Éséyé Pou Byen Konpwann Pawòl Bondyé

1-2. Ki mannyè nou sa étidyé Bib-la pou nou sa konpwann li pli mèyè? Ba an ègzanp.

IMAJINÉ ou vlé ganyen on kay. Kisa ou té kay vlé wè avan ou ganyen kay-la? Ès ou té kay annèk vlé wè dèwò kay-la adan on pòtwé? Mé non. San dout, ou té kay vlé maché andidan kay-la, maché oliwon’y, maché dèwò’y, alé andidan sé chanm-lan, èk gadé tout bagay ki ni pou fè épi kay-la. Èk osi, i té kay jis pli mèyè si ou palé épi on moun ki konnèt konsèné mannyè-a yo té bati kay-la. Wi, ou té kay vlé konnèt tout ti détay konsèné kay-la avan ou ganyen’y.

² Nou ka fè menm bagay-la lè nou ka li èk étidyé Bib-la. Yon moun ki ka étidyé manniskwit Bib di, Bib-la menm kon “on gwo kay ki ho an chay èk fondasyon’y fon”. Alò, ki mannyè nou sa konpwann sa ki an Bib-la pli mèyè? Ében, ou ni pou pwan tan’w pou étidyé Bib-la. Poutji sa enpòtan? Sa enpòtan, paski si’w pa pwan tan’w pou étidyé Bib-la ou pa kay apwann djè. Anfen, kon Hibrou 5:12 di, ou pé apwann “pwèmyé lison konmisyon Bondyé”, sa vlé di, bagay ki senp. Konsa, menm kon ou ni pou alé andidan on kay pou byen ègzanminé tout ti détay li, an menm mannyè-a ou ni pou “byen ègzanminé” Bib-la pou byen konpwann li. Wi, on bon mannyè pou étidyé Bib-la sé pou éséyé pou konpwann ki mannyè sa Bib-la ka di an yon plas ka sipòté sa’y ka di adan on lòt plas. Osi, éséyé pou konpwann sé lavéwité-a ki an Bib-la èk poutji ou ka kwè yo.

3. Silon Èfésòs 3:14-19 NWT, kisa nou sipozé fè, èk poutji?

³ Pou nou byen konpwann Pawòl Bondyé, la ni sèten bagay nou sipozé byen étidyé. Zapòt Pòl té ankouwajé sé Kwityen-an an pwèmyé syèk-la pou byen étidyé Pawòl Bondyé pou yo té sa ‘byen konpwann lajè-a, londjè-a, hòtè-a, èk fondjè-a’. Konsa yo té kay ‘vini byen wasiné èk byen établi’ an lafwa yo. (Li Èfésòs 3:14-19 NWT.) Wi, nou ni pou fè éfò-a pou byen étidyé èk byen konpwann Pawòl Bondyé. Alò annou diskité sé diféwan bagay-la nou sa fè kisa édé nou pou byen konpwann Pawòl Bondyé.

FÈ WICHACH POU APWANN SÉ BAGAY-LA KI SÉWÉ FON AN BIB-LA

4. Lè nou ka fè létid pèwsonnèl nou, kisa nou sa fè pou vansé pli pwé Jéhova? Bay yonndé ègzanp.

⁴ Kon Kwityen, nou pa vlé sèlman konnèt sé bagay senp-lan ki an Bib-la. Wi, épi èd lisentèspwi Jéhova nou sa apwann sé bagay-la ki “séwé fon” an Bib-la. (1 Kòr. 2:9, 10) Konsa, ki mannyè ou sa apwann sé bagay-la ki “séwé fon” an Pawòl Bondyé? Ében, lè’w ka fè létid pèwsonnèl ou, ou sa fè wichach, èk sa sa édé’w apwann sé bagay-la ki “séwé fon” an Pawòl Bondyé, èk osi sa sa édé’w pou vansé pli pwé Jéhova. Pou ègzanp, ou sa fè wichach asou mannyè-a Jéhova té moutwé sèvant li lanmityé an tan pasé, èk mannyè-a sa ka moutwé Jéhova enmen’w osi. Ou sa osi étidyé konsèné mannyè-a Jéhova té vlé nasyon Izwayèl adowé’y, èk konpawé sa ou apwann épi mannyè-a i vlé nou adowé’y jòdi. Ében pitèt ou sa étidyé tout sé détay-la an sé pwofèsi-a konsèné lavi, èk minis Jézi lè’y té asou latè-a.

5. Ès la ni on bagay an Bib-la ou vlé fè pli wichach asou? Ba yon ègzanp.

⁵ Adan fwè èk sè ki kontan fè wichach mansyonnen déotwa bagay an Bib-la yo té kay kontan fè pli wichach asou. Alò, ou sa wè adan sé diféwan bagay-la yo mansyonnen-an an bwèt-la “Bagay Ou Sa Fè Wichach Asou.” Osi lè’w ka étidyé sé sijé sala ou kay ni an chay djèwté si’w sèvi Watch Tower Publications Index ében Research Guide for Jehovah’s Witnesses. Alò, pouki ou kay twapé on chay djèwté? Ében, sa sé paski, lè’w fè wichach èk ou fouyé fon an Pawòl Bondyé, sa kay fòtifyé lafwa’w èk ‘ou kay jwenn nòlaj Bondyé’. (Pwov. 2:4, 5) Bon. Apwézan, nou kay diskité déotwa lavéwité ki séwé fon an Bib-la nou sa byen étidyé.

KATJILÉ FON ASOU DIVWA BONDYÉ

6. (a) Ba yon ègzanp ki ka moutwé Bondyé ka toujou fè sa’y ni an lidé’y pou fè. (b) Pouki nou sa di divwa Bondyé pou lézòm èk pou latè-a ‘étonnèl’? (Èfésòs 3:11 NWT)

⁶ Atjwèlman annou konsidiwé sa Bib-la ka di konsèné divwa Bondyé ében sa’y ni an lidé’y pou fè. Bib-la di Bondyé ka toujou fè sa’y ni an lidé’y pou fè. Pou ègzanp, ann’ di ou vlé alé adan on sèten vilaj, mé lè’w wivé on sèten plas ou wè on gwo pyé bwa bawé chimen-an. Konsa i ka sanm konmsi ou pa kay sa wivé plas-la ou vlé alé-a. Mé ou vwéman vlé wivé plas-la, konsa ou ka pwan on lòt chimen pou wivé plas-la. Ében sé menm mannyè-a i yé épi divwa Bondyé. Wi, Jéhova sa chwazi diféwan mannyè pou akonpli divwa’y. Èk sa sé paski, ‘i ja fè tout bagay maché pou lapéti divwa’y’. (Pwov. 16:4) Osi Bib-la ka di nou divwa Bondyé ‘étonnèl’. (Èfés. 3:11 NWT) Mé pouki nou sa di divwa Bondyé pou lézòm èk pou latè-a ‘étonnèl’? Ében sa sé paski Jéhova, ‘Wa-a ki la pou tout tan’ ja kité an chay tan pasé avan i akonpli divwa’y konplètman. Èk osi tout sa Jéhova kay akonpli kay diwé pou tout tan. Kanmenm, kisa ki divwa Bondyé, èk ki chanjman i té ni pou fè pou akonpli divwa’y?

7. Apwé Adanm épi Èv dézobéyi Bondyé, ki chanjman Jéhova fè pou akonpli divwa’y? (Mafyou 25:34)

⁷ Bondyé té di Adanm épi Èv sa’y té ni an lidé pou yo. Silon Jennésis 1:28, Jéhova té vlé yo ‘fè an chay ich, pléplé latè-a, ni latè-a anba pouvwa yo, èk ni pouvwa asou tout bèt ki ka fè mouvman asou latè-a’. Mé lè Adanm épi Èv dézobéyi Bondyé yo annékòz tout ich yo pou éwityé péché. Kanmenm, sa Adanm épi Èv fè pa té anpéché Bondyé akonpli divwa’y. Konsa Bondyé fè chanjman an mannyè-a i té kay akonpli divwa’y. Wi, la menm, Bondyé désidé i kay établi on Gouvèdman an syèl, ki kay fè asiwé divwa’y pou latè-a èk lézòm fèt vwé. (Li Mafyou 25:34.) Alò, a lè-a Jéhova té chwazi-a, i voyé Gason’y Jézi asou latè-a pou enstwi moun konsèné Wéyòm-lan ében Gouvèdman-an, èk pou bay lavi’y kon on wanson pou sové nou hòd péché èk lanmò. Apwé sa, Bondyé wésisité Gason’y èk i mennen’y an syèl pou kondwi kon Wa an Wéyòm li. Mé la ni on chay lòt bagay pou nou apwann konsèné divwa Bondyé.

8. (a) Kisa ki pwensipal konmisyon-an ki an Bib-la? (b) Silon Èfésòs 1:8-11 NWT, ki lòt bagay Jéhova kay akonpli? (Gadé pòtwé-a ki asou kouvèti-a.)

⁸ Pwensipal konmisyon-an ki an Bib-la sé sa, Jéhova kay sèvi Wéyòm li ki anba kondwit Jézi Kwi, pou sanngtifyé ében onnowé non’y, èk pou akonpli divwa’y pou latè-a. Èk Jéhova pwonmèt tout bagay kay fèt menm kon i di. (Izay. 46:10, 11; Hib. 6:17, 18) Wi, an tan pou vini latè-a kay vini on pawadi, èk ich Adanm èk Èv ki ka adowé Jéhova kay vini pawfé èk yo kay enjwi “an bon lavi pou tout tan” asou latè-a. (Sam 22:26) Mé Jéhova kay akonpli jis plis pasé sa. Konsa, ki lòt bagay Jéhova kay akonpli? Ében, Jéhova kay fè tout sé sèvant li-a, ni sa ki an syèl ni sa ki asou latè-a adowé’y ansanm an lilyon. Wi, a lè sala tout moun kay obéyi Jéhova kon Kondwitè yo. (Li Èfésòs 1:8-11 NWT.) Anfen pa dé kontan nou kontan pou wè bèl mannyè-a Jéhova ka akonpli divwa’y.

KATJILÉ KONSÈNÉ LAVI’W AN TAN POU VINI

9. Lè nou ka li ében kouté Pawòl Bondyé, kisa nou ka apwann ki kay fèt an tan pou vini?

⁹ Annou konsidiwé pwofèsi-a ki an Jennésis 3:15.b Jéhova té mansyonnen pwofèsi sala apwé Adanm èk Èv péché an jaden Édenn. Pwofèsi sala ni pou fè épi diféwan bagay ki té ni pou fèt pou akonpli divwa Bondyé. Mé sé bagay sala té kay fèt plizyè mil lanné apwé Jéhova mansyonnen pwofèsi-a. Pou ègzanp, pwofèsi-a té ni pou fè épi Abrahanm èk désandan’y. Jéhova té di Abrahanm yonn an sé désandan’y-lan té kay vini Mèsaya-a. Mé sa té kay pwan an chay tan avan i té fèt. (Jen. 22:15-18) Èk pwofèsi-a té osi di Satan té kay blésé Jézi an talon’y, èk sa té fèt an lanné 33 an épòk nou. (Twav. 3:13-15) Mé dènyé bagay-la ki ni pou fèt an pwofèsi sala, sé lè Jézi kwazé tèt Satan. Èk sa kay fèt an plis pasé yon mil lanné (1,000) an tan pou vini. (Wév. 20:7-10) Èk osi, Bib-la ka wévélé an chay lòt bagay ki kay pwan kou avan Bondyé détwi Satan èk sistèm li.

10. (a) Ki lòt bagay ki kay fèt touswit? (b) Kisa nou sa fè pou pwépawé lidé nou èk tjè nou pou sé bagay-la ki kay fèt touswit? (Gadé nòt-la an bout paj-la.)

¹⁰ Annou katjilé asou sé bagay èstòdinè-a Bib-la di ki kay fèt an tan pou vini. Pwèmyéman sé nasyon-an ében sé gouvèdman latè-a kay pwoklanmé ki, “tout bagay ka alé byen”. (1 Tèsa. 5:2, 3) Èk ‘sibitman’ gwan twibilasyon-an kay koumansé lè sé nasyon-an ataké tout fo wilizyon. (Wév. 17:16) Apwé sa, “bagay kay fèt an syèl-la . . . épi tout moun . . . kay wè Gason Lézòm-lan ka vini asou nwaj an syèl-la épi pouvwa épi gwan klèté”. (Maf. 24:30) Osi Jézi kay jijé lézòm, èk i kay sépawé sé mouton-an hòd sé kabwit-la. (Maf. 25:31-33, 46) Chonjé, diwan gwan twibilasyon-an Satan kay kontiné goumen kont Jéhova. Èk paski i hayi pèp Jéhova si tèlman, i kay pousé sé nasyon-an pou vini ansanm pou ataké pèp Jéhova. Bib-la ka kwiyé gwoup nasyon sala Gòg Ki Sòti Péyi Magòg. (Izik. 38:2, 10, 11) An plis di sa, diwan gwan twibilasyon-an, Jézi kay voyé sé nanj li-a pou asanblé tout sé annonté-a ki asou latè-a toujou, èk i kay mennen yo an syèl. Èvèk Jézi, sé nanj-lan, èk sé annonté-a kay fòmé an lawmé pou délivwé nou diwan ladjè Anmagèdonn.c (Maf. 24:31; Wév. 16:14, 16) Èk apwé tout sé bagay sala fèt Jézi kay kondwi latè-a pou yon mil (1,000) lanné.​—Wév. 20:6.

11. Lè’w katjilé asou èspwa-a ou ni pou viv pou tout tan, ki mannyè sa ka fè’w santi? (Gadé pòtwé-a osi.)

¹¹ Ékléziyastis 3:11 di: ‘[Jéhova] jis mété dézi-a pou viv pou tout tan an tjè lézòm.’ Alò éséyé pou katjilé asou sa ki kay fèt apwé mil (1,000) lanné kondwit Jézi Kwi. Wi, katjilé asou ki otan pwé ou kay santi ou pwé épi Jéhova. Anfen, liv-la Draw Close to Jehovah, paj 319 di: “Lè nou ja viv pou wivé yon san (100) lanné pou jik lè nou wivé on bilyon lanné, nou kay konnèt otan pli bagay konsèné Jéhova pasé nou konnèt apwézan. Mé nou kay toujou santi la ni otan pli bagay nou sa apwann konsèné Jéhova. . . . Nou pa sa menm imajiné ki otan bèl èk antéwésan lavi kay yé an Pawadi-a. Èk bagay-la ki kay pli bèl sé sa, nou kay toujou vansé pwé Jéhova.” Konsa, paditan nou ka èspéwé pou tan sala wivé, ki lòt bagay nou sa étidyé an Pawòl Bondyé?

ÉSÉYÉ KONPWANN SA KI KA FÈT AN SYÈL

12. Ki mannyè nou sa ni on ti lidé konsèné sa ki ka fèt an syèl? Ba yon ègzanp.

¹² Bib-la ka ban nou on ti lidé konsèné mannyè i yé pou antwé an pwézans Bondyé ‘an syèl’. (Izay. 33:5) Osi Bib-la ka di nou konsèné bagay ki èstòdinè konsèné Jéhova èk ògannizasyon’y ki an syèl. (Izay. 6:1-4; Dann. 7:9, 10; Wév. 4:1-6) Pou ègzanp, lè nou li ében kouté liv Izikèl, nou sa apwann konsèné sé bagay èstòdinè-a Izikèl té wè lè ‘syèl té ouvè èk Bondyé té fè’y wè vizyon’. (Izik. 1:1) Wi, lè nou li ében kouté sé lévanjil-la ki ni vizyon konsèné syèl, sa kay ban nou on ti lidé konsèné sé bagay-la ki ka fèt an syèl.

13. Silon Hibrou 4:14-16, kisa ou ka apwésyé konsèné sa Jézi ka fè ban nou hòd syèl?

¹³ Katjilé asou sa Jézi ka fè ban nou hòd syèl kon Wa nou, èk Chèf Pwèt nou ki plen konpasyon. Wi, gwanmèsi Jézi nou sa “apwoché Bondyé èk konfyans” an lapwiyè, èk Bondyé kay ni konpasyon asou nou èk “i kay moutwé nou bontéʼy lè nou bizwenʼy”. (Li Hibrou 4:14-16.) Konsa, toulé jou nou vlé katjilé asou sa Jéhova èk Jézi ja fè ban nou, èk sa yo ka fè ban nou apwézan hòd syèl. Wi, paski Jéhova èk Jézi ni an chay lanmityé pou nou, sa sipozé touché nou èk pousé nou pou adowé Jéhova épi tout tjè nou.​—2 Kòr. 5:14, 15.

14. Ki mannyè nou sa moutwé nou ka vwéman apwésyé Jéhova èk Jézi? (Gadé sé pòtwé-a osi.)

¹⁴ Yonn an sé mannyè-a nou sa moutwé nou ka vwéman apwésyé Jéhova èk Jézi, sé lè nou fè tout sa nou pé pou édé moun vini Témwen Jéhova èk disip Jézi. (Maf. 28:19, 20) Anfen, nou ni ègzanp zapòt Pòl, èk sa’y té fè pou moutwé apwésiyasyon’y pou sa Jéhova èk Jézi té fè ba li. Wi, i twavay wèd an minis li pou édé ‘sové an chay moun adan népòt mannyè ki posib’. (1 Kòr. 9:22, 23) Èk sa sé paski, i té konnèt volonté Jéhova sé pou “tout [moun] sové épi vini konnèt lavéwité”.—1 Tim. 2:3, 4.

TWAPÉ DJÈWTÉ LÈ’W KA ÉTIDYÉ PAWÒL BONDYÉ

15. Silon Sam 1:2, kisa ki kay ban nou tjè kontan?

¹⁵ Moun-lan ki té ékwi Sam 1:1-6 di, on moun ki ni djèwté èk siksé an lavi’y, sé on moun ki “ka pwan plézi pou obéyi lwa Bondyé Senyè-a, èk i ka étidyéʼy lajouné kon lannwit”. Pou ègzanp, an liv-la Studies in the Psalms, Joseph Rotherham yon nonm ki ka twadwi Bib di: “On moun sipozé vlé djid Bondyé si tèlman ki, i té kay chaché pou’y, étidyé’y, èk pasé on chay tan ka mèdité asou’y.” I osi di: “Si yon jou pasé épi on moun p’òkò li Bib-la, moun-lan gaspiyé jou sala.” Wi, lè’w ka étidyé Pawòl Bondyé ou sa twapé djèwté si’w éséyé apwann konsèné tout sé ti détay-la ki an sé vèwsé-a, èk si’w éséyé wè mannyè yo tout ni yon konnèksyon. Anfen, pa dé kontan ou kay kontan lè’w ka éséyé pou byen konpwann Pawòl Bondyé!

16. Kisa nou kay diskité an lòt atik-la?

¹⁶ Sé bèl lavéwité-a Jéhova ka enstwi nou an Pawòl li pa twò wèd pou nou konpwann. Alò, an lòt atik-la nou kay konsidiwé yon lavéwité ki séwé fon. Lavéwité sala ni pou fè épi gwan tanp spiwityouèl Jéhova zapòt Pòl dékwi an lèt-la i té ékwi sé Kwityen-an an kongwigasyon Hibrou-a. Wi, nou ni konfyans-lan ki, kon’w ka étidyé sijé sala ou kay ni an chay djèwté.