LISON 49
Ki Mannyè Fanmiʼw Sa Ni Lakontantman?—Pwèmyé Pa-a
Lè dé moun mayé, yo ka ni èspwa ki, djèwté-a yo ni asou jou mawiyaj yo kay diwé pou tout tan. Épi sa posib. Kwityen ki mayé pou plizyè lanné èk ka fè éfò pou swiv pwensip Bib, sav mawiyaj sa ni djèwté ki ka diwé.
1. Ki konsèy Bib-la ka ba mawi?
Jéhova mété mawi-a tèt-la an fanmi-an. (Li Èfésòs 5:23.) Jéhova vlé an mawi fè bon disizyon bay fanmiʼy. Alò i di mawi: “Enmen madanm ou.” (Èfésòs 5:25) Kisa sa vlé di? Yon mawi ki enmen madanm li kay twétéʼy épi jantiyès. Èk i kay fè sa lè yo lakay yo, èk lè yo anpami moun. Osi, i kay fè tout saʼy pé pou madanm li sa ni lakontantman. I kay pwotéjé madanm li, i kay potjiwé baʼy, èk i kay baʼy atansyon. (1 Timòfi 5:8) Mé sa ki pli enpòtan sé sa, yon mawi ki ni lanmityé, ka édé madanm li pou ni an bon wilasyon épi Jéhova. (Mafyou 4:4) Pou ègzanp, i ka pwédyé épi madanm li, èk i ka li Bib-la épi madanm li. Lè on mawi ka twété madanm li byen, mawi sala kay ni an bon wilasyon épi Jéhova.—Li 1 Pita 3:7.
2. Ki konsèy Bib-la ka ba madanm?
Pawòl Bondyé di, an madanm “oblijé ni wèspé pou mawiʼy.” (Èfésòs 5:33) Mé ki mannyè an madanm sa moutwé i ni wèspé pou mawiʼy? Ében madanm-lan sa katjilé asou sé bon kawaktè-a mawiʼy ni, èk asou tout sa mawiʼy ka fè pou otjipéʼy épi ich yo. An lòt mannyè an madanm ka moutwé i ni wèspé pou mawiʼy, sé lèʼy sipòté disizyon mawiʼy fè an fanmi-an. Osi, i ka moutwé i ni wèspé pou mawiʼy lèʼy ka palé baʼy adan an mannyè ki janti, ki sé douvanʼy ében anpami lòt moun, menm si mawi-a pa ka adowé Jéhova.
3. Kisa dé moun ki mayé sa fè pou fòtifyé mawiyaj yo?
Bib-la di, lè yon nonm épi yon fanm mayé “yo kay kon on sèl moun.” (Mafyou 19:5) Sa vlé di, yo pa sipozé kité anyen afébli lanmityé-a yo ni pou yonn a lòt. Alò, yo ni pou toujou pasé tan épi yonn a lòt. Èk yo ni pou moutwé lanmityé lè yo ka palé épi yonn a lòt, èk di yonn a lòt sa ki an tjè yo. Osi, yo pa sipozé mété anyen, ében pyèsonn douvan moun-lan yo mayé épi-a, antiwan Jéhova. Èk yo ni pou pwan bon pokosyon pou yo pa dévlopé an wilasyon ki pa apwopwiyab épi an lòt moun.
ANNOU APWANN PLI
Apwézan, annou gadé pwensip Bib ki sa fòtifyé mawiyaj ou.
4. Mawi enmen madanm ou èk otjipéʼy byen
Bib-la di, “sé mawi-a ni pou enmen madanm yo menm kon yo enmen kò yo.” (Èfésòs 5:28, 29) Kisa sa vlé di? Annou gadé VIDIYO-A, Mawi, Enmen Madanm Ou Menm Kon Ou Enmen Kòʼw èk apwé nou kay kozé asou kwèsyon sala:
An ki diféwan mannyè an mawi sa moutwé i enmen madanm li, èk i ka otjipéʼy byen?
Annou li Kòlòsé 3:12, èk apwé nou kay kozé asou kwèsyon sala:
Ki mannyè an mawi sa moutwé sé kawaktè sala an mawiyaj li?
5. Madanm enmen èk wèspèkté mawiʼw
Bib-la ka ankouwajé yon madanm pou wèspèkté mawiʼy, ki mawiʼy ka adowé Jéhova opa. Annou li 1 Pita 3:1, 2, èk apwé nou kay kozé asou sé kwèsyon sala:
Si mawiʼw pa ka adowé Jéhova, asiwé ou vléʼy adowé Jéhova. Mé kisa ou kwè ki kay édéʼy pli? Lèʼw ka toujou pwéché baʼy ében lèʼw ni bon kondwit épi ou ka moutwéʼy wèspé? Pouki ou di sa?
Mawi épi madanm sa fè bon disizyon ansanm. Kanmenm, si madanm-lan pa dakò épi on disizyon mawiʼy fè, i sa di mawiʼy sa ki asou lidéʼy adan an mannyè ki janti èk épi wèspé. Mé, i ni pou chonjé sé Jéhova ki bay mawiʼy wèskonsabilité-a pou désidé sa ki pli mèyè pou fanmi-an. Konsa, madanm-lan sipozé fè tout saʼy pé pou sipòté disizyon mawiʼy. Lèʼy fè sa, i ka édé fanmiʼy pou ni lakontantman. Annou li 1 Pita 3:3-5, èk apwé nou kay kozé asou kwèsyon sala:
Ki mannyè Jéhova ka santi lè an madanm ka moutwé mawiʼy wèspé?
6. Ou sa ganyen a bout pwoblenm an mawiyaj ou
La pa ni pyès mawiyaj ki pawfé. Konsa, mawi épi madanm ni pou twavay ansanm pou ganyen a bout difikilté yo pé èspéyansé. Annou gadé VIDIYO-A, Mannyè Pou Fòtifyé Mawiyaj-la èk apwé nou kay kozé asou sé kwèsyon sala:
An vidiyo-a, kisa ki té ka moutwé mawi-a épi madanm li pa té pwé épi yonn a lòt ankò?
Kisa yo té fè pou fòtifyé mawiyaj yo?
Annou li 1 Kòrint 10:24 èk Kòlòsé 3:13. Èk apwé nou li chak lévanjil, nou kay kozé asou kwèsyon sala:
Ki mannyè konsèy sala sa édéʼw pou fòtifyé mawiyaj ou?
Bib-la di, nou sipozé onnowé yonn a lòt. Pou onnowé on moun vlé di, ou ka twété moun-lan adan an mannyè ki janti èk épi wèspé. Annou li Ronm 12:10, èk apwé nou kay kozé asou sé kwèsyon sala:
Lè moun mayé, ès yo sipozé èspéyé pou moun-lan yo mayé épi-a moutwé yo lonnè avan? Pouki ou di sa?
ADAN MOUN KA DI: “Mwen épi madanm mwen, ében mwen épi mawi mwen, pa tèlman pwè kon nou té yé avan.”
Kisa ou té kay diʼy pou moutwéʼy Bib-la sa édéʼy?
CHONJÉ SÉ PWEN SALA
Mawi épi madanm sa ni lakontantman lè yo enmen èk wèspèkté yonn a lòt, èvèk lè yo ka swiv pwensip Bib.
Annou Wivizé Sa Nou Ja Apwann
Kisa yon mawi sa fè pou mawiyaj li ni lakontantman?
Kisa yon madanm sa fè pou mawiyaj li ni lakontantman?
Siʼw mayé, ki pwensip Bib ki sa édéʼw pou fòtifyé mawiyaj ou?
LÒT ENFÒMASYON OU SA GADÉ
Apwann konsèné diféwan bagay ki sa édéʼw pou ni lakontantman an fanmiʼw.
Gadé vidiyo mizik sala ki ka moutwé sé bennédiksyon-an ou sa twapé lèʼw ka swiv konsèy Bondyé an mawiyaj ou.
Ègzanminé saʼy vlé di pou wèspèkté mawiʼw kon tèt fanmi-an.
“Pouki Madanm Ni Pou Wèspèkté Lotowité Mawi Yo?” (Gad-la, li 15 Mé, 2010)
Ki mannyè an madanm èk misyé ganyen a bout mové pwòblenm an mawiyaj yo, tèl kon dévòs?