Apwann Hòd Ègzanp Pwofèt Dannyèl

1. Kisa sé jan Babilonn-lan té òbzòvé konsèné pwofèt Dannyèl?

LÉ SÉ jan Babilonn-lan té mennen pwofèt Dannyèl an Babilonn kon yon pwizonnyé, i té an jenn nonm èk i té byen lwen péyi’y, Jérouzalèm. Sé ofisyé-a an Babilonn òbzòvé sèten bagay konsèné Dannyèl, mé sèl sa yo òbzòvé sé ‘bagay ki té douvan zyé yo.’ Pou ègzanp, yo wè Dannyèl ‘pa té ni pyès défo, i té bèl,’ èk i té sòti andan an fanmi ki té enpòtan. (1 Sm 16:7) Konsa, yo entwennen Dannyèl pou wann sèvis an kay wa-a.​—Dann. 1:3, 4, 6.

2. Pouki Jéhova té enmen Dannyèl? (Izikèl 14:14)

² Jéhova pa té enmen Dannyèl paski i té bèl, ében paski i té ni an gwo pozisyon an kay wa-a. Pito sa, Jéhova té enmen’y paski Dannyèl té détèminé pou wèsté fidèl pou li. Anfen, Dannyèl pitèt té ni apipwé ven (20) lanné lè Jéhova di, i té menm kon Nowa épi Jòb. Konsa, Jéhova té ka konsidiwé Dannyèl kon an moun ki té dwèt menm kon Nowa épi Jòb. Sé dé (2) nonm sala té ja wèsté fidèl pou Jéhova pou plizyè lanné. (Jen. 5:32; 6:9, 10; Jòb 42:16, 17; li Izikèl 14:14.) Dannyèl viv pou plizyè lanné, i wèsté fidèl pou Jéhova diwan tout lavi’y, èvèk Jéhova pa janmen doubout enmen Dannyèl.​—Dann. 10:11, 19.

3. Kisa nou kay konsidiwé an atik sala?

³ An atik sala, nou kay konsidiwé dé (2) an sé bèl kawaktè-a Dannyèl té ni, ki fè’y ni an chay valè an zyé Jéhova. Pwèmyéman, nou kay dékwi chak sé kawaktè-a, èk nou kay gadé diféwan lokazyon lè Dannyèl moutwé i té ni sé kawaktè sala. Apwé sa, nou kay wè kisa ki édé Dannyèl pou dévlopé sé kawaktè sala, èk ki mannyè nou menm sa imité’y. Konsa, magwé atik sala sé pou jenn moun, la ni bèl lison nou tout sa apwann an ègzanp Dannyèl.

IMITÉ KOUWAJ DANNYÈL

4. Ki mannyè Dannyèl moutwé i té ni kouwaj? Ba yon ègzanp.

⁴ Menm si an moun ni kouwaj, sa pa vlé di délè i pa kay pè. Mé, i pa kay kité pèwèz anpéché’y fè sa ki dwèt. Dannyèl sété an jenn nonm ki té ni an chay kouwaj. Annou konsidiwé dé (2) lokazyon lè’y moutwé i té ni kouwaj. Pwèmyé lokazyon-an pitèt sété apipwé dé (2) lanné apwé sé jan Babilonn-lan té détwi vil Jérouzalèm. A lè sala, Nèbyoukadnéza sété wa an Babilonn, èk i wévé konsèné an gwo bidim imaj. Wèv-la té twakasé lidé’y an chay, èk i fè’y pè. Wa Nèbyoukadnéza di i té kay tjwé tout sé nonm savan’y-lan, èk Dannyèl épi sé konpayn li-a osi, si yo pa té sa di’y kisa i wévé, èk déchifwé wèv-la ba’y. (Dann. 2:3-5) Dannyèl pa té sa gaspiyé tan, paskè sitiwasyon-an té byen sèwyé. Si’y pa té pwan aksyon la menm, an chay moun té kay pèd lavi yo. Konsa, i ‘alé oti wa-a, èk i mandé wa-a pou bay tan pou’y déchifwé wèv-la ba’y.’ (Dann. 2:16) Bib-la pa ka di nou si Dannyèl té janmen déchifwé wèv avan sa. Mé san dout, Dannyèl té bizwen ni an chay kouwaj épi lafwa pou’y té sa alé oti wa-a. Konsa, i mandé sé konpayn li-a pou, ‘pwédyé èk mandé Bondyé-a ki an syèl-la pou moutwé yo mizèwikòd, konsèné sigwé sala.’b (Dann. 2:18) Jéhova wéponn lapwiyè yo. I édé Dannyèl pou déchifwé wèv-la bay Wa Nèbyoukadnéza, èk sa sové lavi Dannyèl épi sé konpayn li-a.

5. Asou ki lòt lokazyon Dannyèl té ni pou moutwé kouwaj?

⁵ Tjèk tan apwé Dannyèl té déchifwé wèv-la konsèné gwo bidim imaj-la, Nèbyoukadnéza té ni an lòt wèv ki té ka twakasé lidé’y ankò. Kou sala, i wévé konsèné an gwo bidim pyé bwa. Èvèk Dannyèl té bizwen an chay kouwaj ankò, paskè i té ni pou déchifwé wèv sala bay wa Nèbyoukadnéza. Konsa, épi kouwaj, i di Wa Nèbyoukadnéza sa wèv-la té vlé di. Dannyèl jis di Nèbyoukadnéza, silon wèv-la, li Nèbyoukadnéza, té kay vini fou, èk i pa té kay sa kondwi kon wa pou an tan. (Dann. 4:25) Bon, i té byen alèz pou wa-a té kwè Dannyèl sété lèlmi’y, paskè sé bagay-la Dannyèl té di’y-la pa té bon nouvèl pou li. Èk Dannyèl té sipozé sav, wa-a té sa tjwé’y pou sa. Kanmenm, Dannyèl moutwé kouwaj, èk i di wa-a kisa wèv-la té vlé di.

6. Kisa ki pitèt té édé Dannyèl pou dévlopé kouwaj?

⁶ Dannyèl moutwé i té ni kouwaj diwan tout lavi’y. Mé, kisa ki pitèt té édé’y pou dévlopé kouwaj? San dout, dépi Dannyèl té an jenn tibway, bon ègzanp manman’y épi papa’y édé’y pou dévlopé kouwaj. Jéhova té di, sé pawan-an an Izwayèl té ni wèskonsabilité-a pou enstwi ich yo Lwa’y. Konsa nou sa asiwé pawan Dannyèl té enstwi’y Lwa Jéhova. (Dito. 6:6-9) Èvèk Dannyèl té konnèt sé dis koumandman-an byen, mé i té osi konnèt an chay détay konsèné Lwa-a. Pou ègzanp, i té konnèt kisa jan Izwayèl té sipozé manjé èk kisa yo pa té sipozé manjé.c (Livi. 11:4-8; Dann. 1:8, 11-13) Osi, Dannyèl té konnèt listwa pèp Jéhova, èk i té sav kisa ki té wivé yo lè yo pa té obéyi Jéhova. (Dann. 9:10, 11) Tout sé bagay-la Dannyèl èspéyansé diwan lavi’y, bay asiwans-lan ki, népòt sa ki té fèt, Jéhova épi sé nanj-lan té kay édé’y.​—Dann. 2:19-24; 10:12, 18, 19.

7. Ki lòt bagay ki té édé Dannyèl pou dévlopé kouwaj? (Gadé pòtwé-a osi.)

⁷ Dannyèl té ni labitid ka étidyé ékwiti sé pwofèt-la tèl kon, pwofèt Jérémaya. Sé pou wézon sala i té vini konpwann, menm si sé Jwif-la té an pwizon an Babilonn pou lontan, Jéhova té kay libéwé yo touswit. (Dann. 9:2) San dout, kon Dannyèl wè pwofèsi Bib ka vini vwé, sa fòtifyé konfyans li an Jéhova. Èk lè an moun ni konfyans ki fò an Jéhova, sa ka édé’y pou ni an chay kouwaj. (Gadé Ronm 8:31, 32, 37-39.) Mé sa ki té pli enpòtan sé sa, Dannyèl té ka pwédyé bay Papa’y Jéhova, byen souvan. (Dann. 6:10) I konfésé péché’y douvan Jéhova, i di’y mannyè i té ka santi kò’y, èvèk i mandé’y pou èd. (Dann. 9:4, 5, 19) Dannyèl sété an moun menm kon nou, konsa i pa té fèt épi kouwaj. Dannyèl dévlopé bèl kawaktè sala paski i té ka toujou étidyé Pawòl Bondyé, i té ka pwédyé souvan, èk i mété tout konfyans li an Jéhova.

8. Pou dévlopé kouwaj, kisa nou ni pou fè?

⁸ Bon, kisa nou menm bizwen fè pou nou sa dévlopé kouwaj? Ében, pawan nou sa ankouwajé nou pou ni kouwaj, mé nou pa sa éwityé kawaktè sala hòd yo, menm si yo sé moun ki ni kouwaj. Pou dévlopé kouwaj, ou ni pou fè menm bagay-la ou té kay fè si ou ka apwann an léta nèf. Pou ègzanp, si an moun ka moutwé’w mannyè pou fè twavay an chapantyé, ou ni pou byen gadé sa moun-lan ka fè, èk ou ni pou swiv ègzanp li. An menm mannyè-a, pou dévlopé kouwaj, nou ni pou byen gadé mannyè lòt moun ka moutwé kouwaj, èk nou ni pou swiv bon ègzanp yo. Konsa, kisa nou sa apwann an ègzanp Dannyèl ki kay édé nou dévlopé kouwaj? Menm kon Dannyèl, nou ni pou byen konnèt Pawòl Bondyé, èvèk nou ni pou palé épi Jéhova an lapwiyè souvan èk di’y tout sa ki an tjè nou. Osi, nou ni pou mété tout konfyans nou an Jéhova, èk ni asiwans-lan ki, i kay toujou édé nou. Si nou fè sé bagay sala, nou kay sa moutwé kouwaj lè nou ka èspéyansé sitiwasyon ki ka mété lafwa nou anba tès.

9. Ki bennéfis nou ka twapé, lè nou ni kouwaj?

⁹ Lè nou ni kouwaj, sa ka pòté nou an chay bennéfis. Annou konsidiwé ègzanp on fwè yo ka kwiyé Ben. I té ka atandé on lékòl an péyi Germany, koté tout moun té ka kwè an évolousyon. Èk yo té ka kwè, sa Bib-la ka di konsèné kwéyasyon, sé yon listwa ki pa vwé. Yon jou, Ben té ni òpòtyounité-a pou doubout douvan klas li, èk èspliké pouki i ka kwè, sé Bondyé ki bay tout bagay lavi. Ben sèvi lokazyon-an pou di klas li sa’y té ka kwè adan, èk i fè sa épi an chay kouwaj. Kisa ki té wézilta-a? Ben di: “Titja mwen kouté mwen byen. Apwé sa i fè plizyè kòpi an atik-la mwen té sèvi pou sipòté sa mwen ka kwè adan-an, èvèk i bay chak étidyan an klas-la on kòpi.” Kisa sé étidyan-an an klas Ben fè? Mi sé sa Ben di: “An pil di yo kouté sa mwen té ka di, èvèk yo di, yo té ni wèspé pou mwen.” Kon nou ka wè an èspéyans Ben, yonn an sé bennéfis-la nou ka twapé lè nou ni kouwaj sé sa, moun ka wèspèkté nou. Osi, lè nou ka moutwé nou ni kouwaj, ègzanp nou sa ankouwajé moun ki ni tjè sensè pou vini konnèt Jéhova. Wi, nou vwéman ni bon wézon pou dévlopé kouwaj.

IMITÉ FIDÈLITÉ DANNYÈL

10. Ki kalité fidèlité Bondyé ni pou nou, èk bay ki moun nou sipozé ni kalité fidèlité sala?

¹⁰ Souvan, Bib-la ka palé konsèné fidèlité-a Bondyé ni pou sèvant li. On lòt èkspwèsyon pou kalité fidèlité sala, sé lanmityé fidèl. Bib-la ka osi moutwé, sèvant Jéhova ni menm kalité fidèlité sala pou yonn a lòt. (2 Sm 9:6, 7) Mé, Jéhova vlé nou ni kalité fidèlité sala pou li osi. Èvèk fidèlité nou pou Jéhova, sé on bagay ki sa vini pli fò piti an piti. Annou konsidiwé ki mannyè ègzanp Dannyèl ka moutwé sa.

11. Ki mannyè Dannyèl moutwé fidèlité pou Jéhova lè’y té ja an laj? (Gadé pòtwé-a ki asou kouvèti-a.)

¹¹ Diwan lavi’y, Dannyèl èspéyansé plizyè diféwan sitiwasyon ki mété fidèlité’y pou Jéhova anba tès. Mé, yonn an sé pli gwo tès-la i èspéyansé, sété lè’y té ja ni pli pasé katwiven dis (90) lanné di laj. Bò tan sala, moun péyi Midiya épi Pèwja té ja ganyen a bout vil Babilonn, èvèk sé Wa Darayòs ki té ka kondwi Babilonn. Mé sé moun-lan ki té ka twavay bay wa-a, pa té kontan Dannyèl, èk yo pa té ni pyès wèspé pou Dyé-a Dannyèl té ka adowé-a non plis. Konsa yo fè konplo pou yo tjwé Dannyèl. Yo fè wa-a pasé an lwa pou wè si Dannyèl té kay wèsté fidèl pou Jéhova, ében si’y té kay wèsté fidèl pou wa-a. Pou moutwé fidèlité’y pou wa-a, sèl sa Dannyèl té ni pou fè, sé doubout pwédyé pou twant (30) jou, menm kon tout moun. Dannyèl wifizé pou fè sa. Èk a kòz di sa, yo jété’y an tou sé lyon-an. Mé, Jéhova pwotéjé Dannyèl paski i té fidèl. I voyé nanj li pou fenmen djòl sé lyon-an, èk yo pa fè Dannyèl anyen. (Dann. 6:12-15, 20-22) Konsa, ki mannyè nou sa wèsté fidèl pou Jéhova menm kon Dannyèl?

12. Pouki Dannyèl té sa wèsté fidèl pou Jéhova?

¹² I bon pou nou chonjé, si nou ni lanmityé ki fò pou Jéhova, nou kay sa wèsté fidèl pou li. Sé pou menm wézon sala Dannyèl té sa wèsté fidèl. I té ni an chay lanmityé pou Jéhova, konsa i pa kité anyen kasé fidèlité’y pou Jéhova. San dout, Dannyèl dévlopé kalité lanmityé sala pou Jéhova, paski i té ka toujou katjilé asou sé bèl kawaktè-a Jéhova ni, èk asou sé diféwan mannyè-a Jéhova ka moutwé sé bèl kawaktè sala. (Dann. 9:4) Osi, Dannyèl té ka pwan tan pou mèdité asou tout sé bon bagay-la Jéhova té ka fè bay pèp li, épi bay li menm Dannyèl, èvèk i té ka apwésyé sa an chay.​—Dann. 2:20-23; 9:15, 16.

13. (a)  Ki difikilté sé jenn moun nou-an ka èspéyansé, ki ka mété fidèlité yo pou Jéhova anba tès? Ba yon ègzanp. (Gadé pòtwé-a osi.) (b) Silon vidiyo-a, si on moun mandé’w, ès Témwen Jéhova ka sipòté nonm ki ka kouché épi nonm, ében fanm ki ka kouché épi fanm, kisa’w sa di?

¹³ Menm kon Dannyèl, sé jenn moun nou-an ka viv anpanmi moun ki pa ni pyès wèspé pou Jéhova épi pwensip-li. Souvan, sé moun sala pa ka kontan pyèsonn ki enmen Bondyé. Anfen, adan di yo ka fè tout sa yo pé pou fè sé jenn moun nou-an kasé fidèlité yo pou Jéhova. Pou ègzanp, konsidiwé sa ki wivé yon fwè ki ka viv an péyi Australia. Non’y sé Graeme. Lè’y té an gwan lékòl, i èspéyansé on sitiwasyon ki té byen difisil. Yon jou titja-a mandé klas-la, kisa yo té kay fè si on jan yo di yo, i sé on nonm ki ka kouché épi nonm, ében i sé on fanm ki ka kouché épi fanm. Titja-a di tout moun ki té kay sipòté kalité lavi sala pou alé asou yon fasad, èk i di tout moun ki pa té kay sipòté kalité lavi sala alé asou lòt fasad-la. Graeme di, “Antiwan mwen épi an lòt étidyan ki té Témwen Jéhova, tout sé lézòt étidyan-an té asou fasad-la pou sipòté kalité lavi sala.” Sa ki fèt apwé sa té vwéman mété fidèlité’y pou Jéhova anba tès. Graeme di: “Klas sala té ka diwé pou yon nèditan, èk pou lèstan tan-an nou té an klas-la, ni sé étidyan-an, ni titja-a pwan nou sèvi wizib, épi yo ensilté nou. Mwen fè tout sa mwen té pé pou wèsté kam, èk pou èspliké sa mwen ka kwè, adan on mannyè ki wézonnab. Mé yo pa té vlé kouté mwen.” Ki éfé èspéyans sala té ni asou Graeme? I di: “Mwen pa té kontan pou moun ensilté mwen, mé mwen té ni an chay tjè kontan paski mwen wèsté fidèl pou Jéhova, èk mwen doubout fò pou sa mwen ka kwè adan.”d

14. Mansyonnen yon mannyè nou sa dévlopé kalité lanmityé-a ki kay édé nou wèsté fidèl pou Jéhova.

¹⁴ Si kon Dannyèl nou dévlopé lanmityé ki fò pou Jéhova, nou kay sa wèsté fidèl pou li. Èk yon mannyè nou sa dévlopé kalité lanmityé sala pou Jéhova, sé lè nou kontiné apwann konsèné sé bèl kawaktè-a i ni-an. Pou ègzanp, kwéyasyon ka enstwi nou an chay bagay konsèné Jéhova. Konsa si nou pwan tan pou ègzanminé sé bèl bagay-la Jéhova ja fè-a, lanmityé nou pou li kay vini pli fò. (Ronm 1:20) Osi, nou sa li sé atik-la, ében gadé sé vidiyo-a ki an ba sèksyon-an “Bagay Èstòdinè An Kwiyasyon.” Èk nou sa wivizé enfòmasyon-an ki an sé ti liv-la, Was Life Created? èk The Origin of Life​—Five Questions Worth Asking. Enfòmasyon-an ki an sé ti liv sala kay édé’w pou ni pli lanmityé èk wèspé pou Jéhova. Esther sé on jenn sè hòd péyi Denmark. Mi sé sa i di konsèné sé piblikasyon sala: “Sé ti liv sala entéwésan toubonnman. Yo ka pwézanté sé pwen-an adan an mannyè ki klè, èk yo ka kité’w fè disizyon’w, mé yo pa ka di’w kisa pou’w kwè.” Èk Ben, fwè-a nou té mansyonnen pli bonnè-a di: “Sa mwen li an sé atik-la épi an sé ti liv-la fòtifyé lafwa mwen an chay. I ban mwen pwèv ki, sé Bondyé ki fè tout lavi.” San dout, apwé’w étidyé sé atik sala épi sé ti liv-la, ou kay dakò épi Bib-la lè’y di: “[Jéhova], Senyè nou, ou vo pou moun sa onnowéʼw, pou moun sa lévé non’w, èk pou moun sa wèspèktéʼw pou pouvwaʼw. [Paski] sé ou ki fè tout bagay.”​—Wév. 4:11.e

15. Ki lòt bagay nou sa fè pou dévlopé lanmityé ki fò pou Jéhova?

¹⁵ On lòt bagay ki kay édé nou dévlopé lanmityé ki fò pou Jéhova, sé lè nou étidyé lavi Jézi, Gason Bondyé. Sé sa on jenn sè ki ka viv an péyi Germany té fè. Non’y sé Samira, èk lè’y té an ti manmay, i pa té sa konpwann ki mannyè Jéhova té sa enmen’y, èk ki mannyè i té sa fè jan épi Jéhova. Mé i té sa konpwann Jézi enmen’y, èk i té vlé’y vini jan’y. Konsa i di: “Mwen vini konnèt Jéhova pli byen lè mwen apwann konsèné Jézi. Mwen té kontan Jézi paski i janti èk i enmen manmay.” Pli Samira apwann konsèné Jézi, sé pli lanmityé’y pou Jéhova té ka vini fò. Pouki? Mi sé sa sè-a di: “Piti an piti mwen koumansé konpwann, Jézi ka imité Papa’y adan an mannyè ki pawfé. Yo ni sé menm bèl kawaktè-a. Èk mwen wéyalizé, yonn an sé wézon-an Jéhova voyé Jézi asou latè-a, sé pou édé lézòm konnèt li Jéhova, pli mèyè.” (Jan 14:9) Alò, si’w vlé fòtifyé wilasyon’w épi Jéhova, i kay bon pou’w pwan tan pou apwann tout sa’w pé konsèné Jézi. Si’w fè sa, lanmityé’w pou Jéhova kay vini pli fò, èk ou kay pli fidèl pou li.

16. Ki bennéfis nou ka twapé lè nou fidèl? (Sam 18:25; Mayka 6:8)

¹⁶ Lè nou fidèl pou lézòt moun, byen souvan nou ka ni bon jan ki fidèl pou nou osi. (Rouf 1:14-17) An plis di sa, lè nou fidèl pou Jéhova nou ka santi kam èk nou ka ni tjè kontan, paskè nou sav Jéhova kay fidèl pou nou. (Li Sam 18:25; Mayka 6:8.) Katjilé asou sa—Kwéyatè nou, Dyé Toupisan-an, vlé vini bon jan nou. Èk lè nou ni an wilasyon épi’y, la pa ni anyen ki sa kasé sa. Pyès difikilté, pyès lèlmi, pa menm lanmò, ki sa fè Jéhova tounen do’y asou nou. (Dann. 12:13; Louk 20:37, 38; Ronm 8:38, 39) Konsa, sé pa dé enpòtan i enpòtan, pou nou swiv ègzanp Dannyèl èk wèsté fidèl pou Jéhova!

KONTINÉ APWANN HÒD ÈGZANP DANNYÈL

17-18. Ki lòt lison nou sa apwann an ègzanp Dannyèl?

¹⁷ An atik sala, nou konsidiwé sèlman dé (2) an sé kawaktè-a Dannyèl té ni-an. Mé la ni an chay lòt lison nou sa apwann an ègzanp li. Pou ègzanp, Jéhova té fè Dannyèl wè diféwan bagay an wèv èk an vizyon, èvèk Jéhova té ba’y abilité-a pou èspliké sèten pwofèsi osi. An chay an sé pwofèsi sala ja akonpli. Mé, la ni lòt pwofèsi ki ka ban nou détay konsèné bagay ki kay fèt an tan pou vini. Lè sé bagay sala fèt, yo kay afèkté lavi tout moun ki asou latè-a.

¹⁸ An lòt atik-la, nou kay konsidiwé dé (2) pwofèsi ki an liv Dannyèl. Èvèk, ki nou jenn, ki nou an laj, lè nou konpwann sé pwofèsi sala, sa kay édé nou pou fè bon disizyon dépi apwézan. Osi, sé pwofèsi sala sa édé nou pou ni pli kouwaj èk pou fòtifyé fidèlité nou. Konsa, nou kay byen pawé pou sé tès-la nou kay èspéyansé touswit.