Kisa Nou Sa Apwann An Sé Miwak-la Jézi Té Fè-a?

1. Kisa Jézi té fè pou pwèmyé miwak li? Èk pouki?

IMAJINÉ sitiwasyon-an. Touswit apwé Jézi koumansé minis li, “la té ni an mawiyaj an vil Kéna an Galili. Manman Jézi té la. Yo té envité Jézi épi sé disip li-a an nòs-la tou. Paditan yo té an nòs-la, diven-an vin fini. Lè diven-an fini, manman Jézi diʼy, “Sé moun-an pa ni diven ankò.”” (Jan 2:1-3) Mé pouki Mari té di Jézi konsèné diven-an? Paski an tan sala, i sété on honté pou diven fini adan an fèt.b Épi Mari sété jan fanmi-a èk i té vlé édé wanjé sitiwasyon-an. Konsa, kisa Jézi fè apwé manmanʼy apwochéʼy? I fè on bagay ki té èstòdinè! I fè dlo tounen “bon diven.” (Jan 2:9, 10.) Épi sa sété pwèmyé miwak li.

2-3. (a) Ki mannyè Jézi sèvi pouvwa-a Bondyé té baʼy-la? (b) Kisa nou kay diskité an atik sala?

² Paditan Jézi té ka fè minis-li asou latè-a, i fè an chay lòt miwak.c I sèvi pouvwa-a Bondyé té baʼy-la, pou édé an chay mil moun asou latè-a. Pou ègzanp, konsidiwé dé (2) an sé miwak li-a lè i té swen an chay moun. On yon lokazyon i té swen senk mil (5,000) nonm apa di madanm épi ti manmay. Asou on lòt lokazyon, i té swen kat mil (4,000) nonm apa di madanm épi ti manmay. Konsa, asou sé dé (2) lokazyon sala, si nou té ni pou konté tout sé nonm-lan, tout sé madanm-lan, épi tout sé ti manmay-la, i pitèt té kay pli pasé venn sèt mil (27,000) moun. (Maf. 14:15-21; 15:32-38) Osi, asou sé dé (2) lokazyon sala, Jézi pa té sèlman swen sé moun-lan, mé i djéwi sé moun-lan ki té malad! (Maf. 14:14; 15:30, 31) Imajiné mannyè sé moun-lan té étonnen lè yo wè sé miwak sala!

³ Jòdi jou, nou sa apwann an chay hòd sé miwak-la Jézi té fè-a. Pwèmyéman, an atik sala, nou kay diskité adan sé lison-an sé miwak sala sa enstwi nou ki sa fòtifyé lafwa nou. Èk apwé sa, nou kay diskité koumannyè nou sa imité imilité-a èk konpasyon-an Jézi té moutwé lè i té ka fè sé miwak sala.

LISON KONSÈNÉ JÉHOVA ÈK JÉZI

4. Sé miwak-la Jézi té fè-a ka enstwi nou lison konsèné ki moun?

⁴ Nou sav sété Jéhova ki té bay Jézi pouvwa-a pou fè sé miwak-la i té fè-a. Sé pou sa lévanjil-la di nou an Twavay 10:38: “Ou chonjé ki mannyè Bondyé té chwazi Jézi nonm Nazawèt-la, épi i fè Lèspwi Bondyé désann asouʼy épi i té ba li pouvwa. Jézi té ka pasé toupatou, i té ka fè bonté épi i té ka djéwi tout moun ki té anba kondwit Denmou, paski Bondyé té épiʼy.” Èk osi, nou sav, Jézi ka imité katjil èk santiman Papaʼy an tout sa i ka di èk an tout sa i ka fè; jis an sé miwak-la i té fè-a. (Jan 14:9) Konsa, sé miwak-la Jézi té fè-a ka enstwi nou lison konsènéʼy èk lison konsèné Papaʼy Jéhova, ki sa fòtifyé lafwa nou. Bon, apwézan, annou konsidiwé twa lison nou sa apwann an sé miwak-la Jézi té fè-a.

5. Kisa ki pousé Jézi pou fè sé miwak-la i té fè-a? (Mafyou 20:30-34)

⁵ Pwèmyé lison-an: Jézi épi Papaʼy ni an chay lanmityé pou nou. Paditan Jézi té asou latè-a, i wè an chay moun té ka soufè. Épi i té enmen yo si tèlman, i sèvi pouvwa-a Bondyé té baʼy-la, pou soulajé soufwans yo. Pou ègzanp, asou yon lokazyon, la té ni dé (2) nonm avèg ki té andjéléʼy pou mandéʼy pou èd. Mafyou 20:30-34 ka wakonté listwa-a. (Li Mafyou 20:30-34.) Ès ou wè Jézi té santi “lapenn” pou yo? Alò, i djéwi yo. Èben, an langaj Gwik, mo pawòl-la yo ka sèvi pou “lapenn” vlé di, i té ni tèlman konpasyon pou yo sé akonmsi i té ka santiʼy an boyoʼy. Pou on moun ni kalté konpasyon sala, sa vlé di, i ni an chay lanmityé. Anfen, sété menm konpasyon sala ki pousé Jézi pou swen moun ki té fen èk pou djéwi on nonm ki té ni lad. (Maf. 15:32; Mak 1:41) Nou asiwé, Jéhova, Bondyé-a ki “ni an chay konpasyon” pou nou-a, épi gasonʼy Jézi, enmen nou an chay èk yo ka santi penn nou lè nou ka soufè. (Louk 1:78; 1 Pita 5:7) A! Pa dé anvi yo anvi pou tiwé tout sé soufwans-lan ki ka afèkté nou!

6. Kisa Bondyé bay Jézi pouvwa-a pou fè?

⁶ Dézyenm lison-an: Bondyé ja bay Jézi pouvwa-a pou wanjé tout pwòblenm lézòm. Lè Jézi té fè sé miwak-la, i ban nou pwèv ki i sa wanjé tout sé pwòblenm-lan nou pa té kay sa wanjé pa kò nou. Pou ègzanp, Jézi ni pouvwa-a pou tiwé péché, èk tout sé pwòblenm-lan i ka mennen; tèl kon maladi èk lanmò. (Maf. 9:1-6; Ronm 5:12, 18, 19) Sé miwak-la Jézi té fè-a ka moutwé i sa “djéwi tout sòt kalité maladi” èk i sa jis wésisité lé mò. (Maf. 4:23; Jan 11:43, 44) Osi, Jézi ni pouvwa-a pou kontwolé mové van èk tiwé vyé lèspwi. (Mak 4:37-39; Louk 8:2) Nou byen kontan sé Jézi Jéhova chwazi pou bay pouvwa-a pou fè tout sé bagay sala!

7-8. (a) Ki asiwans sé miwak-la Jézi té fè-a ka ban nou? (b) Ki miwak ou vlé wè an latè nèf-la?

⁷ Twazyenm lison-an sé sa: Nou sa ni tout asiwans-lan ki Wéyòm Bondyé kay akonpli tout sé pwonmèt-la Bondyé té fè-a. Sé miwak-la Jézi té fè lè i té asou latè-a ka moutwé nou sa i kay fè asou tout latè-a kon Wa an Wéyòm Bondyé. Alò, kisa nou kay èspéyansé anba kondwit Jézi? Èben lavi kay dou! Nou kay ni bon santé paski Jézi kay tiwé tout maladi èk tout enfimité ki ka fè nou soufè. (Izay. 33:24; 35:5, 6; Wév. 21:3, 4) Wi, nou kay toujou ni manjé. Èk nou pa kay soufè akòz di dézas natiwèl. (Izay. 25:6; Mak 4:41) Épi pa dé kontan nou kay kontan pou anbwasé sé moun-lan nou enmen-an ki kay wésisité. (Jan 5:28, 29) Bon. Ki miwak ou menm kay vlé wè an latè nèf-la?

⁸ Chonjé, Jézi té moutwé gwan imilité èk konpasyon lè i té fè sé miwak-la. Konsa, i kay bon pou nou imité sé kawaktè sala. Apwézan, annou konsidiwé dé (2) ègzanp. Nou kay koumansé épi wakont-la konsèné nòs-la an Kéna.

AN LISON ASOU MANNYÈ POU NI IMILITÉ

9. Ki miwak Jézi té fè an nòs-la an Kéna? (Jan 2:6-10)

⁹ Li Jan 2:6-10. Konsa, lè diven-an té fini, ès Jézi té oblijé édé yo? Mé non. La pa té ni pyès pwofèsi ki té di Mèsaya-a té kay fè diven pa miwak. Bon. Imajiné kouman ou té kay santi si sa sété nòs ou èk tout bwè té fini. Nou asiwé ou té kay hont! San dout, Jézi té ni konpasyon pou fanmi-a, sitou pou sé moun-lan ki té mayé-a. Épi i pa té vlé yo èspéyansé hontèz sala. Konsa, kon nou té di an koumansman-an, Jézi fè on miwak. I fè pwèskè yon san twa (103) galon glo tounen bon diven. Épi sa sété an chay diven! Pitèt i fè tout diven sala pou sé dé moun-lan ki mayé-a, té sa twapé lèstan-an pou sèvi apwé nòs-la, ében pou vann pou fè on ti lajan pou kò yo. Nou asiwé sé dé moun-lan ki té mayé-a té ni an pil apwésiyasyon pou konpasyon-an Jézi té moutwé yo-a!

10. Ban nou yonndé détay konsèné wakont-lan ki an Jan chapit 2. (Gadé pòtwé-a osi.)

¹⁰ Annou konsidiwé yonndé détay an wakont-la ki ékwi an Jan chapit 2. An vèwsé 6, 7 ès ou té wè, Jézi menm pa té plen sé jè-a épi dlo? I mandé sé sèvant-lan pou plen sé jè-a paski i pa té vlé mennen atansyon asou kòʼy. Épi apwé Jézi fè glo tounen bon diven, i pa té pwan tibwen diven èk mennenʼy bay mèt-la ki wèskonsab mawiyaj-la. Mé pito sa, an vèwsé 8, i di sé sèvant-lan pou alé fè sa. Osi, Jézi pa té pwan on pòt diven, doubout douvan sé moun-lan, èk bavadé ka di: ‘Mwen djòs fini fè diven sala. Sa sé pli bon diven-an zò sa janmen bwè! Vini goutéʼy!ʼ

11. Ki lison nou sa apwann hòd miwak-la Jézi té fè-a, lè I fè dlo tounen bon diven?

¹¹ Ki lison nou sa apwann hòd miwak-la Jézi té fè-a, lè I fè dlo tounen bon diven? Èben, nou sa apwann on lison an mannyè pou ni imilité. Bon. Chonjé, Jézi pa té bavadé konsèné miwak sala. Anfen, i pa té janmen bavadé konsèné pyès an sé miwak li-a. Mé pito sa, i abésé kòʼy, èk i té ka toujou bay Papaʼy, tout lonnè-a èk laglwa-a. (Jan 5:19, 30; 8:28) Konsa, si nou imité Jézi èk abésé kò nou, nou pa kay bavadé konsèné sa nou ja akonpli. Anfen, népòt sa nou fè an sèvis Jéhova, annou pa bavadé konsèné kò nou, mé annou bavadé konsèné Dyé-a nou ka sèvi-a, Jéhova. (Jér. 9:23, 24) Épi annou baʼy tout lonnè-a, paski la pa ni anyen nou sa fè san èd li. ​—1 Kòr. 1:26-31.

12. Lè nou fè bon bay lézòt, ki mannyè nou sa abésé kò nou? Ba yon ègzanp.

¹² Bon. Annou konsidiwé on lòt mannyè nou sa imité Jézi èk moutwé imilité. Imajiné sitiwasyon sala: Yon ansyen ka pasé an chay tan ka édé yon jenn sèvant ministiriyal pwépawé pwèmyé diskou piblik li. Lè jou-a wivé, jenn fwè-a té ba yon bèl sijé. Tout kongwigasyon-an té enjwiʼy. Épi apwé mitin-lan, on moun vini èk i di ansyen-an: ‘Jenn fwè-a té ba yon bèl sijé, ès pa?ʼ Ès ansyen bouzwen di: ‘Wi, i fè on bon twavay. Mé sé mwen ki pasé an chay tan ka édéʼy. Sa sé wézon-an i sòti bèl konsa.ʼ Ében, ès ansyen-an sa abésé kòʼy èk di: ‘Wi, i fè on bon twavay. I ka lévé né mwen.ʼ Bon. Lè nou abésé kò nou, nou pa ni pou pwan lonnè-a pou tout sé bon bagay-la nou ka fè bay lézòt. (Gadé Mafyou 6:2-4; Hib. 13:16) Anfen, i asé pou nou èk ka fè nou kontan pou sav, Jéhova ka wè èk ka apwésyé tout sa nou ka fè bay lézòt. Mé ès nou ka vwéman plè Jéhova lè nou imité Jézi èk moutwé imilité? Absoliman! Èk i kay benni nou lè nou abésé kò nou.​—1 Pita 5:6.

AN LISON ASOU MANNYÈ POU NI KONPASYON

13. (a) Kisa Jézi té wè lè i té ka antwé an vil Nayin? (b) Kisa i té fè bay vèv la? (Louk 7:11-15)

¹³ Imajiné sa ki té fèt diwan minis Jézi, lè i té ka alé adan yon vil yo ka kwiyé Nayin. Vil sala té pwé vil Chounèm, vil-la pwòfèt Ilaycha té wésisité gason on vèv pwèskè nèf san (900) lanné avan. (2 Wa 4:32-37) Kon Jézi té ka antwé an vil-la, i wè yo ka pòté on nonm ki té mò alé téwé. Sitiwasyon sala té byen twis paski sa sété sèl ich vèv sala té ni. Èk an chay an sé jan vil-la té la épiʼy ka konfòtéʼy. Lè Jézi wè madanm-lan, tjèʼy fèʼy lapenn. Èk sa pouséʼy pou fè on bagay ki té wimakab. Wi, i wésisité gason vèv-la! Sa sété pwèmyé an twa wézèwèksyon-an Jézi té fè, ki té wakonté an Bib-la. Annou li wakont sala an Louk 7:11-15.—Liʼy.

14. Ban nou yonndé détay konsèné wakont-lan ki an Louk chapit 7. (Gadé pòtwé-a osi.)

¹⁴ Annou konsidiwé yonndé détay ki an wakont-lan an Louk chapit 7. An vèwsé 13, ès ou wè, apwé Jézi wè madanm-lan, tjèʼy fèʼy lapenn? Konsa, lè Jézi òbzòvé madanm-lan ka maché dèyè sèkay gasonʼy, ka pléwé, sa plen tjèʼy épi konpasyon pou li. Ès i té anni asé pou Jézi santi konpasyon an tjèʼy pou manman-an? Mé non. I fè on bagay pou moutwé konpasyonʼy. Jis an mannyè-a i palé épi madanm-lan, i konfòtéʼy, i diʼy, “Pa pléwé.” Èk an vèwsé 14, 15, I fè kéchòy pou édé madanm-lan. Sé vèwsé-a di Jézi wésisité gasonʼy épi i “bay manmanʼy li viwé.”

15. Kisa nou sa apwann an miwak-la Jézi té fè lè i té wésisité gason vèv-la?

¹⁵ Kisa nou sa apwann an miwak-la Jézi té fè lè i té wésisité gason vèv-la? Sa nou apwann sé sa: nou ni pou moutwé moun ki an lapenn konpasyon. Alò, nou sa pwan douvan pou moutwé moun konpasyon menm kon Jézi, lè nou ankouwajé yo èk fè tout sa nou pé pou édé yo èk konfòté yo. d (Pwov. 17:17; 2 Kòr. 1:3, 4; 1 Pita 3:8) Osi, sé pou nou tjenn an lidé, menm si nou pa sa wésisité moun menm kon Jézi té fè, tout ti éfò nou mété pou moutwé moun ki an lapenn konpasyon, sa édé yo pou tjébé fò.

16. Kisa nou ka apwann an èspéyans on manman ki té pèd tifiʼy an lanmò? (Gadé pòtwé-a.)

¹⁶ Annou konsidiwé èspéyans sala. Détwa lanné ki pasé, on sésé wè on manman ka pléwé paditan yo té ka chanté on chanson an Sal Wéyòm-lan. Èk la menm, i alé èk i mété bwaʼy owon manman-an pou konfòtéʼy. Épi i chanté lèwèstan chanson-an épiʼy. Mé pouki manman-an té ka pléwé? Ou wè, chanson-an té ka palé konsèné èspwa wézèwèksyon-an, èk i pa té ni djè tan dépi manman-an té pèd tifiʼy an lanmò. Konsa, sésé nou té konnèt sa, èk i pa té pèdi pyès tan, pou alé konfòtéʼy. Sè-a pa té sav ki kantité touché aksyonʼy té touché tjè manman-an. Pli ta, manman sa-a di: “Mwen byen kontan mwen té alé mitin jou sala. Sa sé koté nou ka twapé èd.  . . . Konsa, mwen enmen tout sé fwè èk sè mwen-an an pil.” Bon. Nou sa asiwé ki, Jéhova ka wè èk ka apwésyé tout ti èfò nou mété pou moutwé moun ki an lapenn konpasyon.​—Sam 34:18.

ÉTIDYÉ SÉ MIWAK-LA JÉZI TÉ FÈ-A POU FÒTIFYÉ LAFWAʼW

17. Kisa nou ja apwann an atik sala?

¹⁷ Nou sa jwenn an pil ankouwajman lè nou étidyé listwa ki an Bib-la konsèné sé miwak-la Jézi té fè-a. Kon nou ja wè an atik sala, sé listwa sala ka moutwé: (1) Jéhova èk Jézi enmen nou an chay, (2) Jéhova ja ba Jézi pouvwa-a pou wanjé tout pwòblenm lézòm, èk (3) nou sa ni tout asiwans-lan ki Wéyòm Bondyé kay akonpli tout sé pwonmèt-la Bondyé té fè-a. Kon nou ka li èben kouté sé wakont sala, nou sa mèdité asou mannyè nou sa imité kawaktè Jézi. Bon. La ni an chay lòt miwak Jézi té fè. Konsa i kay bon pou nou konsidiwé yo lè nou ka fè létid fanmi nou, èben létid pèsonnèl nou. Èk kon ou ka fè sa, gadé pou sé lison-an ou sa apwann, èk pa tjébé dèyè pou di lézòt sa ou apwann. Épi ou kay wè mannyè-a sé bèl konmézasyon sala, kay fòtifyé lafwa ni ou ni sé moun-lan ou ka palé épi-a.​—Ronm 1:11, 12.

18. Kisa nou kay diskité an lòt atik-la?

¹⁸ Bib-la té wakonté twa (3) wézèwèksyon Jézi té fè paditan i té asou latè-a. Mé dènyé wézèwèksyon-an té diféwan. Èk wézon-an sé (1) i té wésisité bon janʼy ki té mò, èk (2) bon janʼy-lan té ja mò pou kat (4) jou. An lòt atik-la nou kay konsidiwé miwak sala. Konsa, gadé pou sé wépons-lan pou sé kèstyon sala: Ki lison nou sa apwann hòd miwak sala? Èk ki mannyè nou sa fòtifyé lafwa nou an èspwa wézèwèksyon-an? Wi, sé miwak-la Jézi té fè-a ni an chay bon lison pou nou.