LISON 14

Fè Sé Pwen-an Ki Pli Enpòtan Klè

Hibrou 8:1

WÉZIMÉ: Édé moun pou swiv diskou’w èk pou konpwann konnèksyon-an ant sé pwen-an ki pli enpòtan èk tit diskou-a.

Désidé sa ou vlé akonpli. Désidé si ou vlé bay moun enfòmasyon, si ou vlé fè moun kwè, èben si ou vlé motivé moun. Èk silon sa ou désidé, dévlopé sijé’w an ling épi sa. Fè asiwé ki, sé pwen-an ki pli enpòtan ou chwazi kay édé’w akonpli sa ou vlé fè.

Mandé kò’w: ‘Ki kwèsyon èben ki òbdjèksyon moun pé lévé konsèné sijé sala? Kouman yo pé lévé sé kwèsyon-an èben sé òbdjèksyon-an konsèné sijé sala?’ Apwé, ògannizé sé pwen-an adan an mannyè pou moun sa swiv èk konpwann sa ou ka di. Sa kay édé yo aksèpté enfòmasyon-an.
Pézé fò asou tit diskou-a. Tanzantan, wépété sèten mo pawòl ki an tit diskou-a èben lòt èspwèsyon ki kay fè moun chonjé diskou-a.
Fè sé pwen-an ki enpòtan klè èk senp. Chwazi sèlman sé pwen-an ki enpòtan ki kay sipòté tit sijé-a. Èk fè asiwé ou sa enstwi sé pwen sala byen, diwan tan-an ou ni pou fè pwézantasyon’w. Pa sèvi twòp pwen ki enpòtan an diskou’w. Fè chak pwen klè, èk di’y adan an mannyè pou édé moun wéyalizé sa sé an pwen ki enpòtan. Pwan an ti pòz avan ou alé asou lòt pwen-an. Kanmenm, lè ou ka alé asou lòt pwen-an fè sa adan an mannyè ki natiwèl.

An entwodiksyon’w, ou pé mansyonnen sé pwen-an ki pli enpòtan pou édé moun swiv pwézantasyon’w. Èben, ou pé wépété yo an finisman diskou’w pou édé moun chonjé sé pwen-an ki pli enpòtan.