Jòchwa Èk Jan Gibyonn

Plizyè lòt nasyon an Kénann tann sa ki té fèt an Jèriko. Kon sa, wa sé nasyon sala désidé pou mété tèt yo ansanm pou goumen kont nasyon Izwayèl. Mé jan Gibyonn té ni an diféwan plan. Yo mété vyé had déchiwé asou yo, èk yo ay oti Jòchwa. Yo di’y: ‘Nou sòti adan an péyi ki byen lwen. Nou ja tann moun palé di Jéhova, èk tout sa i fè bay zòt an Éjip èk an péyi Mowab. Pwonmèt nou zòt pa kay ataké nou, èk nou kay vini sèvant zòt.’

Jòchwa kwè sa yo té di’y-la èk i pwonmèt i pa té kay ataké yo. Kanmenm, twa «3» jou apwé, Jòchwa vin apwann yo pa té sòti adan an péyi ki lwen. Anfen, yo sété jan péyi Kénann. Alò, Jòchwa mandé yo: ‘Pouki zòt manti ban nou?’ Yo wéponn: ‘Nou té pè! Nou sav Jéhova, Bondyé zòt ka goumen pou zòt. Tanpwi souplé, pa tjwé nou.’ Kon sa Jòchwa tjenn pwonmèt-la i té fè épi yo, èk i pa tjwé yo.

An ti tan apwé, senk «5» wa Kénann èk lawmé yo té vlé ataké jan Gibyonn. Jòchwa èk lawmé’y maché tout lannwit pou vin édé yo. Batay-la koumansé byen bonnè li denmen. Sòlda jan Kénann koumansé kouwi an tout diwèksyon. Mé tout koté yo kouwi, Jéhova fè gwo boul laglas tonbé asou yo. Apwé sa, Jòchwa mandé Jéhova pou pa kité sòlèy-la kouché. Bon sòlèy ka kouché toulé jou. Kon sa pouki Jòchwa té mandé Jéhova pou pa kité sòlèy-la kouché? Ében sé paski Jòchwa té ni konfyans an Jéhova. Alò, sòlèy-la pa té kouché jis tan lawmé Izwayèl té fin bat sé wa Kénann-nan èk lawmé yo.