Jéhova Ka Benni Éfò Nou Lè Nou Sélébwé Mémoriyal-la

1-2. Pouki nou ka sélébwé Mémoriyal-la chak lanné?

PWÈSKÈ dé mil (2,000) lanné ki pasé, Jézi té bay laviʼy ban nou. Alò, i ouvè chimen-an pou nou sa ni lavi étonnèl. Swè-a avan i mò, Jézi té koumandé sé disip li-a pou sèvi pen èk diven pou tjenn an sélébwasyon pou chonjé lanmòʼy.​—1 Kòr. 11:23-26.

² Nou ka obéyi koumand Jézi paski nou enmenʼy an chay. Chak lanné diwan sézon Mémoriyal-la, nou ka moutwé mizi apwésiyasyon nou ni pou sa Jézi té fè ban nou. Nou ka fè sa lè nou pwédyé èk mèdité asou sa lanmò Jézi vlé di pou lézòm. Osi, nou kontan pou fè plis an minis-la, èk pou envité moun pou sélébwé lanmò Jézi épi nou. Èk nou byen détèminé pou pa kité anyen anpéché nou atandé Mémoriyal-la.

3. Kisa nou kay konsidiwé an atik sala?

³ An atik sala, nou kay konsidiwé twa (3) mannyè pèp Jéhova ja fè an gwo éfò pou sélébwé lanmò Jézi: (1) yo ka sélébwé lanmò Jézi mannyè-a i té moutwé sé disip li-a pou fèʼy, (2) yo ka envité lézòt moun pou sélébwé Mémoriyal-la, èk (3) yo ka sélébwé Mémoriyal-la menm si yo ni sitiwasyon ki difisil.

PÈP JÉHOVA KA SÉLÉBWÉ MÉMORIYAL-LA MANNYÈ-A JÉZI TÉ MOUTWÉ DISIP LI POU FÈʼY

4. Ki enfòmasyon nou ka apwann an Mémoriyal-la chak lanné, èk pouki nou sipozé apwésyé sé lavéwité sala? (Louk 22:19, 20)

⁴ Chak lanné, lè nou atandé Mémoriyal-la, nou ka kouté an diskou ki bazé asou Bib-la, ki ka wéponn plizyè kwèsyon. Pou ègzanp nou ka apwann pouki lézòm bizwen an wanson, èk ki mannyè lanmò yon nonm sa pawdonnen péché an chay moun. Osi nou ka apwann kisa pen-an èk diven-an ka wépwézanté, èk ki moun ki sipozé manjé pen-an èk bwè diven-an. (Li Louk 22:19, 20.) Diskou sala ka osi édé nou mèdité asou sé bennédiksyon-an sé moun-lan ki kay viv asou latè-a kay èspéyansé. (Izay. 35:5, 6; 65:17, 21-23) Alò, nou ni pou apwésyé sé lavéwité sala, paski an chay moun pa ka konpwann sé bagay sala. Èk yo pa sav ki mizi valè sakwifis Jézi ni. An plis di sa, yo pa ka sélébwé lanmò Jézi mannyè-a i té moutwé sé disip li-a pou fèʼy. Pou ki wézon yo pa ka fè sa?

5. Apwé plizyè an sé zapòt-la mò, ki mannyè moun koumansé òbzòvé lanmò Jézi?

⁵ Touswit apwé plizyè an sé zapòt-la mò, moun ki té fo Kwityen vini pa an kongwigasyon-an. (Maf. 13:24-27, 37-39) Sé fo Kwityen sala koumansé enstwi mansonj “pou . . . pwan sé moun-an ki kwè an Jézi-a mennen alé épi yo.” (Twav. 20:29, 30) Yonn an sé mansonj-la yo koumansé enstwi sé sa, Jézi pa té “ofè kòʼy kon yon sakwifis yon sèl kou pou pawdonnen péché an pil moun”, kon Bib-la di nou. Mé, yo té ka di, sakwifis Jézi ni pou kontiné fèt. (Hib. 9:27, 28) Jòdi jou an chay moun ka kwè fo enstwiksyon sala. Yo ka alé légliz chak simenn, èk délè yo ka alé chak jou, pou òbzòvé sakwifis Jézi. An wilizyon Katolik yo ka kwiyé sa “the Eucharist” an Annglé.”b La ni lòt wilizyon ki pa ka òbzòvé lanmò Jézi tèlman souvan. Mé sé moun-lan an sé wilizyon sala pa vwéman konpwann kisa sakwifis Jézi vlé di. Adan moun pé katjilé: ‘Ès lanmò Jézi vwéman vlé di mwen sa twapé pawdonnasyon pou péché mwen?ʼ Pouki yo ka mandé kèstyon sala? Sé paski adan di yo ja apwann, sakwifis Jézi pa sa fè nou twapé pawdonnasyon pou péché nou. Kisa pèp Jéhova ka fè pou édé moun konpwann kisa sakwifis Jézi vlé di, épi pou édé moun konpwann kisa ki kòrèk mannyè-a pou òbzòvé lanmò Jézi?

6. Bò lanné mil ywit san swasant douz (1872), kisa an gwoup étidyan Bib té vini konpwann?

⁶ An finisman diznèf (19) syèk-la, Charles Taze Russell épi an gwoup étidyan Bib, koumansé fouyé fon an Bib-la. Yo té vlé konnèt signifikans sakwifis Jézi, èk mannyè moun té sipozé sélébwé lanmòʼy. Bò lanné mil ywit san swasant douz (1872), yo té vini konpwann, Jézi té bay laviʼy kon an wanson pou tout lézòm. Yo pa té tjenn sa yo té apwann pou kò yo. Pito, yo sèvi liv, papyé nouvèl, èk jounal pou simen sa yo té apwann-lan bay tout moun. Pa lontan apwé sa, yo koumansé fè menm sa sé Kwityen-an an pwèmyé syèk-la té ka fè. Yo koumansé jwenn ansanm yon fwa pa lanné pou tjenn Mémoriyal-la.

7. Ki bennéfis nou ka twapé an sa Charles Taze Russell épi sé fwè-a té apwann plizyè lanné ki pasé?

⁷ Jòdi jou nou ka twapé bennéfis an sa Charles Taze Russell épi sé fwè-a té apwann plizyè lanné ki pasé. Pou ègzanp, gwanmèsi èd Jéhova nou ka konpwann kisa sakwifis Jézi vlé di, épi nou ka konpwann sa i kay fè ban nou épi pou tout lézòm. (1 Jan 2:1, 2) Osi, nou ja apwann, Bib-la ka palé konsèné dé (2) diféwan èspwa: (1) lavi an syèl pou an ti gwoup moun, épi (2) lavi étonnèl asou latè-a pou milyon di moun. Lè nou konsidiwé mizi enmen Jéhova enmen nou, èk tout sé bennéfis-la nou sa twapé hòd sakwifis Jézi, sa ka édé nou pou vansé pli pwé Jéhova. (1 Pita 3:18; 1 Jan 4:9) Alò, menm kon sé fwè nou-an an tan pasé, nou ka envité moun pou vini ansanm épi nou, pou òbzòvé Mémoriyal-la an mannyè-a Jézi enstwi sé disip li-a pou fèʼy.

PÈP JÉHOVA KA ENVITÉ MOUN POU ATANDÉ MÉMORIYAL-LA

8. Ki éfò pèp Jéhova ja fè pou envité moun pou atandé Mémoriyal-la? (Gadé pòtwé-a.)

⁸ Sé pa ni jòdi ni yè pèp Jéhova ka envité moun pou atandé Mémoriyal-la. An lanné mil ywit san katwiven yonn (1881), la té ni yon anonsman an Gad-la, ki té ankouwajé fwè èk sè an Lanméwik pou jwenn ansanm lakay yon fwè an Allegheny, Pennsylvania, pou tjenn lokazyon spésyal sala. Pli ta, chak kongwigasyon té ka tjenn Mémoriyal yo. An mwa Mas lanné mil nèf san kawant (1940), sé pwoklanmatè-a wisouvwè diwèksyon pou envité népòt moun an konmin yo ki té antéwésé, pou atandé Mémoriyal-la. Èk an lanné mil nèf san swasant (1960), pou pwèmyé fwa-a, sé fwè-a an Bèfèl bay sé kongwigasyon-an envitasyon yo té enpwimé pou envité moun pou atandé Mémoriyal-la. Dépi tan sala, pèp Jéhova ja bay plizyè bilyon envitasyon pou Mémoriyal-la. Pouki nou ka pasé otan tan, èk ka fè tout éfò sala pou envité moun pou atandé Mémoriyal-la?

9-10. Lè nou envité moun pou atandé Mémoriyal-la, ki bennéfis yo sa twapé? (Jan 3:16)

⁹ Yon wézon pouki nou ka fè tout sa nou pé pou envité moun pou atandé Mémoriyal-la, sé paski nou sav yo sa twapé bennéfis lè yo atandé. Moun ki atandé pou pwèmyé fwa-a sa apwann lavéwité-a konsèné sa Jéhova épi Jézi ja fè ban nou tout. (Li Jan 3:16.) Nou ni èspwa ki, sa yo wè èk tann an Mémoriyal-la kay ankouwajé yo pou apwann pli, pou yo sa vini sèvant Jéhova. Mé lézòt moun ka twapé bennéfis osi.

¹⁰ Nou ka osi envité moun ki té doubout sèvi Jéhova. Nou ka fè sa paski, nou vlé yo chonjé Jéhova enmen yo toujou. An chay di yo ka aksèpté envitasyon nou, èk pa dé kontan nou ka kontan pou wè yo. Lè yo atandé Mémoriyal-la, sa ka fè yo chonjé mannyè yo té ka enjwi sèvis yo pou Jéhova an tan pasé. Annou konsidiwé ègzanp yon sè yo ka kwiyé Monica.c I koumansé pwéché épi kongwigasyon-an ankò diwan panndèmik COVID-19-LA. Apwé i atandé Mémoriyal-la an lanné dé mil ventenyen (2021), i di: “Mémoriyal sala té byen spésyal pou mwen. Sa sé pwèmyé fwa-a an ven (20) lanné mwen té sa pwéché bay moun, èk envité yo pou atandé Mémoriyal-la. Mwen fè tout sa mwen té pé pou envité moun, paski mwen ka vwéman apwésyé sa Jéhova épi Jézi ja fè ban mwen.” (Sam 103:1-4) Ki moun aksèpté envitasyon nou opa, nou ka fè tout sa nou pé pou envité moun pou atandé Mémoriyal-la, paski nou sav Jéhova ka apwésyé tout éfò nou fè.

11. Ki mannyè Jéhova ja benni éfò nou pou envité moun pou atandé Mémoriyal-la? (Hagay 2:7)

¹¹ Jéhova ja vwéman benni éfò nou pou envité moun pou atandé Mémoriyal-la. An lanné dé mil ventenyen (2021), magwé sé wistwiksyon-an gouvèdman-an té mété pou lapéti maladi COVID, ventenyen milyon, twa san swasant sèt mil, sis san twa (21,367,603) moun té atandé Mémoriyal-la. Sa sé apipwé dé fwa é dimi pli moun pasé Témwen Jéhova owon latè-a! Kanmenm, nou sav sé pa kantité moun ki atandé Mémoriyal-la ki enpòtan pou Jéhova. Sa ki vwéman enpòtan pou li sé chak moun ki fè éfò-a pou atandé. (Louk 15:7; 1 Tim. 2:3, 4) Alò nou sa ni konfyans lè nou fè éfò pou envité moun pou atandé Mémoriyal-la, Jéhova ka sèvi nou pou twapé moun ki ni tjè sensè.​—Li Hagay 2:7.

PÈP JÉHOVA KA ATANDÉ MÉMORIYAL-LA MENM SI I PA ÉZÉ POU FÈ SA

12. Kisa ki pé fèʼy difisil pou nou atandé Mémoriyal-la? (Gadé pòtwé-a.)

¹² Jézi té di diwan dènyé tan-an, nou té kay èspéyansé an chay difikilté a kòz di bagay tèl kon òpozisyon, pèsikasyon, ladjè, maladi èk lòt bagay. (Maf. 10:36; Mak 13:9; Louk 21:10, 11) Délè, sé difikilté sala ka fèʼy difisil pou nou atandé Mémoriyal-la. Kisa sé fwè èk sè nou-an ja fè pou ganyen a bout difikilté kon sa pou yo sa atandé Mémoriyal-la, èk ki mannyè Jéhova ja édé yo?

13. Ki mannyè Jéhova té benni kouwaj èk détèminasyon Artem pou tjenn Mémoriyal-la padan i té an pwizon?

¹³ Lè yo mété nou an pwizon. Fwè èk sè nou ki an pwizon pou lapéti lafwa yo ka fè fòs kò yo pou tjenn Mémoriyal-la. Annou konsidiwé ègzanp Artem. An lanné dé mil ven (2020) an sé simenn-lan avan Mémoriyal-la, yo té météʼy adan an ti kacho ansanm épi apipwé kat (4) lòt pwizonnyé. Magwé i té an pwizon, i sèvi sa i té ni pou pen èk diven, èk i té ni plan pou bay diskou Mémoriyal-la pou kòʼy menm. Mé, sé nonm-lan ki té an kacho-a épiʼy té ka fimen èk yo té ka jiwé an chay. Kisa Artem fè? I mandé sé lòt pwizonnyé-a pou pa jiwé èk pa fimen pou yon nèditan sèlman. Artem té byen sipwi lè yo dakò pou pa fimen ében jiwé diwan Mémoriyal-la. Artem di: “Mwen té di yo mwen té sa di yo konsèné Mémoriyal-la.” Magwé sé nonm-lan di yo pa vlé tann anyen, apwé yo tann èk yo wè mannyè Artem tjenn Mémoriyal-la, yo mandéʼy kwèsyon konsèné Mémoriyal-la.

14. Kisa Témwen Jéhova té fè pou atandé Mémoriyal-la diwan panndèmik COVID-19-LA?

¹⁴ Panndèmik COVID-19. Diwan panndèmik-la, Témwen Jéhova pa té sa atandé Mémoriyal-la épi yonn a lòt fas a fas. Mé sa pa té anpéché yo òbzòvé Mémoriyal-la.d Sé kongwigasyon-an ki té ni intannèt sèvi intannèt-la pou atandé Mémoriyal-la. Mé sa kont sé milyon di moun-lan ki pa té ni intannèt? An sèten péyi, sé fwè-a an lofis bwanch-lan fè awanjman pou moun gadé diskou Mémoriyal-la asou télévizyon ében koutéʼy asou radyo. Osi, yo fè awanjman pou rèkòd diskou Mémoriyal-la an pli pasé senk san (500) langaj. Apwé sa, lòt fwè pòté sé rèkòd sala bay moun ki té bizwenʼy. Konsa, jis moun ki té ka wèsté an plas ki té byen lwen té sa òbzòvé Mémoriyal-la.

15. Kisa nou apwann an ègzanp Sue?

¹⁵ Lè moun an fanmi nou ka opozé nou. Pou adan moun, pli gwo difikilté-a yo ni pou atandé Mémoriyal-la sé paski moun an fanmi yo ka opozé yo. Annou konsidiwé ègzanp Sue, yon madanm ki té ka étidyé Bib-la. An lanné dé mil ventenyen (2021), jou-a avan Mémoriyal-la, Sue di sè-a ki té ka étidyé épiʼy i pa kay sa atandé Mémoriyal-la paskè adan moun an fanmiʼy té ka opozéʼy. Sè-a li Louk 22:44 épi Sue. Apwé sa sè-a èspliké, lè nou ni difikilté nou sipozé swiv ègzanp Jézi. Lè Jézi té anba difikilté i pwédyé èk i mété tout konfyans li an Jéhova. Li denmen, Sue pwépawé pen-an èk diven-an, èk i gadé Diskou Labib Lé Bonmaten pou Mémoriyal-la asou jw.org. Li swè-a, i alé an chanm li pa kòʼy, èvèk i kouté diskou Mémoriyal-la asou pòtab li. Apwé sa, Sue ékwi sè-a ki té ka étidyé épiʼy. Mi sa i diʼy: “Ou vwéman ankouwajé mwen yè. Mwen fè tout sa mwen té pé pou atandé Mémoriyal-la, èk Jéhova édé mwen. Mwen pa ni asé pawòl pou diʼw fòs mwen kontan èk mannyè mwen apwésyé Jéhova!” Ès ou kwè Jéhova sa édéʼw siʼw adan an sitiwasyon menm kon Sue?

16. Pouki nou sa asiwé Jéhova kay benni éfò nou fè pou atandé Mémoriyal-la? (Ronm 8:31, 32)

¹⁶ Jéhova ka apwésyé an chay tout éfò nou fè pou òbzòvé lanmò Jézi. Nou sa asiwé i kay benni nou lè nou moutwé apwésiyasyon pou sa i ja fè ban nou. (Li Ronm 8:31, 32.) Konsa, annou détèminé pou fè tout sa nou pé pou atandé Mémoriyal-la lanné sala. Èk an sé simenn-lan avan èk apwé Mémoriyal-la annou éséyé pou fè pli bay Jéhova.