3 Ki Mannyè Nou Sipozé Pwédyé?

LÈ’Y vini pou lapwiyè, an chay wilizyon ka fiksé asou bagay tèl kon, pozisyon on moun lè’y ka pwédyé, sé mo pawòl-la i ka sèvi, èk lòt bagay yo kwè moun sipozé fè lè yo ka pwédyé. Kanmenm, Bib-la pa ka pézé asou sé bagay sala. Pito sa, Bib-la ka édé nou pou fiksé asou bagay ki pli enpòtan lè’y vini pou lapwiyè. Alò, “Ki mannyè nou sipozé pwédyé?”

Ében, Bib-la ka moutwé sèvant fidèl Jéhova té ka pwédyé an tout kalité sitiwasyon, èk yo té ka pwédyé an diféwan pozisyon tou. Pou ègzanp, silon sitiwasyon-an, yo té ka pwédyé an silans, ében yo té ka pwédyé fò. Yo té ka pwédyé padan yo té ka gadé anlè, èk yo té ka bésé tèt yo pou pwédyé. Osi, yo pa té ka sèvi bagay tèl kon imaj, chaplé, ében liv lapwiyè pou yo pwédyé. Pito sa, yo té ka annèk palé épi Bondyé hòd tjè yo. Mé, kisa ki fè Bondyé kouté lapwiyè yo?

Kon nou té mansyonnen an atik-la avan sala, sé sèlman Jéhova yo té ka adwésé an lapwiyè. Mé si nou vlé Jéhova kouté lapwiyè nou, la ni on lòt bagay byen enpòtan nou ni pou fè, paskè Bib-la ka di: ‘Mi konfyans-lan nou ni an li-a, népòt bagay nou mandé’y, dépi sa nou mandé-a an ling épi volonté’y, i kay kouté nou.’ (1 Jan 5:​14 NWT) Wi, i byen enpòtan pou nou fè asiwé nou ka pwédyé an ling épi volonté Bondyé. Mé kisa sa vlé di?

Ében, avan nou sa wéponn kwèstyon sala, nou ni pou konnèt kisa volonté’y yé. Konsa, i byen enpòtan pou nou étidyé Bib-la, paskè sé sa ki kay édé nou pou apwann kisa ki volonté Bondyé. Mé, ès sa vlé di, si nou pa moun gwo endikasyon ki ka fouyé an Bib-la, Bondyé pa kay kouté lapwiyè nou? Mé non! Sa Bondyé vlé nou fè, sé apwann konsèné volonté’y, èk fè’y. (Mafyou 7:​21-​23) Konsa, nou ni pou pwédyé an ling épi sa nou apwann an Bib-la.

Bon, pli nou apwann konsèné Jéhova épi volonté’y, sé pli lafwa nou kay vini fò. Èk lafwa sé on lòt bagay enpòtan nou bizwen ni, si nou vlé Bondyé kouté lapwiyè nou. Anfen, Jézi té di: “Si ou ni lafwa, népòt bagay ou mandé Bondyé an lapwiyè, i kay fè’y ba’w.” (Mafyou 21:22) Èk lè on moun ni lafwa, sa pa vlé di moun-lan ka kwè tout sa i tann, ében i ézé pou kwennen. Sa’y vlé di sé sa, wi, moun-lan ka kwè adan an bagay i pa sa wè. Mé, i ni an chay èvidans pou moutwé sa’y ka kwè adan-an wéyal. (Hibrou 11:1) Konsa, menm si nou pa sa wè Jéhova, nou sa ni lafwa an li, paskè Bib-la chajé épi pwèv ki ka moutwé, Jéhova sé on Dyé ki wéyal, nou sa dépan asou’y, èk i pawé pou wéponn lapwiyè tout moun ki ni lafwa an li. On lòt bagay sé sa, nou sa mandé Jéhova pou ban nou pli lafwa, èvèk i kay byen kontan pou ban nou lafwa-a nou bizwen.​—Louk 17:5; Jémz 1:​17.

Annou gadé on lòt bagay ki enpòtan lè nou ka pwédyé. Jézi té di: “Sé mwen ki sèl chimen-an ­pou alé jwenn Papa-a.” (Jan 14:6) Osi, ­i té di sé disip li-a pou pwédyé an non’y. Konsa, si nou vlé Bondyé kouté lapwiyè nou, nou ni pou pwédyé an non Jézi. (Jan 14:13; 15:16) Mé sa pa vlé di nou sipozé adwésé Jézi lè nou ka pwédyé. Pou pwédyé an non Jézi vlé di, nou wéyalizé sé sakwifis li ki ka fè’y posib pou nou apwoché Papa nou ki an syèl, on Dyé ki pawfé épi sen.

Yon fwa, sé disip Jézi-a té mandé’y: “Mèt, moutwé nou ki mannyè pou nou pwédyé.” (Louk 11:1) San dout, yo pa té ka mandé Jézi konsèné sé bagay-la nou fini diskité-a. Sa yo té vwéman vlé konnèt sé, ki diféwan bagay yo sa pwédyé konsèné.