, èk i di sé fwè’y-la sa’y wévé. Yo kwè sé wèv-la té vlé di, yo té kay ni pou abésé kò yo douvan’y. Ében, yo té ja hayi Jozèf, mé sé wèv-la fè yo hayi’y pli ankò!

Yon jou, sé pli gwan fwè-a té ka otjipé twipo mouton yo adan on plas ki té toupwé vil Chikèm. Konsa Jakòb di Jozèf, pou alé wè ki mannyè yo té yé. Paditan Jozèf té lwen toujou, sé fwè’y-la wè’y ka vini èk yo di yonn a lòt, ‘Mi ti boug-la ki ka toujou wévé-a ka vini. Annou tjwé’y!’ Lè Jozèf wivé, yo tjébé’y épi yo ladjé’y andidan on pi. Mé pi-a pa té ni dlo adan’y a lè-a. Apwé on ti tan, fwè-a yo té ka kwiyé Jouda di sé lézòt-la: ‘Pa tjwé’y! Annou vann li kon yon èslav pito.’ Épi sé kon sa yo vann Jozèf pou ven «20» pyès dajan, bay on gwoup machann ki té ka pasé. Sé machann-lan sété moun péyi Midiyann, mé yo té an wout ka alé péyi Éjip.

Apwé sé fwè-a vann Jozèf, yo tjwé on bouk kabwit èk yo twanpé had Jozèf an san bouk kabwit-la. Lè yo fini, yo voyé had-la bay papa yo, èk yo di’y: ‘Gadé sa pou wè si sé had gason’w-lan ki la.’ Lè Jakòb wè kantité san ki té asou had-la, i annèk di, on bèt féwòs tjwé Jozèf, èk i mété pléwé atè. Jakòb té an tèlman lapenn, pyèsonn pa té sa konsolé’y.

Bon, lè Jozèf wivé péyi Éjip, sé machann Midiyann-lan vann li. Kou sala, yo vann li kon yon èslav bay an nonm yo té ka kwiyé Pòtifa. Nonm sala té ni on gwo pozisyon an péyi Éjip. Mé, Jéhova té épi Jozèf. Jéhova fè Pòtifa wè, Jozèf té ka twavay byen, èk i fè’y wè, Jozèf sété on moun li Pòtifa té sa konfyé. Konsa, i pa té pwan djè tan avan Pòtifa mété Jozèf wèskonsab tout sa’y té ni.

Mé, madanm Pòtifa té ka wè, Jozèf sété on bèl jenn boug ki té fò, èk i té ni zyé pou Jozèf. Konsa toulé jou, i té ka mandé Jozèf pou kouché épi’y. Mé Jozèf pa janmen dakò pou fè sa. Jozèf di madanm-lan: ‘Non, sa pa bon pyès! Mèt mwen ni konfyans an mwen, èvèk ou sé madanm li. Si mwen kouché épi’w, sa sé on péché mwen kay fè kont Bondyé!’

Yon jou, madanm Pòtifa tjébé had Jozèf, èk i éséyé fòsé Jozèf pou kouché épi’y. Mé Jozèf kité had li an lanmen madanm-lan, èk i pitjé kouwi. Lè Pòtifa viwé lakay li jou sala, madanm-lan manti asou Jozèf. I di mawi’y kon sa, Jozèf té ka éséyé pou kouché épi’y. Lè Pòtifa tann sa i té tèlman faché, i fè yo mété Jozèf an pwizon. Mé, Jéhova pa janmen obliyé Jozèf.