Mannyè Nou Sa Fè Lapwiyè Nou Pli Mèyè

1. Kisa Jéhova ka envité nou pou fè? (Gadé pòtwé-a osi.)

LÈ nou bizwen soulajman èk diwèksyon an lavi nou, ki moun nou sa mandé pou èd? San dout nou tout konnèt wépons-lan pou kèstyon sala. Nou sa apwoché Jéhova an lapwiyè népòt lè nou bizwen soulajman èk diwèksyon. Anfen, Jéhova ka envité nou pou pwédyé, èk i vlé nou fè sa souvan. An 1 Tèsalonnika 5:17 Jéhova ka di nou: “Toujou pwédyé.” Konsa nou pa bizwen pè pou apwoché Jéhova an lapwiyè, èk mandé’y pou diwèksyon’y an tout sa nou ka fè. (Pwov. 3:5, 6) Èvèk Jéhova pa ka mété pyès limit asou ki kantité tan nou sa palé épi’y an lapwiyè, paski i sé an Dyé ki byen donnan épi tan’y.

2. Kisa nou kay konsidiwé an atik sala?

² Lapwiyè sé on bèl pwivilaj, èk nou ka apwésyé pwivilaj sala an chay. Mé paski nou ni an chay bagay pou nou fè, délè nou pé twapé’y difisil pou fè tan pou pwédyé. Osi, pitèt nou ka katjilé nou bizwen fè lapwiyè nou pli mèyè. Ében nou sa wimèsyé Jéhova, paski Bib-la ka ban nou an chay ankouwajman èk diwèksyon asou mannyè pou pwédyé. An atik sala, nou kay konsidiwé sa nou sa apwann an ègzanp Jézi, lè’y vini pou mannyè nou sa fè tan pou pwédyé. Osi, nou kay konsidiwé senk (5) bagay enpòtan ki sa édé nou fè lapwiyè nou pli mèyè.

JÉZI TÉ KA TOUJOU FÈ TAN POU PWÉDYÉ

3. Ki mannyè Jézi té konnèt Papa’y ka apwésyé lapwiyè nou?

³ Jézi té byen konnèt mannyè Jéhova ka apwésyé lapwiyè nou, paski pou plizyè syèk avan i vini asou latè-a, i té ka wè mannyè Papa’y té ka wéponn lapwiyè sèvant fidèl li. Pou ègzanp, i té an syèl épi Papa’y, lè Papa’y wéponn lapwiyè Hanna, David, Ilaydja, èk an chay lézòt. (1 Sm 1:10, 11, 20; 1 Wa 19:4-6; Sam 32:5) Sé pou wézon sala Jézi enstwi sé disip li-a pou pwédyé souvan, èk pou ni konfyans ki, Jéhova kay wéponn lapwiyè yo.​—Maf. 7:7-11.

4. Mansyonnen yonndé lokasyon lè Jézi pwédyé, èk ki mannyè i té fè tan pou pwédyé.

⁴ Lè’y vini pou lapwiyè, Jézi bay sé disip li-a an bon ègzanp pou yo swiv. Konsa, la ni an chay lison nou sa apwann an ègzanp Jézi. Pou ègzanp, diwan tan-an i té ka fè minis li, Jézi té ka pwédyé souvan. Èk i té ni pou fè tan pou pwédyé paski byen souvan i té anbawasé, èk i té toujou ni an chay moun épi’y. (Mak 6:31, 45, 46) Mé i té ka lévé bonnè bonmaten, èk i té ka alé an koté pa kò’y pou’y pwédyé. (Mak 1:35) Osi, yon lè, lè Jézi té ni an disizyon enpòtan pou fè, i pasé tout lannwit-la ka pwédyé. (Louk 6:12, 13) Èvèk swè-a avan i mo, Jézi té fiksé asou mannyè i té kay akonpli pa-a ki té pli difisil an ansayman’y asou latè-a, konsa i pwédyé dwi.​—Maf. 26:39, 42, 44.

5. Ki mannyè nou sa imité Jézi?

⁵ Yon lison nou sa apwann an ègzanp Jézi sé sa, menm si nou byen anbawasé, nou ni pou fè tan pou pwédyé. Pitèt nou kay ni pou fè menm kon Jézi èk lévé bonnè bonmaten, ében pitèt nou sa alé dòmi pli ta, èvèk sèvi tan sala pou pwédyé. Lè nou fè sa, nou ka moutwé Jéhova nou ka apwésyé bèl pwivilaj-la i ban nou-an. Yon sè yo ka kwiyé Lynne ka chonjé apwésiasyon-an i té ni, pwèmyé fwa i apwann i té ni bèl pwivilaj-la pou palé épi Jéhova an lapwiyè. I di: “Lè mwen apwann, mwen sa palé épi Jéhova a népòt lè, sa édé mwen pou wè Jéhova kon bon Jan mwen, èk mwen té vlé fè lapwiyè mwen pli mèyè.” San dout an chay di nou ka santi menm kon sè sala. Konsa annou konsidiwé senk (5) bagay enpòtan nou sa mansyonnen an lapwiyè nou.

SENK (5) BAGAY ENPÒTAN NOU SA MANSYONNEN AN LAPWIYÈ NOU

6. Silon Wévélasyon 4:10, 11, kisa Jéhova méwité?

⁶ Glowifyé Jéhova. Adan an vizyon ki té èstòdinè, zapòt Jan té wè venn kat (24) gwan nonm an syèl ka adowé Jéhova. Sé gwan nonm-lan té ka glowifyé Bondyé èk yo té ka di, Bondyé méwité ‘pou moun onnowéʼy, pou moun lévé nonʼy, èk pou moun wèspèktéʼy pou pouvwaʼy.’ (Li Wévélasyon 4:10, 11.) Sé nanj-lan osi ni an chay wézon pou glowifyé Jéhova, paski yo an syèl épi’y èvèk yo konnèt li byen. Yo ka wè sé bèl kawaktè-a Jéhova ni-an an tout sa’y ka fè. Konsa kon yo obzòvé twavay Jéhova, sa ka pousé yo pou glowifyé’y.​—Jòb 38:4-7.

7. Ki wézon nou ni pou glowifyé Jéhova?

⁷ Nou osi sipozé glowifyé Jéhova an lapwiyè nou. Nou ka fè sa lè nou di Jéhova pouki nou enmen’y, èk pouki nou ka apwésyé’y. Konsa lè’w ka li, ében kouté èk étidyé Bib-la, éséyé pou idantifyé sé bèl kawaktè-a Jéhova ni ou pli kontan. (Jòb 37:23; Ronm 11:33) Èvèk lè’w ka pwédyé di Jéhova mannyè ou ka apwésyé sé kawaktè sala. Osi, nou sa glowifyé Jéhova pou tout sa’y ka fè pou édé nou, épi pou édé sé fwè èk sè nou-an, paski Jéhova ka toujou gadé apwé nou, èk i ka toujou pwotéjé nou.​—1 Sm 1:27; 2:1, 2.

8. Nou ni an chay wézon pou wimèsyé Jéhova. Mansyonnen yonndé. (1 Tèsalonnika 5:18)

⁸ Wimèsyé Jéhova. Nou ni an chay wézon pou wimèsyé Jéhova an lapwiyè nou. (Li 1 Tèsalonnika 5:18.) Anfen, nou sa wimèsyé Jéhova pou népòt bon bagay nou ni, paski sé li ki ka bay tout bon kado. (Jémz 1:17) Pou ègzanp, nou sa wimèsyé’y pou bèl latè-a i ban nou-an, èk pou tout sé bèl bagay-la i fè-a. Nou sa wimèsyé Jéhova pou lavi nou, fanmi nou, jan nou, èk pou bèl èspwa-a nou ni-an. Osi nou vlé wimèsyé Jéhova paski i ka édé nou pou enjwi an bon wilasyon épi’y.

9. Pouki nou pé ni pou fè éfò pou dévlopé apwésiasyon pou Jéhova?

⁹ Nou pé ni pou fè éfò pou katjilé asou sé diféwan wézon-an nou menm ni pou wimèsyé Jéhova, paski bagay-la sé sa, jòdi jou an chay moun malonnèt. Byen souvan moun ka katjilé asou ki mannyè yo sa twapé sa yo vlé, pito yo katjilé asou mannyè pou moutwé apwésiasyon pou sa yo ni. Si nou koumansé imité vyé atitid sala, nou pé twapé kò nou ka annèk mandé si ében mandé sa, lè nou ka pwédyé. Mé si nou kontiné dévlopé apwésiasyon èk wimèsyé Jéhova pou tout sa’y ka fè ban nou, sa pa kay wivé nou.​—Louk 6:45.

10. Sè Kyung-sook té ni an chay apwésiasyon pou Jéhova. Ki mannyè sa té édé’y pou andiwé? (Gadé pòtwé-a osi.)

¹⁰ Lè nou ni labitid ka toujou moutwé apwésiasyon, sa sa édé nou pou andiwé anba difikilté. Annou konsidiwé ègzanp sè Kyung-sook. Èspéwéyans li té an Gad-la pou li 15 Janvyé 2015 an Annglé. I vini konnèt i té ni kansè an fwisi mòl li, èk sitiwasyon-an té byen sèwyé. Sè-a di: “Maladi sala té dékouwajé mwen an chay. Mwen té ka santi mwen té pèd tout bagay èk mwen té byen pè.” Kisa ki té édé’y pou andiwé? I di, tou lé swè avan i alé dòmi, i té ka mouté asou tèt kay li pou pwédyé èk i té ka di Jéhova senk (5) bagay i apwésyé pou jou sala. Sa édé’y pou santi mwens antjèt, èk i pousé’y pou di Jéhova mizi enmen i enmen’y. Sè Kyung-sook wè mannyè Jéhova ka sipòté sèvant fidèl li lè yo ka èspéyansé mové difikilté. Èvèk i wéyalizé nou ni otan pli bennédiksyon an lavi nou pasé nou ni difikilté. Menm kon sè Kyung-sook, nou ni an chay wézon pou wimèsyé Jéhova, menm si nou ka èspéyansé difikilté. Èvèk lè nou ka toujou wimèsyé Jéhova an lapwiyè pou tout sa i ka fè ban nou, sa ka édé nou pou andiwé èk wèsté kam.

11. Pouki sé disip-la té bizwen kouwaj apwé Jézi viwé an syèl?

¹¹ Mandé Jéhova pou ba’w kouwaj pou’w pwéché. Touswit avan Jézi viwé an syèl, i fè sé disip li-a chonjé, yo té ni wèskonsabilité-a pou bay témwenyaj konsèné’y an “Jérouzalèm, an tout Joudiya épi Sanmariya épi toupatou an latè-a.” (Twav. 1:8; Louk 24:46-48) An ti tan apwé sa, sé mèt wilizyon sé Jwif-la, awété zapòt Pita épi zapòt Jan. Yo mennen yo douvan konsèy sé Jwif-la. Yo koumandé yo pou doubout pwéché, èk yo jis mennasé yo. (Twav. 4:18, 21) Kisa sé dé (2) zapòt sala té fè?

12. Silon Twavay 4:29, 31, kisa sé disip-la té fè?

¹² Magwé sé mèt wilizyon sé Jwif-la té mennasé zapòt Pita èk zapòt Jan, sé dé (2) nonm fidèl sala di yo: “Jijé dwèt douvan Bondyé anpami zòt menm kilès pou nou obéyi, zòt ében Bondyé, paski nou pa sa doubout palé sé bagay sala nou wè èk tann-an.” (Twav. 4:19, 20) Lè yo ladjé zapòt Pita èk zapòt Jan, sé disip-la pwédyé pou Jéhova édé yo fè volonté’y. Yo di Jéhova: “Kité nou ki sèvant ou palé konmisyon’w san lapè.” Yo pwédyé épi tou tjè yo, èk Jéhova wéponn lapwiyè yo.​—Li Twav. 4:29, 31.

13. Kisa nou sa apwann an ègzanp fwè Jin-hyuk?

¹³ Nou sa imité ègzanp sé disip-la lè nou kontiné pwéché menm si gouvèdman-an koumandé nou pou doubout pwéché. Annou konsidiwé ègzanp fwè Jin-hyuk. Yo té mété’y an pwizon paski i té wifizé antwé an lawmé-a. Lè’y té an pwizon, yo bay wèskonsabilité-a pou pòté manjé èk lòt bagay bay adan sé pwizonnyé-a ki té an kalabous pa kò yo. Mé i té sipozé palé épi yo sèlman konsèné bagay yo té bizwen. I pa té sipozé palé épi yo asou pyès lòt bagay. I pa té menm sipozé diskité Bib-la épi yo. Konsa fwè Jin-hyuk pwédyé pou Jéhova bay kouwaj épi lasajès, pou’y sèvi tout lokazyon i twapé pou pwéché. (Twav. 5:29) Fwè-a di: “Jéhova wéponn lapwiyè mwen èk i ban mwen kouwaj-la épi lasajès-la mwen té bizwen, pou koumansé létid Bib épi plizyè an sé pwizonnyé-a. Nou té ka étidyé pou senk (5) minit douvan lapòt sé kalabous-la. Èk lé swè, mwen té ka ékwi lèt pou mwen bay sé pwizonnyé-a li denmen.” Nou osi sa ni konfyans-lan ki, Jéhova kay édé nou pou fè twavay pwèchman-an. Konsa menm kon fwè Jin-hyuk nou sa pwédyé pou Jéhova ban nou kouwaj épi lasajès.

14. Lè nou ka èspéyansé pwoblenm kisa ki sa édé nou? (Sam 37:3, 5)

¹⁴ Mandé Jéhova pou édé’w andiwé lè’w ka èspéyansé pwoblenm. An chay di nou ka soufè paski nou malad, ében paski nou ni pwoblenm ki ka twakasé lidé nou. Pou ègzanp, pitèt nou pèd an moun nou enmen an lanmò, nou ni pwoblenm an fanmi nou, nou ka èspéyansé pèsikasyon, ében an lòt pwoblenm. Èk lè la ni an mové maladi ki ka simen ében ladjè, sa ka fè’y pli difisil toujou pou nou andiwé anba sé pwoblenm-lan nou ni-an. Lè’w ka aji épi sitiwasyon kon sa, ouvè tjè’w bay Jéhova an lapwiyè. Palé épi’y konsèné sitiwasyon’w menm kon ou té kay palé épi an bon jan. Èvèk ou sa asiwé Jéhova “kay édé’w.”​—Li Sam 37:3, 5.

15. Ki mannyè lapwiyè sa édé nou andiwé lè nou an “twaka?” Ba yon ègzanp.

¹⁵ Lè nou ka toujou pwédyé sa kay édé nou pou andiwé lè nou an “twaka.” (Ronm 12:12) Jéhova konnèt sa sèvant li ka èspéyansé, èk ‘I ka tann lè yo kwiyé’y pou mandé’y èd.’ (Sam 145:18, 19) An sè yo ka kwiyé Kristie té èspéyansé sa. Sè sala ni vent nèf (29) lanné èk i ka wann sèvis kon yon piyonnè. Sibitman, i koumansé ni pwoblenm santé ki té byen sèwyé. Èk sa annékòz li pou soufè épi mové dipwèsyon. Apwé sa i vini konnèt manman’y té ni an mové maladi, èk manman’y pa té ni djè tan ankò pou viv. Kristie di: “Mwen ouvè tjè mwen bay Jéhova an lapwiyè, èk mwen mandé’y pou ban mwen kouway-la mwen té bizwen pou andiwé chak jou. Mwen té ka fè tout sa mwen té pé pou atandé sé mitin-lan, épi pou fè létid pèsonnèl mwen.” Osi i di: “Lapwiyè édé mwen pou andiwé sé mouman-an ki té pli difisil. Mwen sav Jéhova té toujou la épi mwen, èk katjil sala té ka soulajé mwen an chay. Magwé pwoblenm santé mwen pa té dispawèt la menm, Jéhova wéponn lapwiyè mwen paski i ban mwen lapé an tjè mwen èk an lidé mwen.” Konsa, annou pa janmen obliyé, Jéhova konnèt “ki mannyè pou chapé bon moun anba soufwans yo.”​—2 Pita 2:9.

16. Pouki nou bizwen èd Jéhova pou nou tjébé fò anba tantasyon?

¹⁶ Mandé Jéhova pou édé’w tjébé fò anba tantasyon. Kon nou pa pawfé, nou toujou ni pou goumen wèd pou nou pa fè sa ki mové. Èvèk Satan ka fè tout sa i pé pou fè’y pli difisil pou nou. Pou ègzanp, i ka sèvi anmizman ki pa pwòp pou sali lidé nou, èk plen tèt nou épi vyé katjil sal. Sé katjil sala ka donmajé wilasyon nou épi Jéhova, épi yo sa jis pousé nou pou fè péché ki gwav.​—Mak 7:21-23; Jémz 1:14, 15.

17. Apwé nou mandé Jéhova èd pou nou pa tonbé anba tantasyon, kisa nou sipozé fè? (Gadé pòtwé-a osi.)

¹⁷ Nou bizwen èd Jéhova pou tjébé fò lè nou anba tantasyon pou fè sa ki pa bon. Lè Jézi té ka moutwé sé disip li-a mannyè pou pwédyé, yonn an sé bagay-la i di yo pou mandé pou sété: “Pa kité nou tonbé anba tantasyon, mé délivwé nou anba lanmen Denmou-an.” (Maf. 6:13) Konsa, Jéhova vlé édé nou, mé nou ni pou mandé’y pou èd-la nou bizwen-an. Èk apwé nou pwédyé pou mandé Jéhova pou èd, nou ni pou fè asiwé nou ka twavay an ling épi lapwiyè nou. Pou ègzanp nou ni pou pwan pokosyon pou nou pa gadé, li, ében kouté bagay ki kay mété vyé katjil an lidé nou. (Sam 97:10) Osi, nou ni pou fè éfò pou plen tjè nou èk lidé nou épi bon katjil. Konsa nou ni pou fè bagay tèl kon li ében kouté, èk étidyé Bib-la, atandé sé mitin-lan, èk pwéché Bon Nouvèl-la. Si nou fè sé bagay sala, Jéhova kay tjenn pwonmèt li, épi i pa kay kité nou pasé anba pyès tantasyon ki kay twò fò pou nou.​—1 Kòr. 10:12, 13.

18. Lè’y vini pou lapwiyè, kisa chak di nou ni pou fè?

¹⁸ Si nou vlé wèsté fidèl pou Jéhova diwan sé dènyé jou sala ki si tèlman difisil, apwézan sé lè pou chak di nou pwédyé pli pasé avan. Nou ni pou pwan an ti tan chak jou pou palé épi Jéhova ofon tjè nou. Chonjé, Jéhova vlé nou ‘ouvè tjè nou ba li.’ (Sam 62:8) Konsa, glowifyé Jéhova èk wimèsyé’y pou tout sa i ka fè ban nou. Mandé Jéhova pou ba’w kouwaj pou’w pwéché. Évek népòt lè ou ka èspéyansé pwoblenm, ében ou anba tantasyon pou fè sa ki pa bon, plédé épi Jéhova pou’y édé’w. Pa kité anyen ében pyèsonn anpéché’w pwédyé bay Jéhova wégiliyèman. Mé, ki mannyè Jéhova ka wéponn lapwiyè nou? Sa sé yon kèstyon ki byen enpòtan, èvèk nou kay konsidiwé sa an lòt atik-la.