Pwonmèt-la Jèfta Té Fè-a

Malèwèzman, jan Izwayèl doubout adowé Jéhova ankò, èk yo koumansé adowé fo dyé. Mé lè sé Amonnayt-la koumansé goumen épi yo, sé fo dyé sala pa té sa fè anyen pou édé yo. Èk pou plizyè lanné, sé Amonnayt-la té ka fè jan Izwayèl an chay méchansté. Anfen, jan Izwayèl soufè kon sa anba lanmen sé Amonnayt-la pou dizwit «18» lanné. Finalman, lè jan Izwayèl pa té sa pwan ankò, yo koumansé mandé Jéhova pou édé yo. Yo di Jéhova: ‘Nou péché kont ou. Èk ou sa fè nou népòt sa ou vlé. Mé tanpwi souplé, sové nou anba lanmen sé lèlmi nou-an.’ Osi, yo détwi tout sé idòl-la yo té ni-an, èvèk yo koumansé adowé Jéhova ankò. Lè Jéhova wè sé chanjman-an yo fè-a, i pa té vlé yo kontiné soufè. Konsa, i chwazi on moun pou délivwé yo anba lanmen sé Amonnayt-la.

Moun-lan Jéhova chwazi pou bay pèp li diwèksyon, èk pou édé yo goumen épi sé Amonnayt-la, sété on nonm yo té ka kwiyé Jèfta. Jèfta sala sété on majò sòlda, èk i té fidèl pou Jéhova. I pwédyé èk i di Jéhova: ‘Si’w édé nou pou bat sé Amonnayt-la, mwen ka pwonmèt pou ba’w pwèmyé moun-lan ki sòti dèwò pou vini jwenn mwen, lè mwen witounen lakay mwen sennésòv apwé ladjè-a.’ Jéhova kouté lapwiyè Jèfta, èk i fè jan Izwayèl ganyen ladjè-a.

Ében, lè Jèfta witounen lakay li, pwèmyé moun-lan ki sòti dèwò pou byenvini’y sété fi’y. Bon, fi sala sété sèl fi-a Jèfta té ni. Anfen, fi-a sété sèl ich i té ni. Apa di fi sala, Jèfta pa té ni pyès lòt fi ében gason. Fi-a té tèlman kontan jan Izwayèl té ganyen batay-la, i sòti dèwò ka jwé tanbouwen, èk i té ka dansé pou byenvini papa’y. Lè Jèfta wè sa, i di fi-a: ‘Élas ich mwen! Ou ka kasé tjè mwen. Mwen pwonmèt Jéhova on bagay, èk pou mwen tjenn pwonmèt sala, mwen oblijé voyé’w Shaylo pou’w wann sèvis an tabènak-la.’ Mé fi-a di’y: ‘Papa, si’w pwonmèt Jéhova on bagay, ou ni pou tjenn pwonmèt sala. Sèl sa mwen ka mandé’w, sé pou’w kité mwen pasé dé «2» mwa an montany-lan épi sé jenn fi-a ki jan mwen-an. Apwé sa, mwen kay alé Shaylo pou mwen sèvi Jéhova an Tabènak-la.’ Jèfta dakò épi sa fi-a mandé’y-la, konsa i kité’y alé. Apwé dé «2» mwa-a, fi-a witounen lakay papa’y. Èk apwé sa, i alé wann sèvis an Shaylo. Fi sala wèsté fidèl pou Jéhova, èk i twavay an tabènak-la pou lèwèstan lavi’y. Mé yon fwa pa lanné, sé jenn fi-a ki té jan’y-lan té ka alé wè’y an Shaylo. Èk yo té ka pasé kat «4» jou épi’y, pou ankouwajé’y.