Ékwiti-a Asou Kwazon-an

Tjèk tan apwé, Bèlchaza vini wa Babilonn. Yon swè i té ni an gwo fèsten lakay li pou yon mil «1,000» moun enpòtan an péyi-a. I mandé sé sèvant li-a pou mennen sé pòt lò-a Nèbyoukadnéza té pwan an tanp Jéhova. Diwan fèsten-an, Bèlchaza èk sé moun-nan i envité-a sèvi sé pòt sala pou bwè èk pou glowifyé sé dyé yo-a. Sibitman, lanmen an nonm pawèt èk i koumansé ékwi an bagay dwòl asou an kwazon an chanm-lan ko yo té ka manjé.

Sa fè Bèlchaza pè toubonnman. Kon sa i kwiyé sé majisyen’y-lan èk i pwonmèt yo: ‘Moun-nan ki sa èspityé ékwiti sala, n’ay ba li twazyenm pozisyon-an an Babilonn.’ Yo éséyé, mé yo pyès pa té sa èspityé pawòl-la. Lè sala manman wa-a vini douvan. I di: ‘La ni an misyé yo ka kwiyé Dannyèl. Sé li Nèbyoukadnéza té ka kwiyé pou èspityé bagay ki té difisil pou konpwann. I sa di’w sa ékwiti sala vlé di.’

Lè Dannyèl wivé i alé douvan Wa Bèlchaza. Wa-a di’y: ‘Si ou sa li ékwiti sala èk èspityé’y, mwen kay ba ou an chenn an lò èk mwen kay ba ou twazyenm pozisyon-an an Babilonn.’ Dannyèl di’y: ‘Mwen pa vlé kado’w, mé n’ay èspityé ékwiti-a ba ou. Ou wè papa’w Nèbyoukadnéza, i té ni an chay lògèy, mé Jéhova oblijé’y abésé kò’y. Ou konnèt tout sa ki té wivé’y. Mé magwé sa, ou déwèspèkté Jéhova. Ou bwè diven an sé pòt lò-a yo pwan an tanp Li. Sé pou sa Bondyé ékwi pawòl-la: Mini, Mini, Tikèl, èk Pasin. Sa vlé di jan Médiya èk jan Pèwja kay ganyen laviktwa asou Babilonn, èk ou pa kay wa ankò.’

Bon, épi gwandè pak-la ki té owon Babilonn, èk fondjè lawivyè-a ki té pwé’y, i té sanm pyèsonn pa té kay sa pwan Babilonn. Mé menm swè sala, jan Médiya èk jan Pèwja ataké yo. Sayròs, wa Pèwja, fè dlo lawivyè-a pasé adan an lòt diwèksyon. Lè sala, sòlda’y té kay sa maché pou wivé bayè vil-la. Lè yo wivé, sé bayè-a té gwan ouvè! Lawmé-a kouwi antwé, yo pwan vil-la, èk yo tjwé Wa Bèlchaza. Apwé sa, Sayròs koumansé kondwi Babilonn.

I p’òkò té ni yon lanné, lè Sayròs fè yon anonsman. I di: ‘Jéhova di mwen pou wibati tanp li an Jérouzalèm. Népòt moun ki vlé alé édé, sa alé.’ Alò menm kon Jéhova té pwonmèt, an chay Jwif viwé an péyi yo swasant dis «70» lanné apwé yo détwi Jérouzalèm. Sayròs witounen sé pòt lò-a, sé pòt dajan-an èk sé vésèl-la Nèbyoukadnéza té pwan an tanp-lan. Ès ou sa wè mannyè Jéhova sèvi Sayròs pou édé pèp Li?