Kisa Bib-la Ka Di Konsèné Lè Moun Jété Ti Bébé?
Wépons Bib-la ka bay
Lè on moun jété an ti bébé, sa vlé di moun-lan fè an bagay èspwé pou tjwé ti bébé-a ki an matwis li. Èk vwéman, Bib-la pa ka sèvi èkspwèsyon-an “jété ti bébé.” Mé la ni an chay vèwsé an Bib-la ki ka édé nou konpwann mannyè Bondyé ka konsidiwé lavi, jis lavi an ti bébé ki p’òkò fèt.
Lavi sé on kado hòd Bondyé. (Jennésis 9:6; Sam 36:9) Anfen an zyé Bondyé, tout lavi byen valowab, jis lavi an ti bébé ki an matwis manman’y. Konsa, si on moun fè on bagay èspwé pou tjwé an ti bébé ki p’òkò fèt, moun sala sé yon mòdara.
Bondyé té bay nasyon Izwayèl lwa sala: “Si dé nonm ka goumen, épi yonn di yo fwapé yon madanm ki ansent èk madanm-lan akouché avan lè, mé ni li ni ti bébé-a pa mò, moun-lan ki fwapé madanm-lan ni pou péyé pou donmaj-la silon sa mawi madanm-lan mandé’y pou péyé. Èk i ni pou péyé’y douvan sé jij-la. Mé si manman-an ében ti bébé-a mò, ou ni pou bay lavi pou lavi.”—Ègzodòs 21:22, 23.a
Ki lè lavi an moun ka koumansé?
Pou Jéhova, lavi ka koumansé dépi mouman-an on madanm vini ansent. Èvèk an Pawòl li ki an Bib-la, Bondyé ka toujou palé konsèné an ti bébé ki p’òkò fèt kon yon moun. Annou konsidiwé yonndé ègzanp ki ka moutwé, pou Bondyé la pa ni pyès diféwans ant lavi an ti bébé ki an matwis manman’y, èvèk lavi an ti bébé ki ja fèt.
Lisentèspwi té pousé Wa David pou di Bondyé: “Ou té ja wè mwen avan mwen té fèt.” (Sam 139:16) Wi, dépi avan David té fèt, Bondyé té ka konsidiwé’y kon on moun.
Osi, dépi avan pwofèt Jérémaya té fèt, Bondyé té sav i té kay ba’y on ansayman spésyal. Bondyé té di’y: “Dépi avan mwen té fòmé’w an matwis manman’w, mwen té konnèt ou. Èk dépi avan ou té fèt, mwen té chwazi’w pou on twavay spésyal. Mwen té chwazi’w pou’w vini on pwofèt pou sé nasyon-an.”—Jérémaya 1:5.
Louk sé yonn sé nonm-lan ki ékwi Bib-la, èk i sété on dòktè. Mé menm mo pawòl-la i sèvi an langaj Gwik pou dékwi on ti bébé ki p’òkò fèt, sé menm mo-a i sèvi pou dékwi on ti bébé ki djòs fèt.—Louk 1:41; 2:12, 16.
Ès Bondyé kay pawdonnen on moun ki jété an ti bébé?
Wi, Bondyé sa pawdonnen on moun ki jété an ti bébé. Èvèk si apwézan moun-lan koumansé gadé lavi menm mannyè-a Bondyé ka gadé lavi, sa vlé di, moun-lan ka apwésyé lavéwité-a ki, lavi sé an kado ki sen èk ki byen valowab, i pa bizwen santi twò koupab, ében kontiné bat kò’y pou sa i té fè-a. Paskè Bib-la di nou: “[Jéhova] ni mizéwikòd èk lagwas . . . Menm kon koté sòlèy-la ka lévé-a lwen koté i ka kouché-a, sé menm otan lwen i ja jété fòt nou.”b (Sam 103:8-12) Wi, Jéhova kay pawdonnen tout moun ki vwéman wépanti pou péché yo té fè. Konsa, i kay pawdonnen moun ki jété ti bébé osi.—Sam 86:5.
Ès i sé an mové bagay pou jété an ti bébé ki p’òkò fèt, si lavi manman-an èben lavi ti bébé-a an danjé?
Lè nou konsidiwé sa Bib-la ka di konsèné lavi an ti bébé ki p’òkò fèt, sa ka édé nou pou konpwann i sé an mové bagay pou jété an ti bébé, senpliman paski on dòktè di, santé manman-an èben santé ti bébé-a pé an danjé.
Bon délè, lè on madanm ka akouché, on pwoblenm médikal sa lévé sibitman, èk yo oblijé chwazi ant lavi manman-an èk lavi ti bébé-a. Sé bagay sala pa ka fèt souvan, mé adan on sitiwasyon kon sa, lavi ki moun yo kay éséyé pou sové? Ében, manman-an épi papa-a kay ni pou désidé si sé pou sové lavi manman-an, ében lavi ti bébé-a. Sa sé on disizyon pèsonnèl yo kay ni pou fè.
a Sèten twadiksyon Bib ka fè’y sanm ki, lè’y vini pou lwa sala, sé lavi manman-an ki té enpòtan, pa lavi ti bébé-a ki p’òkò fèt. Kanmenm, si nou gadé tèks-la pou sé vèwsé sala an langaj Hibrou, nou kay wè, yo ka palé konsèné yon aksidan koté, swé manman-an èben ti bébé-a ki an matwis li mò.