LISON 54
Ki Moun Ki “Sèvant-lan Ki Ni Lèspwi Épi Ki Obéyisan-an”? Èk Kisa Sèvant Sala Ka Fè?
Èfésòs 5:23 ka di nou “Jézi ni lotowité anlè [kongwigasyon-an]”. Alò, sé Jézi ki mèt kongwigasyon-an. Magwé i an syèl, i apwenté an ‘sèvant ki ni lèspwi épi ki obéyisanʼ.a Èk i ka sèvi sèvant sala pou diwèkté pèp li oliwon latè-a. (Li Mafyou 24:45.) Paski sé Jézi ki apwenté “sèvant-lan” yo ni lotowité pou fè sèten disizyon, mé sèvant-lan ni pou obéyi Jézi èk édé sé fwè Jézi-a. Ki moun ki sèvant sala? Èk kisa sèvant-lan ka fè pou édé nou?
1. Kilès ki “sèvant-lan ki ni lèspwi épi ki obéyisan-an”?
Jéhova té ka toujou sèvi an nonm ében an ti gwoup nonm pou djidé pèp li. (Malakay 2:7; Hibrou 1:1) Pou ègzanp, apwé Jézi mò, sé zapòt-la èk sé ansyen-an an Jérouzalèm té ka djidé pèp Bondyé. (Twavay 15:2) An menm mannyè-a, jòdi, an ti gwoup ansyen ka djidé pèp Bondyé. Nou ka kwiyé ti gwoup sala, Pwensipal Konmité Témwen Jéhova. Sé yo ki ka potjiwé sa pèp Bondyé bizwen pou wèsté fidèl pou Bondyé. Èk yo ka diwèkté twavay pwèchman-an. Pwensipal Konmité-a, sé “sèvant-lan ki ni lèspwi épi ki obéyisan-an” Jézi té apwenté. (Mafyou 24:45 pwèmyé pa-a) Tout sé fwè-a ki asou Pwensipal Konmité-a sé Kwityen ki annonté. Alò sa vlé di, yo ni èspwa-a pou alé an syèl pou kondwi épi Jézi an Wéyòm li.
2. Ki manjé sèvant-lan ki obéyisan-an ka bay?
Jézi té di, sèvant-lan ki obéyisan-an té kay ba Kwityen “manjé lè i lè manjé.” (Mafyou 24:45 dézyenm pa-a) Menm kon manjé-a nou ka manjé ka édé nou pou wèsté fò èk an bon santé, manjé spiwitwèl ka ban nou fòs-la nou bizwen pou wèsté fidèl pou Jéhova. Èk osi i ka édé nou pou fè twavay-la Jézi ban nou pou fè-a. (1 Timòfi 4:6) Manjé spiwitwèl sé lésisyon-an ki sòti an Pawòl Bondyé. Nou ka wisouvwè manjé spiwitwèl lè nou atandé sé mitin-lan, sé asanblé-a, épi sé konvansyon-an. Osi, nou ka wisouvwè manjé spiwitwèl an sé piblikasyon-an èk an sé vidiyo-a. Tout sa ka édé nou konpwann divwa Bondyé, épi yo ka fòtifyé wilasyon nou épiʼy.
ANNOU APWANN PLI
Apwézan, annou apwann pouki nou bizwen “sèvant-lan ki ni lèspwi épi ki obéyisan-an,” ében nou sa di Pwensipal Konmité-a.
Pwensipal Konmité-a ka bay tout Témwen Jéhova oliwon latè-a manjé spiwitwèl, diwèksyon, èvèk èd
3. Pèp Jéhova ni pou twavay ansanm
Pwensipal Konmité-a ka twavay anba diwèksyon Jézi pou ògannizé twavay Témwen Jéhova. Sé Kwityen-an an pwèmyé syèk-la té ni yon awanjman menm kon sa. Annou gadé VIDIYO-A, Jéhova Ka Ògannizé Pèp Li.
Annou li 1 Kòrint 14:33, 40, èk apwé nou kay kozé asou kwèsyon sala:
Ki mannyè sé vèwsé sala ka moutwé, Jéhova vlé pèp li twavay ansanm?
4. Sèvant-lan ki obéyisan-an ka ògannizé twavay pwèchman-an
Twavay pwèchman-an sété twavay-la ki té pli enpòtan pou sé Kwityen-an an pwèmyé syèk-la. Annou li Twavay 8:14, 25, èk apwé nou kay kozé asou sé kwèsyon sala:
An pwèmyé syèk-la, ki moun ki té ka diwèkté twavay pwèchman-an?
Kisa zapòt Pita épi zapòt Jan té fè, lè yo té wisouvwè diwèksyon hòd sé lézòt zapòt-la?
Twavay pwèchman-an sé pli enpòtan twavay-la Pwensipal Konmité-a ka ògannizé. Annou gadé VIDIYO-A, Twavay Pwèchman-an Enpòtan Pou Pwensipal Konmité-a.
Jézi té moutwé twavay pwèchman-an sé an twavay ki byen enpòtan. Annou li Mak 13:10, èk apwé nou kay kozé asou sé kwèsyon sala:
Pouki twavay pwèchman-an si tèlman enpòtan pou Pwensipal Konmité-a?
Pouki nou bizwen “sèvant-lan ki ni lèspwi épi ki obéyisan-an” pou ògannizé twavay pwèchman-an?
5. Sèvant-lan ki obéyisan-an ka bay pèp Bondyé diwèksyon
Pwensipal Konmité-a ka bay pèp Bondyé oliwon latè-a diwèksyon. Ki mannyè Pwensipal Konmité-a sav ki diwèksyon pou bay pèp Jéhova? Ében, annou gadé mannyè Pwensipal Konmité-a an pwèmyé syèk-la té ka bay diwèksyon. Annou li Twavay 15:1, 2, èk apwé nou kay kozé asou sé kwèsyon sala:
Kisa ki té annékòz adan sé Kwityen-an an pwèmyé syèk-la pou ni an chikann?
Ki moun Pòl, Bannabas, èk déotwa fwè té alé oti pou yo té sa wanjé pwoblenm sala?
Annou li Twavay 15:12-18, 23-29, èk apwé nou kay kozé asou kwèsyon sala:
Silon Twavay 15:12, 15, èk 28, an pwèmyé syèk-la, ki koté Pwensipal Konmité-a té ka gadé pou diwèksyon avan yo té fè an disizyon?
Annou li Twavay 15:30, 31 èk chapit 16:4, 5, èk apwé nou kay kozé asou sé kwèsyon sala:
Kisa sé Kwityen-an an pwèmyé syèk-la té fè lè yo wisouvwè diwèksyon hòd Pwensipal Konmité-a?
Ki mannyè Jéhova té benni yo pou obéyisans yo?
Annou li 2 Timòfi 3:16 èk Jémz 1:5, èk apwé nou kay kozé asou kwèsyon sala:
Jòdi, ki koté Pwensipal Konmité-a ka gadé pou diwèksyon lè yo ni pou fè disizyon?
ADAN MOUN KA DI: “Siʼw kouté Pwensipal Konmité-a sé nonm ou ka swiv.”
Pouki ou asiwé sé Jézi ki ka diwèkté Pwensipal Konmité-a?
CHONJÉ SÉ PWEN SALA
Pwensipal Konmité-a sé “sèvant-lan ki ni lèspwi épi ki obéyisan-an” Jézi té apwenté. Nou ka osi kwiyé yo, ‘èslav fidèl-laʼ. Pwensipal Konmité-a ka bay tout Kwityen oliwon latè-a manjé spiwitwèl èvèk diwèksyon.
Annou Wivizé Sa Nou Ja Apwann
Ki moun ki apwenté “sèvant-lan ki ni lèspwi épi ki obéyisan-an”?
Kisa Pwensipal Konmité-a ka fè pou édé nou?
Ès ou vwéman kwè Pwensipal Konmité-a sé “sèvant-lan ki ni lèspwi épi ki obéyisan-an”?
LÒT ENFÒMASYON OU SA GADÉ
Gadé mannyè Pwensipal Konmité-a byen ògannizé.
“Kisa Ki Pwensipal Konmité Témwen Jéhova?” (yon atik asou jw.org)
Apwann mannyè Pwensipal Konmité-a ka fè asiwé nou wisouvwè bon manjé spiwitwèl.
Ki mannyè sé fwè-a ki asou Pwensipal Konmité-a ka gadé twavay-la Jézi ba yo pou fè-a?
Ki mannyè sé mitin nou-an èk sé konvansyon nou-an ka moutwé sé Jéhova ki ka diwèkté Pwensipal Konmité-a?
a Nou ka osi kwiyé yo ‘èslav-la ki fidèl èk ki ni lasajèsʼ an Mafyou 24:45 NWT.