Èsta Sové Pèp Li

Èsta sété on bèl jenn fi ki té ka wèsté an vil Chouchann, an péyi Pèwja. I sété yon òflen, mé i té ni on gwan kouzen yo té ka kwiyé Mòdikay. Èk lè manman Èsta épi papa’y mo, Mòdikay sala adòpté Èsta, èvèk i lévé’y kon ich li. Mòdikay épi Èsta sété Jwif. Yo té anpanmi gany Jwif-la Wa Nèbyoukadnéza té tiwé an Jérouzalèm, plizyè lanné avan sa. Èk sé kon sa Èsta épi Mòdikay twapé kò yo ka wèsté an péyi Pèwja. Mòdikay té ka twavay kon on sèvant bay wa péyi Pèwja, sa vlé di, Wa Ahasiyouròs.

Yon jou, madanm Wa Ahasiyouròs dézobéyi’y. Pou pini madanm-lan, wa-a tiwé’y an pozisyon’y kon wenn, èk i koumansé gadé pou on lòt madanm pou wiplasé’y. Konsa, sèvant wa-a mennen tout sé pli bèl fi-a ki té an péyi-a ba li, pou’y swézi yonn di yo pou vini wenn. Ében, Èsta té anpanmi sé bèl jenn fi-a yo mennen bay wa-a, èk anpanmi yo tout sé Èsta wa-a swézi. Mé, Mòdikay di Èsta pou pa kité pyèsonn konnèt, li Èsta sété on Jwif.

Bon. La té ni on nonm yo té ka kwiyé Hémann, èk i té ni on gwo pozisyon an sèvis wa-a. Sé li ki té wèskonsab pou tout sé pwens-la. Lè’w wè Hémann té ka pasé, tout sèvant wa-a ki té ka twavay bò bayè kay wa-a, té ni pou bésé tèt yo èk ajounou douvan’y. Hémann té byen kontan sa, paskè i té ni an chay lògèy. Anfen, i té vlé tout moun bésé tèt yo, èk ajounou douvan’y. Konsa lè’y wè Mòdikay pa té ka fè sa, i twapé kò’y tèlman faché i té vlé tjwé Mòdikay. Èk lè’y vini konnèt Mòdikay sété on Jwif, i fè on konplo pou’y tjwé tout Jwif ki té an péyi-a. Mi sé sa i fè. I alé èk i di wa-a: ‘Sé Jwif-la sé moun ki méchan, èk yo danjéwé. Konsa, sé pou’w tjwé yo tout.’ Wa Ahasiyouròs di’y: ‘Fè népòt sa ou kwè ki nésésè pou’w sa akonpli sa.’ Èk wa-a bay Hémann pouvwa-a pou pasé on lwa. Silon lwa-a Hémann pasé-a, li twèzyenm «13^yenm» jou an mwa Éda, yo té kay tjwé tout sé Jwif-la. Mé, Jéhova té ka wè tout bagay.

Èsta pa té konnèt anyen konsèné lwa-a Hémann té pasé-a. Konsa, Mòdikay voyé kòpi lwa-a bay Èsta, èk i di’y: ‘Alé palé épi wa-a èk plédé épi’y, pou’w sa délivwé pèp ou.’ Mé Èsta di Mòdikay: ‘Si on moun antwé lakou kay wa-a san wa-a envité’y pou fè sa, sé tjwé yo kay tjwé moun sala. Tout moun konnèt sa. Èk wa-a p’òkò kwiyé mwen pou twant «30» jou! Mé, mwen kay alé. Si’y lonjé baton-an ban mwen, mwen kay wèsté vivan. Si’y pa lonjé’y, ében mwen kay mò.’

Konsa Èsta alé an lakou kay wa-a. Lè wa-a wè Èsta, i lonjé baton-an ba li. Lè sala, Èsta alé pli pwé, èk wa-a mandé’y: ‘Kisa ou vlé mwen fè ba’w?’ Èsta di’y: ‘Mwen vlé envité ou épi Hémann pou vini adan on ti fèt.’ Paditan yo té an fèt-la, Èsta envité wa-a épi Hémann pou vini adan on dézyenm fèt li denmen. Diwan dézyenm fèt-la, wa-a palé bay Èsta ankò. I di Èsta: ‘Kisa ou vlé mwen fè ba’w?’ Èsta di’y: ‘La ni on moun ki vlé tjwé mwen épi tout pèp mwen. Konsa tanpwi souplé, mwen ka mandé’w pou délivwé nou.’ Wa-a di Èsta: ‘Ki moun ki vlé tjwé’w-la?’ Èsta di’y: ‘Vyé méchan sala, yo ka kwiyé Hémann-lan.’ Lè wa-a tann sa, i vini tèlman faché, i fè yo tjwé Hémann lamenm.

Mé pyèsonn pa té sa chanjé lwa-a Hémann té pasé-a. Pa menm wa-a ki té sa chanjé’y. Konsa, wa-a bay Mòdikay pouvwa pou fè on lòt lwa. Èk lwa nèf sala té ka bay sé Jwif-la dwa-a pou défann kò yo, lè lèlmi yo ataké yo. Ében, li twèzyenm «13^yenm» jou an mwa Éda, andji pou sé lèlmi-an détwi sé Jwif-la kon Hémann té vlé, sé Jwif-la wonpi sé lèlmi-an. Wi, Jéhova bay sé Jwif-la on bèl laviktwa. Èk chak lanné apwé sa, sé Jwif-la té ka ni on fèt pou sélébwé laviktwa sala.