LISON 30

Réhab Séwé Sé Èspyon-an

Sé èspyon-an Jòchwa té voyé vil Jèriko, té wété kay an madanm yo té ka kwiyé Réhab. Lè wa Jèriko vin konnèt sa, i voyé sòlda lakay Réhab. Réhab séwé sé èspyon-an asou tèt kay-la, èk i fè sé sòlda pwan chimen kochi. I di sé èspyon-an: ‘Mwen kay édé zòt paski mwen sav Jéhova épi zòt, èk zòt kay pwan péyi-a an lanmen nou. Tanpwi souplé, pwonmèt mwen zòt kay sové fanmi mwen.’

Sé èspyon-an di Réhab: ‘Nou ka pwonmèt ou sa. Anyen pa kay wivé pyèsonn ki an kay ou.’ Yo osi di Réhab: ‘Mawé an kòd wouj an finèt kay-la èk tout fanmi’w kay chapé.’

Rahab’s house, with a red cord tied in the window, remains standing while the walls of Jericho crash down

Réhab bay sé èspyon-an an kòd pou yo sa désann pa finèt. Yo ay séwé an sé mòn-nan pou twa «3» jou. Apwé sa yo viwé ay jwenn Jòchwa. Pli ta manmay Izwayèl twavèsé Lawivyè Jouden-an èk yo pwépawé pou pwan péyi-a. Jèriko sété pwèmyé vil-la yo pwan. Jéhova té di yo pou maché won vil-la, yon fwa pa jou, pou si «6» jou. Asou sètyenm jou-a, yo maché won vil-la sèt «7» fwa. Apwé yo fè tout sa, sé pwèt-la kòné twonpèt yo èk sé sòlda-a fè kwi épi tout fòs yo. Pak vil-la tonbé nèt! Mé kay Réhab ki té asou pak-la doubout fò. Réhab èk fanmi’y té chapé paski Réhab té ni konfyans an Jéhova.

“Sété menm mannyè-a èk Réhab. . . . Bondyé té aksèptéʼy kon an madanm ki dwèt douvanʼy, pou lapéti sa i fè-a. I té wisivwè sé nonm Izwayèl-la ki té alé gadé tè-a an sigwé, èk i té séwé yo épi i fè yo pasé adan an lòt chimen pou déviwé lakay yo.”—Jémz 2:25