Édé Étidyan Bib Ou Fè Disizyon-an Pou Sèvi Jéhova

1-2. (a) Pouki adan étidyan ka twapé’y wèd pou fè disizyon-an pou vini an Témwen Jéhova? (b) Kisa nou kay diskité an atik sala?

ÈS LA té ni bagay ki té ka fè’y wèd pou ou fè disizyon-an pou vini an Témwen Jéhova? Pou ègzanp, pitèt ou té kwè fanmi’w, jan’w ében moun ou ka twavay épi té kay vin faché épi’w. Ében pitèt ou té kwè i té kay twò difisil pou ou obéyi wèg Jéhova. Ében si ou té ka santi kon sa, ou sa kopwann mannyè étidyan Bib ou ka santi. Èk pouki i difisil pou i fè disizyon-an pou vini an sèvant Jéhova.

² Bon. Jézi té sav bagay kon sa té sa anpéché an moun sèvi Jéhova. (Maf. 13:20-22) Mé i twavay wèd pou édé sé moun-lan ki té ka twapé’y difisil pou swiv li. Alò i moutwé sé disip li-a kat «4» diféwan mannyè pou édé moun kon sa. (1) Mannyè pou édé yo wè sa ki ka anpéché yo fè pwogwé. (2) Mannyè pou édé yo fòtifyé lanmityé yo pou Jéhova. (3) Mannyè pou édé yo mété Jéhova pwenmyé an lavi yo. Èk (4) mannyè pou édé yo ganyen a bout òpozisyon. Bon, ki mannyè nou sa fè sé kat «4» bagay sala, kon nou ka sèvi liv-la, Ou Sa Ni An Bon Lavi Pou Tout Tan! pou édé étidyan Bib nou fè disizyon-an pou sèvi Jéhova?

ÉDÉ ÉTIDYAN BIB OU WÈ SA KI KA ANPÉCHÉ’Y FÈ PWOGWÉ

3. Kisa ki té ka fè’y difisil pou Nikodimòs swiv Jézi?

³ Nikodimòs té ni an gwo pozisyon anpami sé Jwif-la. Mé la té ni an bagay ki té ka fè’y difisil pou’y swiv Jézi. Jézi té ka pwéché pou apipwé sis «6» mwa, mé Nikodimòs té ha wéyalizé sé Bondyé ki té voyé’y. (Jan 3:1, 2) Kanmenm, Nikodimòs chwazi pou palé épi Jézi yon jou òswè lè moun pa té sa wè’y, “paski i té pè sé chèf Jwif-la.” (Jan 7:13; 12:42) Èk pitèt i té kwè si’y vini an disip Jézi, i té kay pèd gwo pozisyon’y.a

4. Ki mannyè Jézi édé Nikodimòs konpwann sa Jéhova té vlé’y fè?

⁴ Bon, Nikodimòs té konnèt Lwa-a, mé i té bizwen èd pou konpwann sa Jéhova té vlé’y fè. Alò ki mannyè Jézi édé’y? Ében Jézi fè tan pou palé épi’y jis lé òswè. Èk Jézi di’y a klè sa’y té ni pou fè pou vini disip li: (1) I té ni pou wépanti péché’y. (2) I té ni pou batizé. Èk (3) i té ni pou mété lafwa an Gason Bondyé.​—Jan 3:5, 14-21.

5. Ki mannyè ou sa édé étidyan Bib ou wè sa ki ka anpéché’y fè pwogwé?

⁵ Bon, menm si yon étidyan Bib konnèt Bib-la byen, i pé bizwen èd pou wè sa ki ka anpéché’y sèvi Jéhova mannyè-a Jéhova vlé. Pou ègzanp, pitèt twavay li ka pwan twòp tan’y. Ében pitèt fanmi’y pa vlé’y vini an Témwen Jéhova. Alò menm kon Jézi, fè tan pou édé’y. Pitèt ou sa envité’y pou alé maché épi’w, ében pou zòt pwan an ti drayv ansanm. Lè zòt fè bagay kon sa, pitèt i kay pli ézé pou’y di’w konsèné lavi’y, èk sa kay édé’w wè sé difikilté-a i ka èspéyansé. Konsa ou sa édé’y wè mannyè i sa fè chanjman. Èk ou sa fè’y chonjé wézon-an i vlé fè sé chanjman sala sé pou plè Jéhova, èk pa pou plè’w.

6. Ki mannyè ou sa édé étidyan Bib ou pou twapé fòs-la i bizwen pou fè sa i ka apwann? (1 Kòrint 16:13)

⁶ Lè étidyan Bib ou asiwé Jéhova kay édé’y pou fè sa ki dwèt, i kay ni fòs-la pou fè sa’y ka apwann. (Li 1 Kòrint 16:13.) Bon, ès ou ka chonjé lè’w té ka alé lékòl? Ou té ni plizyè titja, mé kilès ou té simyé? Ès sé pa titja-a ki té ni pasyans épi’w, èk ki té ka ba’w konfyans ou sa fè pwogwé? Mé wi! Èben an menm mannyè-a, ou pa sèlman vlé enstwi étidyan’w sa Bondyé vlé’y fè. Mé ou osi vlé bati konfyans li ki, i sa fè’y paski Jéhova kay édé’y. Mé ki lòt bagay ou sa fè pou édé étidyan Bib ou?

ÉDÉ ÉTIDYAN’W FÒTIFYÉ LANMITYÉ’Y POU JÉHOVA

7. Ki mannyè Jézi édé moun pou fòtifyé lanmityé yo pou Jéhova?

⁷ Bon, Jézi té sav lè an moun enmen Bondyé, i kay vlé fè sa i ka apwann. Konsa, souvan, i té ka enstwi moun bagay ki té kay fòtifyé lanmityé yo pou Papa yo an syèl. Pou ègzanp, i enstwi yo ki, Jéhova menm kon an papa ki ka bay ich li bon bagay. (Maf. 7:9-11) I posib adan sé moun-lan ki té ka kouté Jézi, pitèt pa té ni an bon wilasyon épi papa yo. Alò imajiné mannyè-a yo té ka santi, lè Jézi di yo listwa-a konsèné papa-a ki té byenvini gason’w ki té fè an chay mové bagay. Konsa Jézi édé yo wè Jéhova té vwéman enmen yo, èk i té vlé édé yo.​—Louk 15:20-24.

8. Ki mannyè ou sa édé étidyan’w pou fòtifyé lanmityé’y pou Jéhova?

⁸ Ou sa édé étidyan Bib ou fòtifyé lanmityé’y pou Jéhova, lè’w ka toujou enstwi’y konsèné bèl kawaktè Jéhova. Konsa, chak kou zòt étidyé Bib-la, édé’y pou wè a klè mannyè sa i apwann ka moutwé Jéhova vwéman enmen’y. Épi lè zòt ka palé konsèné wanson-an, édé’y pou wè Jéhova potjiwé bèl kado sala pa sèlman paski i enmen tout lézòm, mé paski i enmen’y. (Ronm 5:8; 1 Jan 4:10) Wi, lè étidyan’w byen konpwann ki otan Jéhova enmen’y, sa kay édé’y pou enmen Jéhova pli.​—Gal. 2:20.

9. Kisa ki édé Michael pou koumansé sèvi Jéhova?

⁹ Bon. Annou konsidiwé èspéyans Michaelb, ki ka wèsté Indonesia. I té lévé an lavéwité-a, mé i pa janmen batizé. Lè’y té ni dizwit «18» lanné, i kité Indonesia pou alé twavay. Bon. Michael witounen Indonesia pou mayé, kanmenm pli ta i kité fanmi’y dèyè èk alé lòt péyi pou twavay ankò. Èvèk diwan tan sala, madanm li èk fi’y koumansé étidyé Bib-la, èk yo té ka fè sa yo té ka apwann. Malèwèzman, manman Michael mò. Konsa i désidé pou viwé lakay li pou pwan ka papa’y, èk i dakò pou koumansé an létid Bib. Lè yo té ka konsidiwé enfòmasyon-an anba sèksyon-an “Annou Apwann Pli” an lison 27 an liv-la Ou Sa Ni On Bon Lavi Pou Tout Tan! sa touché tjè Michael. Anfen, lè Michael katjilé asou mannyè-a tjè Jéhova té kwazé pou wè mannyè Gason’y té ka soufè, Michael koumansé pléwé. Èk lè’y wéyalizé ki otan Jéhova èk Jézi enmen’y, sa pousé’y pou fè gwo chanjman an lavi’y èk i batizé.

ÉDÉ ÉTIDYAN’W MÉTÉ JÉHOVA PWÈMYÉ AN LAVI’Y

10. Kisa Jézi té fè pou édé sé disip li-a mété Jéhova pwèmyé an lavi yo? (Louk 5:5-11) (Gadé pòtwé-a osi.)

¹⁰ Adan sé moun-lan Jézi té pwéché bay, té konnèt i sété Mèsaya-a. Mé yo té bizwen èd pou konpwann ki, pou yo té sa sèvi Jéhova yo té ni pou pwéché Bon Nouvèl-la. Pita èk Androu té ha ka swiv Jézi pou tjèk tan lè Jézi envité yo pou wann sèvis an plen. (Maf. 4:18, 19) Yo té ka péché ansanm épi Jémz èk Jan, èk sa sété an bèl biznis. (Mak 1:16-20) Mé Pita èk Androu doubout twavay yo kon péchè pou yo té sa swiv Jézi. Èk lè yo fè disizyon sala, san dout yo té fè asiwé yo té sa otjipé fanmi yo padan yo té ka swiv Jézi. Bon, kisa ki édé yo pou mété twavay pwèchman-an douvan biznis yo? Ében wakont-lan an liv Louk ka di nou, Jézi té fè an miwak ki fòtifyé konfyans yo ki, si yo mété Bondyé pwèmyé i té kay toujou pwan ka yo.​—Li Louk 5:5-11.

11. Kisa nou sa di étidyan nou pou fòtifyé lafwa’y an Jéhova?

¹¹ Nou pa sa fè miwak kon Jézi, mé nou sa di étidyan Bib nou èspéyans konsèné mannyè Jéhova té sipòté moun ki mété’y pwèmyé an lavi yo. Pou ègzanp, ès ou ka chonjé mannyè Jéhova té édé’w lè’w té koumansé atandé mitin? Pitèt ou té ni pou palé épi bòs ou, èk di’y pouki ou pa té sa twavay ta asou sé jou-a ou té ni mitin. Alò di étidyan’w mannyè i té fòtifyé lafwa’w lè’w wè mannyè-a Jéhova té vwéman édé’w paski ou mété’y pwèmyé an lavi’w.

12. (a) Pouki i bon pou envité diféwan fwè èben sè lè’w ka étidyé épi an moun? (b) Ki lòt bagay ou sa sèvi pou édé étidyan’w pou mété Jéhova pwèmyé an lavi’y? Ba yon ègzanp.

¹² Étidyan Bib ou kay twapé an chay bennéfis lè’y tann mannyè lòt fwè èk sè ha fè an chay chanjman pou mété Jéhova pwèmyé an lavi yo. Alò lè’w ka étidyé épi an moun, i kay bon pou envité diféwan fwè èk sè pou vini épi’w. Ou sa mandé yo ki mannyè yo apwann lavéwité-a? Èk ki sakwifis yo té fè pou mété Jéhova pwèmyé an lavi yo? Osi, ou épi étidyan’w sa gadé sé vidiyo-a anba sèksyon-an “Annou Apwann Pli” ében “Lòt Enfòmasyon Ou Sa Gadé” an liv-la Ou Sa Ni On Bon Lavi Pou Tout Tan! Pou ègzanp, lè’w ka étidyé lison 37 an liv-la, gadé vidiyo-a Jéhova Kay Potjiwé Sa Nou Bizwen. Èvèk palé konsèné sa zòt wè an vidiyo-a. Èk édé étidyan’w wè a klè, Jéhova kay édé’y, si’y mété’y pwèmyé an lavi’y.

ÉDÉ ÉTIDYAN’W GANYEN A BOUT ÒPOZISYON

13. Ki mannyè Jézi pwépawé sé disip li-a pou òpozisyon?

¹³ Plizyè fwa, Jézi di sé disip li-a moun té kay òpozé yo, jis fanmi yo. (Maf. 5:11; 10:22, 36) Èk pa twò lonng avan i mò, i di yo moun té kay jis éséyé tjwé yo paski yo té ka adowé Jéhova. (Maf. 24:9; Jan 15:20; 16:2) Konsa i di yo pou pwan pwokosyon lè yo té an minis-lan. Pou ègzanp, i di yo pou pa babyé épi moun ki té ka palé kont sa yo té ka kwè adan. Èk pou pwan pwokosyon épi sa yo di èk sa yo fè.

14. Ki mannyè nou sa édé étidyan Bib nou pwépawé pou òpozisyon? (2 Timòfi 3:12)

¹⁴ Menm kon Jézi, nou vlé pwépawé étidyan Bib nou pou òpozisyon. Konsa nou vlé fè yo konnèt sa jan yo, fanmi yo, èben moun yo ka twavay épi sa fè ében di paski yo ka étidyé Bib-la. Wi, moun pé pwan’y sèvi wizib, paski i ka éséyé fè sa Bib-la ka di. Ében yo pé kwititjé sa i ka apwann an Bib-la. Alò i bon pou pwépawé étidyan’w byen bonnè pou òpozisyon. Konsa i pa kay sipwi lè’y fèt, èk i kay sav sa pou di èk sa pou fè. (Li 2 Timòfi 3:12.)

15. Kisa ki sa édé étidyan’w pou tjenbé fò anba òpozisyon?

¹⁵ Bon. Si fanmi étidyan’w ka òpozé’y, ou sa édé’y wè sa pa dwòl, paski jis fanmi Jézi té ka opozé’y. Anfen, yo té jis kwè i té fou. Osi, ou sa édé’y katjilé asou poutji fanmi’y ka opozé’y. Pitèt fanmi’y kwè Témwen Jéhova ka enstwi mansonj, ében pitèt yo kwè Témwen Jéhova pa bon moun. (Mak 3:21; Jan 7:5) Konsa édé étidyan’w pou ni pasyans, èk pou moutwé fanmi’y èk lézòt moun ki ka opozé’y jantiyès.

16. Ki mannyè ou sa édé étidyan’w pou di moun sa i ka kwè adan, adan an mannyè ki janti èk wézonnab?

¹⁶ Bon. Menm si fanmi étidyan’w vlé konnèt pli konsèné sa i ka apwann, i kay bon pou’y pa ba yo twòp enfòmasyon yon fwa. Anfen, si’y fè sa, sa kay lasé yo, èk yo pa kay vlé palé épi’y konsèné Bib-la ankò. Alò, enkouwajé’y pou di fanmi’y sa’y ka kwè adan mizi an mizi, paski sa kay ba yo gou pou kouté’y an lòt kou. (Kòl. 4:6) Osi, pitèt i sa enkouwajé fanmi’y pou alé asou wèbsayt-la jw.org, paski sa kay édé yo pou apwann pli konsèné Témwen Jéhova népòt lè yo vlé.

17. Ki mannyè ou sa édé étidyan’w wéponn kwèsyon moun ka mandé konsèné Témwen Jéhova? (Gadé pòtwé-a osi.)

¹⁷ Ou sa sèvi sèksyon-an “Kwèsyon Moun Ka Toujou Mandé Konsèné Tèmwen Jéhova” asou jw.org pou édé étidyan’w pwépawé wépons ki senp, lè fanmi’y ében lézòt moun mandé’y kwèsyon. (2 Tim. 2:24, 25) Osi, pa obliyé diskité sèksyon-an “Adan Moun Ka Di” ében “Adan Moun Pé Mandé” an liv-la, Ou Sa Ni On Bon Lavi Pou Tout Tan! Èvèk ankouwajé étidyan’w pou pwatiké sa i kay di an pawòl li menm. Èk pa pè pou édé’y wéponn kwèsyon-an adan an pli mèyè mannyè. Wi, lè ou fè tan pou pwatiké an konmézasyon épi étidyan’w, sa kay édé’y pou fè défans sa i ka kwè adan épi konfyans.

18. Ki mannyè ou sa ankouwajé étidyan’w pou koumansé pwéché épi kongwigasyon-an? (Mafyou 10:27)

¹⁸ Bon. Jézi konmandé sé disip li-a pou pwéché Bon Nouvèl-la bay tout moun. (Li Mafyou 10:27.) Lè an étidyan koumansé pwéché épi kongwigasyon-an, Jéhova kay édé’y, èk sa kay bati konfyans li an Jéhova. Mé ki mannyè ou sa édé étidyan’w pou koumansé pwéché épi kongwigasyon-an? Ében, pitèt la ni an kanmpéyn spésyal ki kay koumansé. Konsa, ou sa édé étidyan’w wè sa i bizwen fè pou’y sa kwalifyé pou patisipé an kanmpéyn sala. Èk di’y pouki i pli ézé pou koumansé pwéché diwan an kanmpéyn. Osi, ou sa ankouwajé’y pou koumansé bay ansayman an sé mitin-lan an mitan simenn-lan, paski sa kay édé’y apwann mannyè pou èspliké sa i ka kwè adan.

MOUTWÉ ÉTIDYAN’W OU NI KONFYANS-LAN KI I VLÉ PLÈ JÉHOVA

19. Ki mannyè Jézi moutwé sé disip li-a i té ni konfyans yo té vlé plè Jéhova, èk ki mannyè nou sa swiv ègzanp li?

¹⁹ Jézi té ni si tèlman konfyans sé disip li-a té vlé plè Jéhova, avan i mouté an syèl, i di yo, yon jou yo té kay ansanm ankò. Bon, sé disip li-a pa té kopwann Jézi té ka di yo té kay alé an syèl. (Jan 14:1-5, 8) Èk Jézi té konnèt yo té bizwen tan pou kopwann an chay lòt bagay. (Jan 16:12) Mé kanmenm, i té ni konfyans-lan ki, yo té vlé plè Jéhova. Èvèk menm kon Jézi, nou sa moutwé sé étidyan nou-an nou ni konfyans yo vlé plè Jéhova èk yo vlé wèsté fidèl pou li.

20. Ki mannyè Mafa moutwé i té ni konfyans étidyan’y té vlé plè Jéhova?

²⁰ Bon, nou pa janmen vlé pèd konfyans-lan ki, étidyan Bib nou vlé plè Jéhova. Pwan pou ègzanp Mafa, an sésé ki ka wèsté an Malawi. I koumansé an létid Bib an liv-la, Ou sa Ni On Bon Lavi Pou Tout Tan! épi Pètra, an jenn fanm Katolik. Bon. Lè yo fini diskité lison katòz «14», Mafa mandé Pètra si’y kwè nou sipozé sèvi imaj pou adowé Jéhova. A lè sala Pètra vin faché èk i di: “Si mwen vlé sèvi imaj sa sé disizyon mwen!” Konsa Mafa té kwè Pètra té kay doubout létid Bib-la. Mé paski Mafa té ni konfyans-lan ki, Pètra té vlé plè Jéhova, i té ni èspwa, apwé an tan Pètra té kay vin kopwann i pa bon pou sèvi imaj. Bon, létid-la kontiné, èk déotwa mwa pli ta, Mafa mandé Pètra kwèsyon sala an lison twant kat «34»: “Ki bennéfis ou ja twapé an sa ou ka apwann an Bib-la èk sa ou ka apwann konsèné Jéhova?” Mafa di: “Pètra mansyonnen an chay bèl bennéfis i ha twapé, èk i di i ka apwésyé mannyè Témwen Jéhova ka widjèkté tout sa Bib-la di ki pa bon.” Èvèk touswit apwé sa Pètra doubout sèvi imaj èk i jis batizé.

21. Ki mannyè nou sa édé étidyan nou pou fè disizyon-an pou sèvi Jéhova?

²¹ Sé vwé, Bib-la ka di sé Jéhova ki ka fè lavéwité-a lévé adan tjè an moun. Mé nou osi sa édé étidyan Bib nou fè pwogwé. (1 Kòr. 3:7) Alò nou vlé fè plis pasé édé’y kopwann sa Bondyé vlé’y fè. Nou osi vlé édé’y ni an bon wilasyon épi Jéhova èk pou édé’y mété Jéhova pwenmyé an lavi’y. An plis di sa, nou vlé édé’y apwann mannyè pou dépan asou Jéhova lè’y ka èspéyansé òpozisyon. Èvèk lè nou moutwé’y nou ni konfyans-lan ki i vlé plè Jéhova, sa kay ba’y fòs-la pou fè disizyon-an pou sèvi Jéhova.