Jenn Moun​—Kontiné Fè Pwogwé Apwé Ou Batizé

1. Ki bon bagay an chay jenn moun ja akonpli?

TOULÉ lanné, konmen mil jenn moun ka batizé. Ès ou ja fè sa? Si ou ja fè sa, Jéhova épi tout sé fwè èk sé sè-a ka wéjwi! (Pwov. 27:11) Katjilé pou an ti monman, tout sé bon bagay-la ou ja akonpli. Pou ègzanp, ou ja étidyé Bib-la, pitèt pou plizyè lanné. Ou ni asiwans-lan ki, Bib-la sé Pawòl Bondyé. An plis di sa, ou ja vini konnèt épi enmen Jéhova, Moun-lan ki ban nou Bib-la. Lanmityéʼw pou Jéhova ja pouséʼy pou batizé. Sa sé an bèlté!

2. Kisa nou kay diskité an atik sala?

² San dout, avan ou batizé ou èspéyansé difikilté ki té fèʼy wèd pouʼw wèsté fidèl pou Jéhova. Mé, kon ou kontiné sèvi Jéhova, ou kay èspéyansé pli difikilté. Paski Satan kay fè tout sa i pé, pou fè lanmityéʼy pou Jéhova vini fèb, èk anpéchéʼw sèvi Jéhova. (Èfés. 4:14) Pa janmen kité sa fèt. Konsa, kisa ki kay édéʼw wèsté fidèl pou Jéhova? Ou ni pou kontiné fè pwogwé pouʼw vini matwité “an lafwa-a.” (Hib. 6:1) Ki mannyè ou sa fè sa?

KISA OU SA FÈ POUʼW VINI MATWITÉ AN LAFWA-A?

3. Kisa tout Kwityen ni pou fè apwé yo batizé?

³ Apwé nou batizé, nou tout ni pou swiv konsèy-la zapòt Pòl té bay sé Kwityen-an an Èfésòs. I ankouwajé yo pou “vini [fò an lafwa-a].” (Èfés. 4:13) Sa vlé di, yo té ni pou kontiné fè pwogwé. Zapòt Pòl té konpawé pwogwé-a an Kwityen ka fè, épi mannyè-a an ti bébé ka pwofité. Pawan ka kontan lè yo ni an ti bébé. Kanmenm, ti bébé-a pa ka wèsté piti pou tout tan. Ti bébé-a ka kontiné pwofité jistan i “vini an nonm,” èk i ka “kité tout zafè ti manmay dèyè.” (1 Kòr. 13:11) An menm mannyè-a, apwé nou batizé, nou ni pou kontiné fè pwogwé. Apwézan, annou konsidiwé déotwa bagay ki kay édé pou nou fè sa.

4. Ki kawaktè ki sa édéʼw fè pwogwé an lavéwité-a? Èspliké. (Filipay 1:9)

⁴ Kité lanmityéʼw pou Jéhova pwofité. Ou ja ni lanmityé pou Jéhova mé, ou sa ni pli lanmityé pou li toujou. Ki mannyè ou sa fè sa? An Filipay 1:9. (Li), zapòt Pòl mansyonnen yon mannyè nou sa fè sa. Zapòt Pòl pwédyé pou lanmityé sé Kwityen-an an Filipay, “pwofité plis an plis.” Alò, lanmityé nou sa pwofité. Nou sa fè sa lè nou kontiné apwann “lavéwité-a,” èk moutwé “bon jijman an tout bagay.” Paski, pli nou vini konnèt Jéhova, sé pli nou kay ni lanmityé pou li, èk apwésyé kawaktèʼy épi wèg li. Dézi nou pou plè Jéhova kay vini pli fò, èk nou pa kay vlé fè anyen pou dézapwentéʼy. Osi, nou kay fè tout sa nou pé pou konpwann sa Jéhova vlé nou fè, èk nou ka fèʼy.

5-6. K mannyè nou sa pwofité an lanmityé nou pou Jéhova? Èspliké.

⁵ Jézi ni sé menm bèl kawaktè-a Papaʼy ni. Konsa, lè nou apwann konsèné Jézi, lanmityé nou pou Jéhova kay pwofité. (Hib. 1:3) Pli mèyè mannyè-a pou konnèt Jézi, sé lè nou étidyé sé liv-la, Mafyou, Mak, Louk, épi Jan, an Bib-la. Si ou pòkò ni labitid ka li Bib-la touléjou, ou sa koumansé épi sé wakont sala konsèné Jézi. Épi konʼw ka li, fiksé asou sé bèl kawaktè-a Jézi ni. Pou ègzanp, Jézi té janti, konsa tout moun, jis ti manmay, té konfòtab épiʼy. (Mak 10:13-16) Sé disip li-a osi té konfòtab épiʼy. Yo pa té pè pou diʼy sa ki té an tjè yo. (Maf. 16:22) Jézi té imité sé bèl kawaktè-a Papaʼy ni, konsa, ègzanp li ka moutwé nou, nou sa santi kò nou konfòtab lè nou ka palé épi Jéhova an lapwiyè. Nou sa palé hòd tjè nou, épi nou sa ni konfyans-lan, i pa kay kondanné nou. Jéhova enmen nou, èk i kay kontiné potjiwé ban nou.​—1 Pita 5:7.

⁶ Osi, Jézi té ni konpasyon. Zapòt Mafyou di: “Lè Jézi wè tout sé moun sala, tjèʼy fèʼy mal pou yo, paski yo té an twaka épi yo pa té ni pyèsonn pou édé yo. Yo té menm kon mouton ki pa ni gadyenn.” (Maf. 9:36) Èk kisa ki santiman Jéhova? Jézi di: “Papaʼw ki an syèl, pa vlé yonn an sé ti manmay sala ki ja kwè an li-a pèd.” (Maf. 18:14) Sé pawòl sala ka ban nou tjè kontan paski, yo ka moutwé nou, Jéhova enmen nou an chay. Konsa, kon nou vini konnèt Jézi pli mèyè, lanmityé nou pou Jéhova kay pwofité.

7. Lèʼw pasé tan épi Kwityen ki matwité an lafwa-a, ki mannyè sa kay édéʼw?

⁷ Lèʼw pasé tan épi fwè èk sè an kongwigasyon-an ki matwité an lafwa-a, ou kay apwann pou ni pli lanmityé, épi pou fè pwogwé. Ou kay wè yo ni tjè kontan. Èvèk yo pa ka wigwété disizyon-an yo té fè pou sèvi Jéhova. Mandé yo, ki èspéwéyans yo ja ni an sèvis Jéhova. Épi siʼw ni an gwo disizyon pou fè, ou sa mandé yo pou konsèy. Chonjé, ‘tout bagay ka maché byen lè la ni an pil moun ka bay konsèy.ʼ​—Pwov. 11:14.

8. Kisa ou sa fè si ou ni dout an sa Bib-la ka di?

⁸ Ganyen a bout dout ou pé ni. Kon nou té wè an paragraf 2, Satan kay fè tout sa i pé pou anpéchéʼw fè pwogwé an lavéwité-a. Yon mannyè i pé fè sa, sé pa li ka mété dout an lidéʼw ki, sa ou apwann an Bib-la sé pa lavéwité. Pou ègzanp, la ni moun ki kay vléʼw kwè, Bondyé pa té fè nou. Yo ka di sé èvolousyon Bondyé té sèvi pou fè lavi. Lèʼw té pli jenn, pitèt ou pa té janmen katjilé asou èvolousyon, mé apwézan pitèt yo ka enstwiʼy an lékòl ou. Èk ou pé kwè, sa titjaʼw ka enstwi ka fè sans. Mé, pitèt titjaʼw pa janmen ègzanminé pwèv ki ka moutwé, la ni an Kwéyatè. Chonjé pwensip-la ki an Pwovèb 18:17: ‘Pwèmyé moun-lan pou palé adan an kés pé sanm i ni wézon, jistan lòt moun-lan koumansé kwèstyonnenʼy.ʼ Konsa, pito ou kwè tout sa yo enstwiʼy an lékòl, pwan tan pou étidyé sa ki an Pawòl Bondyé. Fè wichach an sé piblikasyon nou-an. Palé épi fwè èk sè ki té ka kwè an èvolousyon avan yo vini konnèt lavéwité-a. Mandé yo pouki yo ka kwè la ni an Kwéyatè ki enmen nou. Sé konvézasyon sala kay édéʼw ègzanminé pwèv ki ka moutwé, la ni an Kwéyatè.

9. Kisa ou apwann an ègzanp Melissa?

⁹ Melissa sé an sè ki té fè wichach konsèné sa Bib-la ka di asou kwéyasyon, épi sa édéʼy pou ganyen a bout dout i té ni.b I di: “An lékòl, yo ka enstwi èvolousyon adan an mannyè pou fè moun kwè, èvolousyon sé lavéwité. An koumansman-an, mwen pa té vlé fè wichach, paski mwen té pè mwen té kay apwann èvolousyon sé lavéwité. Mé mwen di an lidé mwen, Jéhova toujou vlé nou ni bon wézon pou sa nou ka kwè andan. Konsa, mwen koumansé fè wichach. Mwen li liv-la Is There a Creator Who Cares About You? épi sé ti liv-la Was Life Created? èk The Origin of Life​—Five Questions Worth Asking. Épi sé sa mwen té bizwen. Simyé mwen té fè wichach sala konmen tan ki pasé.”

10-11. Kisa ki kay édéʼw wézisté tantasyon pou kasé pwensip mowal Jéhova? (1 Tèsalonnika 4:3, 4)

¹⁰ Widjèkté vyé kondwit. Diwan jennès, dézi-a pou sèks sa vini byen fò, épi la ni moun ki kay ankouwajéʼw pou fè bagay ki imowal. Osi, Satan pa vléʼw tjenn pwensip mowal Jéhova. Konsa, kisa ki kay édéʼw wézisté tantasyon sala? (Li 1 Tèsalonnika 4:3, 4.) Lèʼw ka pwédyé, di Jéhova tout sa ki an lidéʼw épi an tjèʼw, èk mandéʼy pou fòtifyéʼw. (Maf. 6:13) Chonjé, Jéhova pa la pou kondannéʼw, mé i la pou édéʼw. (Sam 103:13, 14) Osi, lè ou li Bib-la, sa sa édéʼw pou wézisté tantasyon. Melissa, sè-a nou té mansyonnen pli bonnè-a, té ka lité épi vyé katjil. I di: “Lè mwen li Bib-la touléjou, sa ka édé mwen pou kontiné tjébé fò. I ka fè mwen chonjé mwen sé on sèvant Jéhova, èk mwen vlé kontiné sèviʼy.”​—Sam 119:9.

¹¹ Pa éséyé aji épi pwoblenm ou pa kòʼw. Di pawanʼw sa ou ka èspéyansé. I pa alèz pou palé konsèné sé bagay sala, mé i enpòtan pouʼw fè sa. Melissa di: “Mwen pwédyé pou kouwaj, épi mwen di papa mwen sa mwen té ka èspéyansé. Apwé sa, mwen santi kò mwen pli mèyè. Mwen sav Jéhova té plè épi mwen.”

12. Ki mannyè ou sa fè bon disizyon?

¹² Kité pwensip Bib djidéʼw. Konʼw ka vini pli gwan, pawanʼw kay kitéʼw fè pli disizyon pa kòʼw. Kanmenm, la ni an chay bagay ou pòkò konnèt. Konsa, kisa ki kay édéʼw pou pa fè an lèwè ki kay donmajé wilasyonʼw épi Jéhova? (Pwov. 22:3) An sè yo ka kwiyé Kari, èspliké sa ki édéʼy pou fè pli mèyè disizyon. I wéyalizé, lè an Kwityen matwité an lafwa-a, i pa bizwen an lwa pou kondwi tout détay an laviʼy. I di: “Pito mwen annèk swiv an lwa, mwen té bizwen konpwann katjil Jéhova.” Konsa, lèʼw ka li Bib-la, mandé kòʼw: ‘Kisa enfòmasyon sala ka di mwen konsèné katjil Jéhova? Ès i ni pwensip ki sa édé mwen fè sa ki bon? Èk, ki bennéfis mwen kay twapé si mwen swiv sé pwensip sala?ʼ (Sam 19:7; Izay. 48:17, 18) Lè ou mèdité asou pwensip ou li an Bib-la, i kay fèʼy pli alèz pouʼw fè disizyon ki ka plè Jéhova. Konʼw kontiné fè pwogwé an lafwa-a, ou kay wéyalizé ou pa bizwen an lwa pou tout sitiwasyon, paski ou kay konpwann katjil Jéhova.

13. Ki mannyè bon jan sa édéʼw? (Pwovèb 13:20)

¹³ Chwazi jan ki enmen Jéhova. Kon nou ja di, lèʼw chwazi jan ki enmen Jéhova, sa kay édéʼw vini an Kwityen ki matwité an lafwa-a. (Li Pwovèb 13:20.) An sè yo ka kwiyé Sara té ka pèd lajwaʼy. Mé yon bagay té édéʼy viwé twapé lajwa sala. Sara di: “Bon jan vini an lavi mwen a bon lè-a. Mwen épi an jenn sè koumansé étidyé Gad-la toulé simenn. Osi, an lòt jan édé mwen koumansé wéponn kwèsyon an sé mitin-lan. Sé jan mwen-an édé mwen pou pwan létid pèsonnèl épi lapwiyè pli sèwyé. Mwen koumansé dévlopé an wilasyon ki té pli fò épi Jéhova, èk mwen koumansé ni lajwa ankò.”

14. Kisa ki édé Julien pou fè bon jan?

¹⁴ Ki mannyè ou sa fè jan ki kay édéʼw fè pwogwé? Julien sé an fwè ki ka wann sèvis kon yon ansyen. I di: “Lè mwen té pli jenn, mwen fè jan lè mwen té an minis-la. Sé jan sala té zélé, épi yo édé mwen pou enjwi minis-la. Mwen koumansé ni dézi-a pou wann sèvis an plen. Osi, mwen wéyalizé mwen pa té ni jè bon jan paski, mwen té ka sèlman gadé pou jan ki menm laj épi mwen. Pli ta, mwen fè bon jan lè mwen té an Bèfèl. Ègzanp sé fwè èk sé sè sala édé mwen pou fè bon chwa lèʼy vini pou anmizman, épi sa édé mwen pou vansé pli pwé Jéhova.”

15. Ki avètisman zapòt Pòl té bay Timòfi lèʼy vini pou asosiyasyon? (2 Timòfi 2:20-22)

¹⁵ Si ou wéyalizé, wilasyonʼy épi an moun an kongwigasyon-an sa donmajé wilasyonʼw épi Jéhova, kisa ou sipozé fè? Zapòt Pòl té sav, la té ni fwè èk sè an kongwigasyon-an ki pa té ka aji kon Kwityen, konsa i vèti Timòfi pou pa asosiyé épi yo. (Li 2 Timòfi 2:20-22.) Wilasyon nou épi Jéhova sé bagay-la ki pli enpòtan an lavi nou. Nou ka fè tout sa nou pé pou ni an bon wilasyon épi Jéhova. Konsa, nou pa sa kité pyèsonn donmajé wilasyon nou épi Papa nou, Jéhova.​—Sam 26:4.

LÈʼW NI AN PLAN POU FÈ PLI AN SÈVIS JÉHOVA, KI MANNYÈ SA KAY ÉDÉʼW FÈ PWOGWÉ?

16. Ki diféwan bagay ou sa fè pou édéʼw fè pwogwé?

¹⁶ Fè an bon plan. Chwazi bagay ki kay fòtifyé lafwaʼw èk édéʼw kontiné fè pwogwé. (Èfés. 3:16) Pou ègzanp, ou pé désidé pou li Bib-la, èk pou étidyé pli souvan. (Sam 1:2, 3) Ében, ou pé désidé pou pwédyé pli souvan, épi pou palé épi Jéhova ofon tjèʼw. Osi, pitèt ou wè, ou bizwen pwan pokosyon épi anmizman-an ou ka chwazi, èk an mannyè ou ka sèvi tanʼw. (Èfés. 5:15, 16) Lè Jéhova wè èfò-a ou ka fè pou fè pwogwé, i kay byen plè épiʼw.

17. Ki bennéfis ou kay twapé lèʼw édé lézòt?

¹⁷ Lèʼw ka édé lézòt, sa ka édéʼw pou fè pwogwé èk pou vini pli matwité an lafwa-a. Jézi té di: “Tjèʼw ka pli kontan lè ou bay pasé lè ou wisouvwè.” (Twavay 20:35) Konsa, si ou sèvi tanʼw épi kouway ou pou édé lézòt, ou kay ni tjè kontan. Mi yonndé bagay ou sa fè: ou sa édé fwè èk sè an kongwigasyonʼw ki an laj, ében ki malad. Pitèt ou sa fè ti konmisyon ba yo, ében moutwé yo mannyè pou sèvi bagay ilèktronnik. Siʼw sé an fwè, ou sa éséyé pou kwalifyé kon yon sèvant ministiriyal. A lè sala ou kay sa édé sé fwè-a èk sé sè-a pli. (Filip. 2:4) Osi, lè ou sépawé Bon Nouvèl-la épi moun, sa ka moutwé ou enmen yo. (Maf. 9:36, 37) Konsa, siʼy posib, fè plan pouʼw wann sèvis an plen.

18. Lèʼw ka wann sèvis an plen, ki mannyè sa ka édéʼw pou vini pli pwé Jéhova?

¹⁸ Lèʼw ka wann sèvis an plen, sa ka baʼw an chay òpotunité pouʼw vini pli pwé Jéhova. Siʼw ka wann sèvis kon yon piyonnè, pitèt ou sa atandé Lékòl-la Pou Pwoklanmatè Wéyòm-lan. Osi, ou sa wann sèvis an Bèfèl, ében twavay asou diféwan pwojé konstwiksyon. Kaitlyn sé an jenn sè ki ka wann sèvis kon an piyonnè. I di: “Sa ki édé mwen pou fè pwogwé apwé mwen batizé, sé lè mwen té ka twavay an minis-la épi fwè èk sè ki té ni pli èspéwéyans. Ègzanp sé fwè èk sé sè sala ankouwajé mwen pou étidyé Bib-la pli, épi pou vini an pli mèyè titja.”

19. Konʼw kontiné fè pwogwé an lafwa-a, ki bennédiksyon ou kay wisouvwè?

¹⁹ Konʼw kontiné fè pwogwé an lafwa-a, Jéhova kay benniʼw an chay. Ou pa kay sèvi jennès ou pou kouwi dèyè byen latè-a, ében pou fè lòt bagay ki pa ni valè an zyé Jéhova. (1 Jan 2:17) Paski ou fè bon disizyon, ou kay évité an chay mal tèt. Èk ou kay ni tjè kontan épi siksé an laviʼw. (Pwov. 16:3) Osi, bon ègzanp ou kay ankouwajé lòt fwè épi sè, ni sa ki jenn èk sa ki an laj. (1 Tim. 4:12) Épi sa ki pli enpòtan sé sa, ou kay ni lapé an tjèʼw épi satisfaksyon, paski ou sav ou ka plè Jéhova épi ou ni an bon wilasyon épiʼy.​—Pwov. 23:15, 16.