Bib-la Ka Chanjé Lavi Moun

Kisa ki té pousé an Rasta pou koupé chivé’y èk ganyen a bout hayisans i té ni pou jan blan? Èk kisa ki té édé an jenn nonm ki té vyolan, ki té ka anmasé lajan pou moun ki té ka vann dwòg chanjé lavi’y? Annou ègzanminé kisa yo ni pou di.

“Mwen ganyen a bout hayisans mwen té ni pou jan blan.”—HAFENI NGHAMA

LAJ MWEN: 34

MWEN FÈT AN PÉYI: ZAMBIA

AVAN: MWEN TÉ AN RASTA 

LAVI MWEN AN TAN PASÉ: Mwen té fèt adan an kanp an Zambia pou moun ki kité péyi yo a kòz di ladjè. Diwan ladjè-a, manman mwen té kouwi hòd Namibia èk i antwé adan an ògannizasyon yo ka kwiyé South West Africa People’s Organization ében SWAPO. Ògannizasyon sala té ka goumen kont gouvèdman Soud Afwik ki té ka kondwi Namibia an tan sala.

Pou pwèmyé kenz lanné-a an lavi mwen, mwen té ka viv an plizyè kanp SWAPO. An sé kanp sala, yo té enstwi nou pou goumen pou libéwasyon. Osi, yo té enstwi nou zafè pòlitiks èk yo té enstwi nou pou hayi jan blan.

Lè mwen té wonz (11) lanné, mwen té vlé batizé adan an légliz ki té ni diféwan wilizyon tèl kon: Katolik, Lutheran, Légliz Anglé èk lòt wilizyon. Mé pasta-a mwen té palé épi di mwen pa fè sa. Dépi tan sala, mwen doubout kwè an Bondyé. Lè mwen té kenz (15) lanné, mwen koumansé kontan mizik règé. Èk dézi-a mwen té ni pou édé Afwitjen ki nwè pousé mwen pou vini an Rasta paski yo té ka soufè an chay. Alò, mwen té fè chivé mwen vini menm kon an Rasta, mwen koumansé fimen zèb èk mwen doubout manjé vyann. An plis di sa, mwen té ka goumen pou jan nwè twapé libéwasyon. Kanmenm, mwen pa té doubout kouwi vyé lavi èk m’a té doubout gadé pòtwé ki ni vyolans. Èk mwen kontiné sèvi mo sal.

MANNYÈ BIB-LA CHANJÉ LAVI MWEN: An lanné mil nèf san katwiven kenz (1995), lè mwen té ven (20) lanné, mwen koumansé katjilé konsèné sa mwen té kay fè épi lavi mwen. Mwen té ka étidyé tout piblikasyon Rasta mwen té sa twapé. Adan sé piblikasyon sala té ka palé konsèné Bib-la, mé mannyè-a yo té ka èspliké Bib-la pa té ka fè sans pou mwen. Alò, mwen désidé pou li Bib-la pou kò mwen.

Apwé on lè, jan mwen ki té an Rasta té ban mwen on liv Témwen Jéhova té ka sèvi pou étidyé épi moun. Mwen té étidyé liv sala épi Bib-la pa kò mwen. Tjèk tan apwé, mwen jwenn épi Témwen Jéhova èk mwen kontiné étidyé Bib-la épi yo.

Mwen té fè gwo éfò pou doubout fimen èk doubout bwè an chay wonm. I pa té ézé pyès pou fè sé bagay sala. (2 Kòrint 7:1) Osi, mwen fè éfò pou chanjé lapawans mwen. Mwen koupé chivé mwen, mwen doubout gadé pònogwafi èk pòtwé ki ni vyolans. Osi, mwen doubout sèvi mo sal. (Èfésòs 5:3, 4) Piti an piti, mwen ganyen a bout hayisans mwen té ni pou jan blan. (Twavay 10:34, 35) Pou fè sé chanjman sala, mwen té ni pou doubout kouté mizik ki té ka ankouwajé mwen pou hayi jan blan. An plis di sa, mwen té ni pou doubout asosiyé épi jan mwen, paski yo té ka éséyé fè mwen viwé an vyé lavi-a mwen té ka viv avan-an.

Apwé mwen fè sé chanjman sala, mwen té chaché pou an Sal Wéyòm Témwen Jéhova. Èk lè mwen jwenn sé Témwen-an, mwen di yo mwen vlé vini an Témwen Jéhova. Konsa, yo koumansé étidyé Bib-la épi mwen. Mé fanmi mwen té tèlman faché lè mwen désidé pou batizé kon an Témwen Jéhova. Manman mwen di mwen pou chwazi népòt lòt wilizyon “Kwityen” mwen vlé, mé pa Témwen Jéhova. Osi, yon moun an fanmi mwen ki té ni an gwo pwozisyon an gouvèdman-an, té ka toujou kwitijé mwen pou désizyon-an mwen té fè pou asosiyé épi Témwen Jéhova.

Kanmenm, lè mwen apliké sa mwen apwann konsèné Jézi, sitou mannyè-a i té ka twété moun, sa té édé mwen pou aji épi opozisyon. Èk lè mwen konpawé sa Témwen Jéhova ka enstwi épi sa Bib-la ka di, sa fè mwen asiwé mwen té twapé wilizyon vwé-a. Pou ègzanp, Témwen Jéhova ka swiv konmandman Jézi pou pwéché bay lézòt. (Mafyou 28:19, 20; Twavay 15:14) Èvèk yo pa ka mélé kò yo an zafè pòlitiks.​—Samz 146:​3, 4; Jan 15:17, 18.

MANNYÈ MWEN TWAPÉ BENNÉFIS: Sé pwensip-la ki an Bib-la ja édé mwen pou viv an pli mèyè lavi. Pa ègzanp, paski mwen doubout fimen zèb, mwen pa ka gaspiyé lajan mwen chak mwa asou’y. Èk m’a ka wè èben tann bagay ki pa wéyèl ankò. Apwézan, mwen ni pli bon santé.

Jòdi jou, lavi mwen ni an chay valè. Wi, mwen ka viv kalit lavi-a mwen té vlé dépi mwen té an tibway. Èk sa ki pli enpòtan sé, mwen ni an bon wilasyon épi Bondyé.​—Jémz 4:8.

“Mwen té apwann pou kontwolé kòlè mwen.”—MARTINO PEDRETTI

LAJ MWEN: 43

PÉYI MWEN FÈT: AUSTRALIA

AVAN: MWEN TÉ KA VANN DWÒG 

LAVI MWEN AN TAN PASÉ: Fanmi mwen èk mwen té ka wèsté diféwan koté lè mwen té piti. Mwen té ka wèsté an ti vilaj, an gwo vil, èk pou an tan mwen té ka wèsté adan an koté ki té byen lwen lézòt moun. Mwen ka chonjé sé bon tan-an mwen té ni épi sé kouzen mwen-an èk sé tonton mwen-an lè nou té ka wèsté la. Nou té ka péché, nou té ka alé lachas èk nou té ka fè bagay épi bwa.

Papa mwen té ka bòks èk i moutwé mwen mannyè pou bòks lè mwen té byen jenn. A kòz di sa, mwen té vyolan èk mwen té ka toujou goumen. Lè mwen té apipwé kenz (15) lanné, mwen té ka pasé an chay tan an sé kabawé-a ka bwè wonm. Mwen èk sé jan mwen-an té ka toujou chaché pou dézagwéman. Nou té ka sèvi kouto èk bat pou ataké plis pasé ven (20) moun.

Pou mwen fè lajan, mwen té ka vann dwòg èk bagay moun vòlè. Osi, mwen té ka anmasé lajan pou moun ki té ka vann dwòg. Pou mwen sa anmasé lajan-an ba yo, mwen té ka mennasé sé moun-lan ki té ka dwé yo épi fizi mwen. Vwéman, sèl bagay mwen té vlé fè épi lavi mwen, sé pou tjwé moun. Mwen té ka toujou di, swé yo tjwé mwen ében mwen tjwé yo.

MANNYÈ BIB-LA CHANJÉ LAVI MWEN: Lè mwen té ka pwofité, mwen té tann konsèné Témwen Jéhova. Mwen chonjé yon jou, lè mwen té apipwé ven (20) lanné, mwen mandé manman mwen, si’y konnèt ki koté mwen sa jwenn Témwen Jéhova. Èk dé jou apwé, Dixon an Témwen Jéhova, konyen asou lapòt mwen. Apwé nou palè pou tjèk tan, i envité mwen pou atandé an mitin Témwen Jéhova. Mwen aksèpté envitasyon’y èk mwen atandé mitin-lan. Anfen, i ni plis pasé ven (20 lanné) mwen ka atandé sé mitin-lan èk m’a janmen doubout. Sé Témwen-an té sèvi Bib-la pou wéponn tout sé kwèsyon-an mwen té ni.

Pa dé kontan mwen té kontan pou apwann Jéhova entéwésé an nou chak, jis sé moun-lan ki pa ka obéyi’y. (2 Pita 3:9) An plis di sa, mwen té apwann i sé an Papa ki ni an chay lanmityé, èk i kay toujou otjipé mwen menm si lézòt moun pa kay fè sa. Osi, sa ki vwéman soulajé mwen, sé lè mwen apwann i kay pawdonnen péché mwen si mwen chanjé lavi mwen. Sé lévanjil-la ki vwéman touché tjè mwen sé Èfésòs 4:22-24. I di: “mété dèyè do zòt vyé kawakté zòt-la” èk “mété an kawakté ki nèf, épi kawakté sala Bondyé menm ki fè’y pou zòt sa viv kon li menm ka viv-la.” Sé vèwsé sala vwéman ankouwajé mwen pou fè chanjman an lavi mwen.

I té pwan mwen an chay tan pou chanjé lavi mwen. M’a té ka sèvi dwòg diwan simenn-lan mé lè mwen té épi sé jan mwen-an an bout simenn-lan mwen té ka sèvi’y. Mwen té wéyalizé si mwen té vlé chanjé lavi mwen, mwen té ni pou doubout asosiyé épi sé jan mwen-an, konsa mwen désidé pou alé wèsté adan an lòt vil. Adan sé jan mwen-an té di mwen yo té kay alé épi mwen, ék mwen té dakò. Diwan voyaj-la, yo koumansé fimen zèb èk yo ofè mwen. Alò, mwen di yo mwen vlé fini épi sé vyé labitid sala. Konsa, nou sépawé èk mwen kontiné asou voyaj mwen. Èk tjèk tan apwé, mwen vin konnèt sé jan mwen-an té sèvi an fizi pou vòlè an bank.

MANNYÈ MWEN TWAPÉ BENNÉFIS: Lè mwen doubout asosiyé épi sé jan mwen-an, i té pli ézé pou fè sé chanjman-an mwen té bizwen fè an lavi mwen. Konsa, an lanné mil nef san katwiven nèf (1989), mwen batizé kon on Témwen Jéhova. Èk apwé mwen té batizé, sésé mwen, manman mwen èk papa mwen té batizé osi. Apwézan, nou tout ka sèvi Jéhova ansanm.

I ni disèt (17) lanné dépi mwen mayé èk mwen ni twa bèl ich. Mwen apwann mannyè pou kontolé kòlè mwen menm si moun pwovoké mwen. Osi, mwen apwann pou ni lanmityé bay moun ki “sòti an tout nasyon, an tout lafanmi, an tout péyi.” (Wévélasyon 7:9) Anfen, pawòl Jézi an Jan 8:31, 32 ja vini vwé an lavi mwen. I di: “Si ou kontiné fè sa mwen di-a, sé lè sala ou sé disip mwen pou vwé. Ou kay konnèt lavéwité-a, èk lavéwité sala kay fè’w lib.”

[Blurb]

Pou fè sé chanjman sala, mwen té ni pou doubout kouté mizik ki té ka ankouwajé mwen pou hayi jan blan

[Blurb]

Mwen èk sé jan mwen-an té ka toujou chaché pou dézagwéman. Nou té ka sèvi kouto èk bat pou ataké plis pasé ven (20) moun