LISON 26

Pouki Mové Bagay Ka Fèt? Èk Pouki Moun Ka Soufè Konsa?

Printed Edition

Lè mové bagay fèt, an chay moun ka mandé: “Pouki bagay konsa ka fèt?” Kanmenm, nou sa pwan tjè paski Bib-la ka ban nou wépons-lan pou kèstyon sala!

1. Kisa Satan fè ki annékòz movèsté pou koumansé asou latè-a?

Satan, Denmou-an, té vlé kondwi lézòt. Konsa, i wébèl kont Bondyé épi i enflouwansé Adanm épi Èv pou wébèl kont Bondyé osi. Mi sa’y fè; i manti bay Èv. (Jennésis 3:1-5) I di Èv, la ni on bon bagay Bondyé pa vlé’y ni. I fè Èv kwè, lavi lézòm té kay pli mèyè si yo pa obéyi Bondyé. Lè Satan té di Èv i pa kay mò, sa sété pwèmyé mansonj-lan. Alò, Bib-la di nou, Satan “sé on mantè èk sé li ki papa tout mantè.”—Jan 8:44.

2. Ki disizyon Adanm épi Èv té fè?

Jéhova té bay Adanm épi Èv tout sa yo té bizwen. I di yo, yo té sa manjé hòd tout pyé fwi ki an jaden-an antiwan yonn. (Jennésis 2:15-17) Mé yo désidé pou pa obéyi Bondyé. An Jennésis 3:6 Bib-la di nou: ‘[Èv] koumansé tjouwi fwi asou pyé bwa-a èk i koumansé manjé’y.’ Pli ta, Adanm ‘koumansé manjé’y’ osi. Yo dé-a dézobéyi koumand Bondyé. Adanm épi Èv té pawfé. Alò, yo té sipozé fè sa ki dwèt. Konsa, lè yo dézobéyi Bondyé, yo pa té fè on lèwè. Sa sété on disizyon yo fè pou moutwé yo pa té vlé Bondyé kondwi yo. Lè sala yo péché, èk disizyon sala annékòz yo pou soufè.—Jennésis 3:16-19.

3. Ki mannyè dézobéyisans Adanm épi Èv ka afèkté nou?

Lè Adanm épi Èv péché, yo vini enpawfé. Konsa, tout désandan yo té kay fèt enpawfé osi. Bib-la di nou konsèné Adanm an Ronm 5:12: “Sé yon nonm ki mennen péché an latè sala, épi péchéʼy mennen lanmò. Bon, kon tout moun ja péché-a, kon sa tout moun oblijé mò.”

Konsa, pouki nou ka soufè? Ében nou ka soufè pou plizyè diféwan wézon. Délè, nou ka soufè pou lapéti mové disizyon nou fè. Èk délè, nou ka soufè pou lapéti mové disizyon lézòt moun fè. Apa di sa, nou ka soufè paski kon Bib-la di, mové moman èk bagay nou pa té ka èspéyé ka wivé tout moun.—Li Ékléziyastis 9:11.

ANNOU APWANN PLI

Apwézan, nou kay apwann pouki Bondyé pa wèskonsab pou movèsté-a èk soufwans-lan ki an latè-a jòdi jou. Èk nou kay apwann kouman i ka santi lè i ka wè nou ka soufè.

4. Moun-lan ki wèskonsab pou soufwans nou

An chay moun ka kwè sé Bondyé ki ka kondwi latè-a. Ès sa vwé? Annou gadé VIDIYO-A.

VIDIYO: Ki Moun Ki Ka Kondwi Latè-a? (1:24)

Annou li Jémz 1:13 èk 1 Jan 5:19, èk apwé nou kay kozé asou kèstyon sala:

Ès Bondyé wèskonsab pou soufwans èk movèsté?

5. Gadé sa ki ka fèt anba kondwit Satan

Annou gadé VIDIYO-A.

VIDIYO: Pouki Bondyé Ka Kité Moun Soufè Kon Sa?—An Ti Pòsyon (3:07)

Annou li Jennésis 3:1-6, èk apwé nou kay kozé asou sé kèstyon sala:

Silon vèwsé 4 èk 5, ki mansonj Satan té di?
Kisa Satan té di pou fè moun kwè, la ni on bon bagay Bondyé pa vlé yo ni?
Silon sa Satan di, ès lézòm bizwen Jéhova pou kondwi yo pou yo sa ni on bon lavi?

Annou li Ékléziyastis 8:9, èk apwé nou kay kozé asou kèstyon sala:

Paski sé pa Jéhova ki ka kondwi latè-a, kisa ki ja fèt?

Collage: Scenes depicting the condition of the earth from its creation until the future Paradise. A. An earthly paradise with lush vegetation. B. Human rulership over the centuries filling the world with false religion, division, warfare, and pollution. Some of the powerful governments pictured are Egypt, China, Greece, Rome, Great Britain, and the United States. C. People living in the restored Paradise earth.

Adanm épi Èv té pawfé èk yo té ka viv adan on Pawadi. Mé yo kouté Satan, èk yo wébèl kont Jéhova
Apwé yo wébèl kont Jéhova, latè-a vini plen épi péché, soufwans èk lanmò
Jéhova kay mennen an bout pou péché, soufwans èk lanmò. Èk lè’y fè sa, lézòm kay vini pawfé ankò èk yo kay viv adan Pawadi

6. Jéhova pa vlé nou soufè

Ki mannyè Bondyé ka santi, lè’y wè nou ka soufè? Annou konsidiwé sa Wa David èvèk zapòt Pita té di. Annou li Sam 31:7 èk 1 Pita 5:7, èk apwé nou kay kozé asou kèstyon sala:

Kouman ou ka santi pou konnèt, Jéhova ka wè lè nou ka soufè èk i vlé édé nou?

7. Jéhova kay mennen an bout pou tout soufwans nou

Annou li Izaya 65:17 èk Wévélasyon 21:3, 4, èk apwé nou kay kozé asou kèstyon sala:

Pouki i ka konfòté nou pou sav, Jéhova kay tiwé tout bagay ki ka fè nou soufè?

Ès ou té sav?

Lè Satan té di pwèmyé mansonj-lan, i sali non Jéhova. I fè moun kwè Jéhova sé on mové Kondwitè ki pa ni lanmityé èk ki pa jis. Lè Jéhova tiwé tout soufwans nou an tan pou vini, i kay lévé non’y. Sa vlé di, i kay moutwé, mannyè-a i ka kondwi, sé vwéman pli mèyè mannyè-a. Bagay-la ki pli enpòtan pou tout moun an syèl èk asou latè-a, sé pou lévé non Jéhova!—Mafyou 6:9, 10.

ADAN MOUN KA DI: “Sé Bondyé ki ka annékòz soufwans nou.”

Kisa ou té kay di?

CHONJÉ SÉ PWEN SALA

Sé Satan Denmou-an, èk Adanm épi Èv, ki pli wèskonsab pou movèsté-a ki asou latè-a. Jéhova mélé épi nou an chay, épi i pa kontan wè nou soufè. Apa di sa, i kay doubout tout soufwans nou touswit.