An Lèt Hòd Pwensipal Konmité-a

Fwè èk Sè:

Nou sèvant Jéhova, enmen Bib-la. Nou asiwé sé wakont-lan ki ékwi adan’y vwé. Bib-la ka bay bon konsèy nou sa sèvi an lavi nou, èk i ka osi ban nou wézon pou kwè Jéhova enmen lézòm an pil. (Sam 119:105; Louk 1:3; 1 Jan 4:19) Nou vwéman vlé édé lòt moun apwann lavéwité-a ki an Bib-la. Alò, sé plézi nou pou pwézanté’w épi liv-la: “Annou Apwann An Ègzanp Moun Ki An Bib-la.” Mi an ti lidé asou sa ki an liv-la.

Liv sala ékwi pli épi manmay an lidé. Kanmenm, ou sa osi sèvi’y pou édé moun ki pli gwan ki vlé konnèt pli asou sa ki an Bib-la. Èvèk paski Bib-la sé an liv pou tout moun, nou sav lè nou pwan tan pou konsidiwé sé lison-an, nou kay twapé bennéfis èk sa kay fè nou ni tjè kontan.

Liv sala ka wakonté listwa lézòm koumansé épi kwéyasyon pou wivé an tan nou. Nou fè fòs kò nou pou ékwi sé lison-an adan an mannyè ki klè èk senp. Èk lè posib, nou ékwi sé wakont-lan ki pwan kou pwèmyé, avan.

Kanmenm, liv-la pa ka sèlman wakonté listwa ki an Bib-la. I osi ni bèl pòtwé èk mannyè yo ékwi enfòmasyon-an, ka fè sé wakont-lan ki an Bib-la pli vivan. Lè sala, nou sa byen konpwann santiman sé moun-nan.

Liv sala ka édé nou wè Bib-la sé an liv ki ni pou fè épi moun. Adan di yo té obéyi Jéhova, èk lézòt pa té obéyi’y. Apa di sa, liv-la ka ankouwajé nou pou apwann lison an ègzanp sé moun sala. (Ronm 15:4; 1 Kòrint 10:6) Liv-la ni katòz «14» sèksyon. An koumansman chak sèksyon, la ni an ti wézimé asou déotwa lison nou kay apwann.

Si ou sé an pawan, pitèt ou sa li yon lison épi ich ou èk diskité sé pòtwé-a an lison-an épi’y. Lè zòt fini, zòt sa pwan Bib-la èk li sé vèwsé-a lison-an bazé asou. Apwé, édé ich ou wè lison-an i fin li-a bazé asou Bib-la. Ou sa fè menm bagay-la lè ou ka édé moun ki pli gwan.

Nou ni èspwa piblikasyon sala kay édé tout moun ki sensè, ni jenn ni gwan, apwann lison an Pawòl Bondyé èk mété sa yo apwann an pwatik an lavi yo. An wézon di sa, yo kay sa sèvi Bondyé kon yon manm fanmi’y.